YOANE 8

1Neryo obuli mundu mwasuba ewuwe. Nĩkwa Yesu mwaya oko kitwa ky'eMĩzeĩtũnĩ. 2Neryo omo ngyakya-ngyakya Yesu mwatsinduka omo Hekalũ. Neryo endeko yosĩ moyamũhĩkako, neryo Yesu mwĩkala mwakangĩrĩryabo. 3Nĩkwa abasakĩ n'Abafarĩsayo mobamuletera omũkalĩ oyo weyĩbawa omo luteto. Neryo mobamũhĩra omo karĩkatĩ kabo. 4Mobabwira Yesu bati, Mũkangĩrĩrya, omũkalĩ oyũ aliatsimbawa akateta. 5Nĩkwa omo Migambo yetu, Musa mwatuhana ati omũkalĩ ng'oyũ ĩtawe omo mabwe, nawe ũkabũgakĩ kwehĩ? 6Babũga ebĩ busana n'erimulengako batoke erimuhandikirira. Nĩkwa Yesu mũnama, mwasaka oko kitaka omo munwe wuwe. 7Nĩkwa babere bakamuhatikana erĩmũbũlya, Yesu mũnamũkala, mwabũga nabo ati, Oyute n'ebibi omo katĩkatĩ kenyũ atsũke erimugusa kw'erĩbwe. 8Kandi mũnama, mwasaka oko kitaka. 9Nabo omugulu bowa ekyo, mobatsũka erihuluka mo muguma muguma, erĩtsũka oko mukulu wa kubo, neryo Yesu mwasĩgalaho ĩyowene n'omũkalĩ omo katĩkatĩ aho. 10Neryo Yesu mũnamũkala, mwabũga n'omũkalĩ ati, Mũkalĩ, balihi kwehĩ? Sĩhalwe omundu n'omuguma oyũkakũhĩra kw'omusango kwehĩ? 11Naye mwabũga ati, Mukama, sihali n'omuguma. Neryo Yesu mwabũga ati, Nage sĩndĩkũhĩra kw'omusango. Ugende, erĩtsũka lino susyekola kibi kandi.] 12Kandi Yesu mwaswabũga nabo ati, Ĩngye indi kyakakala ky'ekihugo. Oyukanyikwama siendisyalendera omo mwĩrĩmya, nĩkwa asyabya n'ekyakakala ky'engebe 13Abafarĩsayo mobamubwira bati, Ũkatũla omwatsi wawe wowene; erĩyĩtũla goko lyawe si ry'ekwenene. 14Yesu mwasũbĩryabo ati, Nomo nangatũla omwatsi busana nage, erĩrũlago lyage ni kwenene, kusangwa nyĩnasĩ eyo nalũa, n'eyo ngaya. Nĩkwa ĩnywe sĩmwasĩ eyo nalũa, kutse eyo ngaya. 15Ĩnywe mukatswera oko mũsĩndo w'omubiri, Ĩngye sinditswera mundu n'omuguma. 16Nĩkwa nomo nangatswera, eritswera lyage ni kwenene, kusangwa sindi ĩngyowene, nĩkwa indi na Tata oyo wanyituma. 17Nibya bĩsakĩre omo Migambo yenyũ biti, Erĩtũlago ly'abandu babiri ni kwenene. 18Ĩngye indi oyũkatũla omwatsi wage, na Tata oyo wanyituma akarũla omwatsi wage. 19Neryo mobamũbũlya bati, Ko Tata wawe ali hahi kwehĩ? Yesu mwasũbĩryabo ati, Sĩmũnyasĩ, kandi sĩmwasĩ Tata wage. Kumbe mũnyasĩ, nga mwangaminya Tata wage nibya. 20Yesu mwabũga ebĩnywa ebĩ omo Hekalũ omo kyumba aho babya bakabika esyofranka sy'ekĩbo. Kandi sihabya mundu wamuhamba, kusangwa endambĩ yiwe ĩsĩrĩyahĩka. 