YOANE 7

1Enyũma w'emyatsi eyĩ, Yesu mwalendera eGalĩlaya, kusangwa siabya anzĩre erirendera eYũdea kusangwa Abayũda basonda-sonda erĩmwĩta. 2Neryo ebiro bikulu by'Abayũda by'amahema byabya hakũhĩ. 3Abagala babo Yesu mobamubwira bati, Ũlũe hano, uye eYũdea, abiga bawe batoke erilola oko mĩbĩrĩ yawe eyo ukakola. 4Kusangwa omundu sialĩbĩsa ebyo akakola, amabya akasonda eriminyikala ndeke. Wamakola emyatsi eyĩ ũyĩmĩnyĩkalaye oko kihugo. 5Kusangwa abagala babo nibya mobatamwĩkĩrĩrya. 6Neryo Yesu mwabũga nabo ati, Endambĩ yage siriyahĩka, nĩkwa endambĩ yenyũ ĩkahĩka emigulu yosĩ. 7Ekihugo sikiritoka erĩbakwa obusu, nĩkwa kĩkanyĩkwa obusu, kusangwa ngabwirakyo nyiti emĩbĩrĩ yakyo ni mibi. 8Ĩnywe muye oko biro bikulu ebyo. Sindiendisyaya oko biro bikulu ebĩ, kusangwa endambĩ yage siyeyaberwa. 9Yesu abere abwirabo emyatsi eyĩ, mwasĩgala eGalĩlaya. 10Nĩkwa abagala babo babere babigenda oko biro bikulu ebyo, Yesu mwayayo butsira embere sy'abandu, nĩkwa omo bũbĩso-bĩso. 11Abayũda babya bakamusonda-sonda oko biro bikulu, bati, Alihi kwehĩ? 12Neryo habya eminigonigo mingi omo katĩkatĩ k'endeko busana naye. Abandi mobabũga bati, Ni mundu mubuya, n'abandi bati, Iyihi, akatalaya endeko. 13Nĩkwa sihabya mundu ukamwahula embere sy'abandu, busana n'eriubaha Abayũda. 14Neryo omo katĩkatĩ k'ebiro bikulu ebyo Yesu mwaya omo Hekalũ, mwatsũka erĩkangĩrĩrya. 15Neryo Abayũda mobasweka bati, Omundu oyũ amatoka akalasi ko ati isialitakangĩrĩrĩbwa kwehĩ? 16Yesu mwasũbĩryabo ati, Ebyo ngakangĩrĩraya si byage, nĩkwa ni bya Nyamuhanga oyo wanyituma. 17Omundu oyukasonda erikola erianza lya Nyamuhanga, asyaminya erĩkangĩrĩrya eryo nga ni rya Nyamuhanga kutse nga ngabũga omw'iyihana lyage. 18Omundu oyũ akabũga ebiwe, akasonda eripipa liwe; nĩkwa oyukasonda eripipa ly'oyo wamutuma, iye ni kwenene, kandi sihali ekitatunganene omwisi wuwe. 19Musa mwatabaha Emigambo kwehĩ? Nĩkwa sihali muguma g'ũkw'ĩnywe oyukakenga Emigambo. Busana nakĩ mukasonda-sonda erĩnyĩta kwehĩ? 20Endeko mobamũsũbĩrya bati, Uli ko mbĩnga! Nindi yukasonda-sonda erĩkwĩta kwehĩ? 21Yesu mwasũbĩryabo ati, Monakola omũbĩrĩ muguma, ũnywe bosĩ momwaswekerago. 22Busana n'omwatsi oyũ, Musa mwabaha eribana. Si rya Musa, nĩkwa lyalũa oko botata-kulu benyũ. Neryo mũkabanaya omundu oko kiro ky'eSabato. 23Omundu amabanĩbwa oko kiro ky'eSabato, Emigambo ya Musa isiyeketawa, mukanyihitanako kusangwa ngalamaya omundu yo ndeke oko kiro ky'eSabato kwehĩ? 24Simutswere erilolwako, nĩkwa mutswere eritswera litunganene. 25Neryo abandi b'oko bandu b'eYerũsalema mobabũga bati, Oyũ si yo bakasonda erĩĩta kwehĩ? 26Kandi lebaya, akabũga embere sy'abandu, ĩsĩbebũga mwatsi naye! Kw'abatabalĩ banasĩ ndeke kw'oyũ ni Kristo kwehĩ? 