YOANE 6

1Enyũma w'aho Yesu mwagenda eyisirya w'engetsi y'eGalĩlaya, ye Ngetsi y'eTĩberĩa. 2N'endeko nene moyamukwama, kusangwa balangira ebitiko-tiko ebyo abya akakolera abakonĩ. 3Nĩkwa Yesu mwahetukira oko kitwa, n'eyo mwĩkala n'abiga buwe. 4Neryo Ebiro Bikulu by'Erikiruka by'Abayũda byabya hakũhĩ. 5Neryo Yesu mwasumba ameso wuwe, mwalangira endeko nene ĩkamũhĩkako, neryo mwabũga na Fĩlĩpo ati, Twangagula amandu go hahi, aba batoke eriryago kwehĩ? 6Yesu abya akabũga atya erimulengako; kusangwa abya asĩ ebyo asonda erikola. 7Fĩlĩpo mwamũsũbĩrya ati, Amandu w'esyodĩnarĩ magana abiri siangatolerabo nomo bangalya obuli mundu kake. 8Omuguma w'oko biga buwe ye Anderea, mugala wabo Sĩmonĩ Petero, mwamubwira ati. 9Hano hali omũlwana oyuwite amandu atanu w'ekisusu, n'amahere abiri, nĩkwa hino nĩkĩ busana n'abandu bangahaba kwehĩ? 10Yesu mwabwirabo ati, Mwĩkalaye abandu b'ahisi. Neryo aho habya ebiti bingi. Neryo abalume abo mobĩkala ahisi. Eriganza lyabo lyabya nga elfu ĩtanu (5000). 11Neryo Yesu mwĩmya amandu ayo, neryo mwagabirago oko babya bĩkere ahisi. Mwakola atya nibya n'amahere eriha abosĩ ngoko babya banzĩre. 12Babere babĩũgũta, Yesu mwabwira abiga buwe ati, Mukuma-kume ebihande-bihande ebitahangukira, sihatale kindu. 13Neryo mobasonga-songya, mobũsũlya ebitiri ĩkũmĩ na bibiri oko bitahangukira ebyalũa oko mandu atanu w'ekisusu ebyasaka, abandu babirya. 14Neryo abandu babere balangira ekitiko-tiko ekyo Yesu akola, mobabũga bati, Kwenene oyũ nĩ Mũmĩnyererĩ oyo wasyasa omo kihugo! 15Nĩkwa Yesu mwaminya kw'abandu babya bakasonda erĩhĩka n'erimuhamba n'amaka erimuyira mo mwami. Neryo mwalũaho mwaya oko kitwa ĩyowene. 16Neryo bwabere bwabya ĩgolo-golo abiga buwe mobandagalira oko ngetsi. 17Neryo babere babingira omo bwato, mobatsũka erisoka engetsi bakaya eKapernaũmũ. Neryo ibwamabihumbera, nĩkwa Yesu ĩsĩalĩahĩka aho bali. 18N'engetsi moyatsũka erigunga busana n'erihunga lĩkalĩre eryabya likabuhirira. 19Neryo abiga mobagoya olulengo lw'ebilometre bitanu kutse ndatu, neryo mobalangira Yesu iniakatandayira oko magetsi akahĩka hakũhĩ n'obwato; neryo mobubaha. 20Nĩkwa Yesu mwabũga nabo ati, Nĩ ĩngye, simubahe! 21Neryo mobalĩga erĩmũkokya omo bwato; neryo-neryo obwato mobwahĩka oko mũsĩke eyo babya bakalolya. 22Neryo engyakya endeko eyahangana eyisirya w'engetsi moyalangira isihali obundi bwato buke aho, ibo n'obuguma. Kandi mobaminya ko Yesu sialitingira omo bwato haguma n'abiga buwe, nĩkwa abiga mobagenda ĩbobene. 23Awandi mato make-make mwalũa eTĩberĩa, mwahĩka hakũhĩ n'aho endeko yalira amandu, Omukama iniamabiha ewasĩngya. 