21Kandi Yesu mwabũga nabo ati, Ngagenda, nenyũ mwasyanyisondasondya, kandi mwasyahola omo bibi byenyũ. Simwangatoka erĩhĩka eyo ngaya. 22Kyaleka Abayũda ĩbabũga bati, Asyayĩta kwehĩ? Kusangwa akabũga ati, Simwangatoka erĩhĩka eyo ngaya. 23Kandi abya akabwirabo ati, Ĩnywe muli b'eyĩkwa, ĩngye indi w'endata; ĩnywe muli b'ekihugo kino, ĩngye sindi w'ekihugo kino. 24Kikaleka inababwira nyiti, Mwasyahola omo bibi byenyũ. Kusangwa mwamatendĩkĩrĩrya ko nyiri ye, mwasyahola omo bibi byenyũ. 25Neryo mobabũlya Yesu bati, Uwendi kwehĩ? Yesu mwabwirabo ati, Kye n'ekyo nabiribabwira erĩtsũka erĩmbere. 26Ngwite myatsi mingi y'eribabwira n'eritswera busana nenyũ. Nĩkwa oyo wanyituma ni kwenene, kandi ngabwira ekihugo emyatsi eyo ngowa ewuwe. 27Nabo mobataminya kw'abya akabwirabo busana n'Ĩse. 28Neryo Yesu mwabwirabo ati, Omugulu mwasyasumba Omugala w'Omundu, neryo mwasyaminya ĩngye kw'indi ye. Kandi sindikola kindu omw'ihana lyage ĩngyowene, nĩkwa ngabũga emyatsi eyĩ ngoko Tata anyĩkangĩrĩraya. 29N'oyo wanyituma ali haguma nage. Sialitanyĩsĩga ĩngyowene, kusangwa ngakola ebiro byosĩ emyatsi eyĩkamũtsemesaya. 30Neryo Yesu abere akabũga emyatsi eyĩ, abangi mobamwĩkĩrĩrya. 31Neryo Yesu mwabwira Abayũda abamwĩkĩrĩraya ati, Mwamabya mukakwama ebĩnywa byage, imuli biga bage kwenene. 32Kandi mwasyaminya ekwenene, n'omwatsi w'ekwenene asyabaha obwĩranda. 33Nabo mobamũsũbĩrya bati, Tuli bana ba Abrahamũ, sitwetabya omo bukobe bw'omundu n'omuguma. Ko ũkabũga uti kwehĩ? uti, Mwasyabya n'obwĩranda. 34Yesu mwasũbĩryabo ati, Kwenene, kwenene ngabũga nenyũ nyiti, Obuli mundu oyukakola ebibi, ni mukobe w'ebibi. 35Omukobe sĩalĩkala omo nyũmba ebiro byosĩ, nĩkwa omwana akĩkala ebiro byosĩ kera na kera. 36Neryo Mugala amabaha obwĩranda, mwasyabya n'obwĩranda kũndũ. 37Nyĩnasĩ ko muli bana ba Abrahamũ. Nĩkwa mukasonda erĩnyĩta, kusangwa ekĩnywa kyage sikiwite omwanya omo mitima yenyũ. 38Ngabũga emyatsi eyo nabirilangira embere sya Tata wage. Nenyũ mukakola emyatsi eyo tata wenyũ ababwira. 39Mobamũsũbĩrya bati, Abrahamũ ni tata wetu. Yesu mwabwirabo ati, Kumbe muli bana ba Abrahamũ, nga mukakola emĩbĩrĩ Abrahamũ akola. 40Ĩngye nabiribabwira omwatsi w'ekwenene ogo Nyamuhanga ambwira. Nĩkwa mukasonda-sonda erĩnyĩta. Abrahamũ mwatakola atya! 41Ĩnywe mukakola emĩbĩrĩ tata wenyũ akakola. Nabo mobamubwira bati, Situli basa-na-nyĩnya, tuwite tata muguma, ye Nyamuhanga. 