27Nĩkwa ekiro Kristo asyasa, sihali mundu oyo wasĩ eyo alũa. Nĩkwa tũnasĩ eyo mundu oyũ akalũa. 28Neryo omugulu Yesu akangĩrĩraya omo Hekalũ, mwabirikira n'omulenge munene ati, Mũnyasĩ, kandi mũnasĩ eyo nalũa. Kandi sĩndĩtahĩka n'ehamũlĩ yage. Nĩkwa oyo wanyituma ni kwenene. Ĩnywe sĩmũmwasĩ. 29Nĩkwa ĩngye nyĩnamwasĩ, kusangwa nalũa ewuwe, naye yo wanyituma. 30Neryo mobasonda-sonda erimuhamba, nĩkwa mohatabya mundu oyo wamũhĩra kw'ebyala, kusangwa endambĩ yiwe ĩsĩrĩyahĩka. 31Nĩkwa abangi b'omo ndeko mobamwĩkĩrĩrya bati, Ekiro Kristo asyasa asyakola ebitiko-tiko bingi kwilaba ebyo mundu oyũ akakola kwehĩ? 32Abafarĩsayo mobowa endeko ĩkatsomererya Yesu. Neryo abahererĩ bakulu n'Abafarĩsayo mobatuma balembya erihamba Yesu. 33Yesu mwabwirabo ati, Nasyabya nenyũ kandi katambĩ, neryo nasyaya ukw'oyo wanyituma. 34Mwasyanyisonda-sonda, simwendisyanyibana, n'aho nasyabya simwangatoka erĩhĩkaho. 35Neryo Abayũda mobakanĩa omo katĩ-katĩ kabo bati, Omundu oyũ asyayahi kwehĩ? ati, Sitwendisyamubana. Asyaya oko mĩyĩ y'Abagĩrĩkĩ aho Abayũda bali, n'erĩkangĩrĩrya Abagĩrĩkĩ kwehĩ? 36Akabũga ati, Mwasyanyisonda-sonda, nĩkwa simwendisyanyibana, n'aho nasyabya simwendisyatoka erĩhĩkaho. Akabũgakĩ kwehĩ? 37Neryo oko kiro ky'enyũma-nyũma ky'ebiro bikulu ebyo, ekiro kinene ky'eryusa, Yesu mwahangana mwabũga n'omulenge munene ati, Omundu amakwa enyota, ase kwĩngye apũlaye. 38Ngoko Amasako akabũga ati, Oyũkanyĩkĩrĩraya, esyonyũsĩ sy'amagetsi w'engebe syasyasenda sĩkalũa omo mutima wuwe. 39Nĩkwa Yesu abũga ekĩ iniakahula Omũlĩmũ ogo abakamwĩkĩrĩraya basyahabwa. Oko mugulu oyo Omũlĩmũ isialiahabwa, kusangwa Yesu isialiabana olukengerwa luwe. 40Abandi bandu b'omo ndeko, omugulu bowa ebĩnywa ebĩ, mobabũga bati, Kwenene oyũ nĩ Mũmĩnyererĩ oyo! 41Abandi bati, Oyũ ni Kristo! Kandi abandi bati, Ko Kristo akasyalũa eGalĩlaya kwehĩ? 42Amasako sĩalĩtabũga ati, Kristo akalũa oko lubuto lwa Dawĩdĩ, n'eributirwa eBetelehemũ, omũyi wa Dawĩdĩ abyamo kwehĩ? 43Neryo mohabya erigabana omo ndeko busana na Yesu. 44Abandi mobasonda erimuhamba, nĩkwa mohatabya mundu oyo wamũhĩra kw'ebyala. 45Neryo abalembya mobasuba oko bahererĩ bakulu n'Abafarĩsayo. Nabo mobabũlyabo bati, Busana nakĩ simwetamuleta kwehĩ? 46Abalembya mobasũbĩryabo bati, Na kera sihali mundu wabuga ng'omundu oyũ kw'akabũga. 47Abafarĩsayo mobasũbĩryabo bati, Amabatalya nenyũ kwehĩ? 48Oko batabalĩ n'Abafarĩsayo hali omundu oyo wabĩrĩmwĩkĩrĩrya kwehĩ? 49Nĩkwa endeko eno eyĩtasĩ Emigambo ya Musa ni batakirwa. 50Nĩkodemo omuguma wa kubo, oyo wahĩka uku Yesu erĩmbere, mwabwirabo ati, 51Emigambo yetu siyetswera mundu batetatsũka erĩmowa, n'eriminya ebyo akakola. 52Mobamũsũbĩrya bati, Nawe nibya uli w'eGalĩlaya kwehĩ? Usome Amasako, wasyalebya ko hate omũmĩnyererĩ oyũkalũa eGalĩlaya.

will be added

X\