YOANE 9

1Yesu abere akalaba mwalangira omundu oyo wabutawa inina ndĩmatĩme. 2Neryo abiga buwe mobamũbũlya bati, Mũkangĩrĩrya, nindi yo wakola ebibi, omundu oyũ akabutwa mo ndĩmatĩme, ni iye, kutse ababũtĩ buwe kwehĩ? 3Yesu mwasũbĩrya ati, Omundu oyũ mwatakola ebibi kutse ababũtĩ buwe, nĩkwa abutawa mo ndĩmatĩme, emĩbĩrĩ ya Nyamuhanga iminyikale omwisi wuwe. 4Tutolere itwakola emĩbĩrĩ y'oyo wanyituma omugulu bũkĩnalolĩre; obũtũkũ bũkandĩsyĩra, isihali mundu wangatoka erikola. 5Omugulu nyikine omo kihugo indi kyakakala ky'ekihugo. 6Abere abĩbũga ebĩ, Yesu mwatwĩra amatande w'ahisi, mwatsumba olondo omo matande; neryo mwahakabya olondo oko meso w'omundu oyo. 7Neryo mwamubwira ati, Ugende, unabe omo kitsinga ky'eSĩloamũ, eribindula liti, Eritumwa. Neryo omundu oyo mwagenda, mwanaba, mwasubula inianemulangira. 8Neryo abalĩkyabo, n'abamulangira erĩmbere ini mundu ũkasabĩrĩraya, mobabũga bati, Oyũ si yo mundu wabya akĩkala n'erĩsabĩrĩrya kwehĩ? 9Abandi bati, Nina ye, nĩkwa abandi bati, Iyihi, nĩkwa amũsosĩre. Nĩkwa omundu oyo mwabũga ati, Nĩna ngye. 10Neryo mobamũbũlya bati, Ameso wawe alĩbũkala ati kwehĩ? 11Naye mwasũbĩrya ati, Omundu oyukahulawa mo Yesu mwatsumba olondo, mwahakabyalo oko meso wage, kandi mwambwira ati, Ugende eSĩloamũ, unabe. Neryo monayayo monanaba, monabana erilangira. 12Nabo mobamũbũlya bati, Ali hahi kwehĩ? Naye ati, Sĩnyasĩ. 13Neryo mobatwala omundu oyo wabya ndĩmatĩme oko Bafarĩsayo. 14Ekiro Yesu atsumba olondo, n'erĩrĩbũla ameso w'omundu oyo, kyabya kiro ky'eSabato. 15Abafarĩsayo nabo mobabũlya omundu oyo bati nga mwabana erilangira liwe lyo ati. Naye mwabwirabo ati, Aliahakabaya olondo oko meso wage, nage monganaba, neryo ngalangira. 16Abandi b'oko Bafarĩsayo mobabũga bati, Omundu oyo wakola ekĩ si wa Nyamuhanga, kusangwa sĩalĩowa omugambo w'eSabato. Abandi bati, Ko mundu mukola-nabi angakola emĩbĩrĩ ĩkalĩre ng'eyĩ yo ati kwehĩ? Neryo mohabya erigabana omo katĩkatĩ kabo. 17Neryo Abafarĩsayo mobaswabũlya omundu oyo bati, Abĩrĩrĩbũla ameso wawe, ũkabũgakĩ busana naye kwehĩ? Naye ati, Nĩ mũmĩnyererĩ. 18Nĩkwa Abayũda mobatamwĩkĩrĩrya kw'abya ndĩmatĩme, kandi mobatamwĩkĩrĩrya kwabiribana erilangira bate babirikira ababũtĩ b'oyo wabana erilangira. 19Neryo mobabũlyabo bati, Oyũ ni mwana wenyũ kwehĩ? Kandi muti abutawa mo ndĩmatĩme kwehĩ? Neryo lino akalangira ati kwehĩ? 