42Yesu mwabwirabo ati, Kumbe Nyamuhanga ni Tata wenyũ, nga mũnyanzĩre; kusangwa nahuluka ngalũa ewa Nyamuhanga, kusangwa mondasa n'ehamũlĩ yage, iye yo wanyituma. 43Busana nakĩ simuliminya ebyo ngabũga kwehĩ? Ni kusangwa simulitoka erĩowa ekĩnywa kyage. 44Ĩnywe muli bana ba tata wenyũ Satanĩ, kandi esyongumbu sya tata wenyũ syo mwanzĩre erikola. Iye nĩ mwĩtĩ. Siali mo mwatsi w'ekwenene, kusangwa sihali mwatsi w'ekwenene omo mutima wuwe. Omugulu akabũga amabehĩ, akabũga ebiwe ĩyowene, kusangwa nĩ mũbehĩ, kandi nĩ ĩse w'amabehĩ. 45Nĩkwa ĩngye ngabũga omwatsi w'ekwenene, ekyo kikaleka ĩmũtanyĩkĩrĩrya. 46Nindi ũkw'ĩnywe akanzĩnga oko bibi kwehĩ? Namabũga omwatsi w'ekwenene, nĩkĩ kyo kikaleka ĩmũtanyĩkĩrĩrya kwehĩ? 47Omundu wa Nyamuhanga akowa ebĩnywa bya Nyamuhanga. Kusangwa simuli ba Nyamuhanga, sĩmũlĩowabyo. 48Abayũda mobasũbĩrya Yesu bati, Motũtabũga ndeke tuti, Uli Munya Samarĩa, kandi uli ko mbĩnga kwehĩ? 49Yesu mwasũbĩrya ati, Sindi ko mbĩnga, nĩkwa ngasĩkaya Tata wage, nenyũ mukanyihemula. 50Nĩkwa ĩngye sindisonda-sonda erĩsĩkĩbwa; hali muguma oyukasonda-sondalyo, naye akatswera. 51Kwenene, kwenene ngabũga nenyũ, omundu amabika ekĩnywa kyage, oluholo silwendisyamũhĩkako na kera. 52Abayũda mobamubwira bati, Lino tũnasĩ k'uli ko mbĩnga. Abrahamũ mwahola, n'abamĩnyererĩ mobahola nibya; nawe ũkabũga uti, Omundu amabika ekĩnywa kyage, oluholo sĩlwendĩsyamũhĩkako na kera. 53Tata wetu Abrahamũ mwahola, nawe uli mukulu kwilaba ye kwehĩ? N'abamĩnyererĩ nabo mobahola, nawe ukayiyira mondi kwehĩ? 54Yesu mwasũbĩrya ati, Namayipipa, eriyipipa lyage ini buyira. Oyukanyipipa ni Tata wage, nenyũ muti, Iye ni Nyamuhanga wetu. 55Kandi ĩnywe simwetamuminya, nĩkwa ĩngye nyĩmwasĩ. Namabũga nyiti, sĩnyĩmwasĩ, nasyabya mũbehĩ nga nywe. Nĩkwa nyĩnamwasĩ, kandi ngabika ekĩnywa kiwe. 56Tata wenyũ Abrahamũ mwatsema erilola oko kiro kyage, kandi mwalola kukyo, mwatsema. 57Neryo Abayũda mobamubwira bati, Suli wabya w'emyaka makũmĩ atanu, walola uku Abrahamũ uti kwehĩ? 58Yesu mwabwirabo ati, Kwenene, kwenene ngababwira nyiti, Abrahamũ ate abutwa, INYINE. 59Neryo mobatola amabwe erimugusa goko; nĩkwa Yesu mwayĩbĩsa, mwalũa omo Hekalũ.

will be added

X\