24Neryo omugulu endeko yalangira Yesu n'abiga buwe ko bateho, mobingira omo mato make-make, mobaya eKapernaũmũ, erisonda-sonda Yesu. 25Kandi omugulu abandu begaya Yesu eyisirya w'engetsi, mobamũbũlya bati, Mũkangĩrĩrya, wahĩka eno yo mugulu wahi kwehĩ? 26Yesu mwasũbĩryabo ati, Kwenene, kwenene ngabũga nenyũ, mukanyĩsondaya kusangwa mwalya oko mandu, momũgũta, si busana n'erilangira ebitiko-tiko. 27Simukolere ebyalya ebikahonda, nĩkwa mukolere ebyalya ebikabyaho erĩhĩka oko ngebe y'erikota. Ebyalya ebĩ Omugala w'Omundu asyabahabyo, kusangwa Nyamuhanga, Tata, abĩrĩmũhĩra kw'ekiminyikalo ky'erĩmũsĩma. 28Neryo mobabũlya Yesu bati, Tuyire tuti tutoke erikola emĩbĩrĩ ya Nyamuhanga kwehĩ? 29Yesu mwasũbĩryabo ati, Omũbĩrĩ wa Nyamuhanga goyũ: mwĩkĩrĩraye oyo Nyamuhanga atuma. 30Neryo mobamũbũlya bati, Wangakolakĩ mo kitiko-tiko neryo tulangirekyo, n'erĩkwĩkĩrĩrya kwehĩ? Ukakola omũbĩrĩ wahi kwehĩ? 31Abotata-kulu betu mobalya amana omo mbwarara; ngoko byasakawa biti, Mwahabo obundu bw'erirya obũkalũa elubula. 32Yesu mwabwirabo ati, Kwenene, kwenene ngababwira, kw'atabya Musa oyo wabaha obundu obwalũa elubula; nĩkwa ni Tata wage oyukabaha obundu bw'ekwenene obũkalũa elubula. 33Kusangwa obundu obo Nyamuhanga akaha yo yũkalũa elubula n'eriha engebe oko kihugo. 34Neryo mobamubwira bati, Mukama, utuhe obundu obo bw'ebiro byosĩ. 35Yesu mwabũga nabo ati, Ĩngye indi bundu bw'engebe. Oyukasa kwĩngye sĩendĩsyakwa nzala na kera, n'oyũkanyĩkĩrĩraya sĩendĩsyakwa nyota na kera. 36Nĩkwa ngababwira nyiti, Mwabirinyilolako, nĩkwa sĩmũlĩkĩrĩraya. 37Abosĩ abo Tata akamba basyasa ũkw'ĩngye; n'oyukasa kwĩngye sindiendĩsyamũsũbya eyĩhya n'ahake. 38Kusangwa sinandagala erĩlũa elubula erikola erianza lyage, nĩkwa nandagala erikola erianza ly'oyo wanyituma. 39Kandi erianza ly'oyo wanyituma lyerĩ ati, sĩnyĩtalaye n'omuguma oko bosĩ abirimba, nĩkwa nyĩlũbũkaye abosĩ oko kiro ky'enyũma-nyũma. 40Kusangwa erianza lya Tata wage lyerĩ ati, Oyukalangira Omugala, akamwĩkĩrĩrya, abane engebe y'erikota; nage nasyamũlũbũkya oko kiro ky'enyũma-nyũma. 41Neryo Abayũda mobayikuna busana na Yesu, kusangwa abũga ati, Ĩngye indi bundu obwandagala bũkalũa elubula. 42Neryo mobabya bakabũga bati, Omundu oyũ si Yesu, mugala wa Yosefũ kwehĩ? Ĩtwe tũnasĩ ĩse wuwe na nyĩnya wuwe. Ko lino akabũga ati, Nandagala ngalũa elubula, ati kwehĩ? 43Yesu mwasũbĩryabo ati, Muleke emiyikuno omo katĩkatĩ kenyũ. 44Sihali omundu oyukatoka erĩnyĩhĩkako, Tata oyo wanyituma ataliamuleta; nage nasyamũlũbũkya ekiro ky'enyũma-nyũma. 