20Ababũtĩ buwe mobasũbĩryabo bati, Tũnasĩ kw'oyũ ni mwana wetu, kandi tũnasĩ kw'abutawa mo ndĩmatĩme. 21Nĩkwa sĩtwasĩ ng'akalangira ati lino, kutse sĩtwasĩ oyo walĩbũla ameso wuwe. Mũmũbũlaye, ka ni mukulu-kulu, abũge ĩyowene. 22Ababũtĩ buwe mobabũga batya kusangwa babya bakubaha Abayũda. Abayũda nabo babya ibabiriya embĩta bati omundu amamũmĩnyĩsya kw'ali Kristo, asyahiwa erĩlũsĩbwa omo nyũmba y'erĩhĩndanamo. 23Busana n'omwatsi oyũ, ababũtĩ buwe mobabũga bati, Ka ni mukulu-kulu, mũmũbũlaye! 24Engendo y'akabiri mobabirikira omundu oyo wabya ndĩmatĩme, mobamubwira bati, Upipe Nyamuhanga; ĩtwe tũnasĩ omundu oyũ ni mukola-nabi. 25Neryo mwasũbĩrya ati, Sĩnyasĩ nga ni mukola-nabi; omwatsi muguma nyasĩ nyiti, nabya ndĩmatĩme, lino ngalangira. 26Neryo mobamũbũlya bati, Mwakukolakĩ kwehĩ? Mwalĩbũla ameso wawe ati kwehĩ? 27Naye mwasũbĩryabo ati, Nabiribabwira, simwetahulikirira. Busana nakĩ mukasonda erĩowa kandi kwehĩ? Nenyũ mwanzĩre eribya biga buwe nibya kwehĩ? 28Nabo mobamutsuma, bati, Uwe uli mwiga wuwe, nĩkwa ĩtwe tuli biga ba Musa. 29Tũnasĩ ngoko Nyamuhanga mwabũga na Musa; nĩkwa omundu oyũ sĩtwasĩ aho alũa. 30Omundu oyo mwasũbĩryabo ati, Ĩlolo, omwatsi w'eriswekera goyũ, sĩmwasĩ eyo alũa, nĩkwa mwalĩbũla ameso wage! 31Tũnasĩ Nyamuhanga sĩalĩowa abakola-nabi; nĩkwa omundu amabya akakenga Nyamuhanga, n'erikola ebyo anzĩre, Nyamuhanga akamowa. 32Erĩtsũka na kera sihehatogũbwa omundu ũkalĩbũla ameso w'omundu oyo wabutawa mo ndĩmatĩme. 33Omundu oyo atalĩlũa ewa Nyamuhanga, siangatoka erikola kindu. 34Mobamũsũbĩrya bati, Wabutawa omo bibi, kandi ũkatũkangĩrĩraya kwehĩ? Neryo mobamugusa eyĩhya w'enyũmba y'erĩhĩndanamo. 35Yesu mowa ko bamamugusa eyĩhya. Neryo mwamweya, mwamũbũlya ati, Wĩkĩrĩrye uku Mugala wa Nyamuhanga kwehĩ? 36Neryo omundu oyo mwamũsũbĩrya ati, Naye nindi Mukama, inatoka erĩmwĩkĩrĩrya kwehĩ? 37Yesu mwamubwira ati, Wabirimulolako, kandi yo n'oyũkabũga nawe. 38Neryo omundu oyo mwabũga ati, Mukama, namĩkĩrĩrya! Neryo omundu oyo mwamũramya. 39Yesu mwabũga ati, Monasa omo kihugo ekĩ busana n'eritswera, neryo esyondĩmatĩme balangire, kandi abakalangira babye ndĩmatĩme. 40N'abandi b'oko Bafarĩsayo ababya haguma naye mobowa emyatsi eyĩ, mobamũbũlya bati, Netu tuli ndĩmatĩme kwehĩ? 41Yesu mwabwirabo ati, Kumbe mũlũe ndĩmatĩme simwangabya n'ekibi; nĩkwa lino mũkabũga muti, Tukalangira; ebibi byenyũ ibine.

will be added

X\