45Abamĩnyererĩ mobasaka bati, Abandu bosĩ basyakangĩrĩrĩbwa na Nyamuhanga. Obuli mundu oyũkowa Tata n'erĩkangĩrĩrĩbwa naye, akahĩka ũkw'ĩngye. 46Butsira erĩbũga ambu hali mundu wabirilangira Tata; yo n'oyũkalũa ewa Nyamuhanga, Iye abirilola uku Tata. 47Kwenene, kwenene ngababwira, oyũkĩkĩrĩraya awite engebe y'erikota. 48Ĩngye indi bundu bw'engebe. 49Abotata-kulu benyũ mobalya amana omo mbwarara, mobahola. 50Obũ bo bundu bukandagala bũkalũa elubula, neryo omundu atoke eriryabo, iniatahola. 51Ĩngye indi bundu bw'engebe obwandagala bũkalũa elubula. Omundu amalya oko bundu obo, asyabyaho kera na kera; n'obundu obo nasyaha ni mubiri wage, ogo ngaha, ekihugo kitoke eribyaho. 52Neryo Abayũda mobatsũka erikuba obuhaka omo katĩkatĩ kabo bati, Omundu oyũ angatoka erituha omubiri wuwe eriryago ati kwehĩ? 53Yesu mwabwirabo ati, Kwenene, kwenene ngabũga nenyũ, mwamatindalya omubiri w'Omugala w'Omundu n'erĩpũlya omusasi wuwe, simuwite engebe omwisi wenyũ. 54Oyukalya omubiri wage n'erĩpũlya omusasi wage, awite engebe y'erikota, nage nasyamũlũbũkya n'engebe oko kiro ky'enyũma-nyũma. 55Kusangwa omubiri wage ni kalyo kũndũ, n'omusasi wage nĩ 'pũlya ly'ekwenene. 56Oyukalya omubiri wage n'erĩpũlya omusasi wage amatikene ũkw'ĩngye, nage nyimatikene ukw'iye. 57Ngoko Tata oyuliho anyituma, nage nyiriho busana na Tata; litya oyukanyirya, asyabyaho busana nage. 58Obũ bo bundu obwandagala bũkalũa elubula; sibuli ng'obundu obo abotata-kulu benyũ balya, mobahola. Oyukalya obundu obũ asyabyaho kera na kera. 59Yesu mwabũga enyatsi eyĩ omo nyũmba y'erĩhĩndanamo omugulu akangĩrĩraya eKapernaũmũ. 60Neryo abangi b'oko biga ba Yesu omugulu bowa ebĩ mobabũga bati, Ekĩnywa ekĩ kĩkalĩre; ko nindi wangowakyo. 61Nĩkwa Yesu, ĩnĩanasĩ kw'abiga buwe bakayikuna busana n'ebĩ, mwabwirabo ati, Ekĩ kikaleka ĩmwahũka-hũkya emitima kwehĩ? 62Byasyabya biti, mwamalangira Omugala w'Omundu akahetukira eyo abya erĩmbere kwehĩ? 63Nĩ Mũlĩmũ oyukaha engebe; omubiri sialigasakĩ. Ebĩnywa ebyo nabĩrĩbũga nenyũ nĩ Mũlĩmũ, kandi ni ngebe. 64Nĩkwa hali abandi omo katĩkatĩ kenyũ abatĩkĩrĩraya. Kusangwa Yesu abya asĩ erĩmbere nga ni bahi abatĩkĩrĩrye, n'oyo wasyamuhotera. 65Neryo Yesu mwaswabũga ati, Busana n'omwatsi oyũ, nabiribabwira nyiti sihali mundu wangatoka erĩnyĩhĩkako, Tata amatendimuha eriasa ũkw'ĩngye. 66Busana n'ekĩ, abangi b'oko biga buwe mobasuba enyũma, mobataswalendera naye kandi. 67Neryo Yesu mwabũlya abiga erĩkũmĩ n'ababiri ati, Nenyũ mũnanzĩre ĩmwayĩgenderya kwehĩ? 68Sĩmonĩ Petero mwamũsũbĩrya ati, Mukama, twasyaya ukundi kwehĩ? Uwe uwite ebĩnywa by'engebe y'erikota. 69Netu twabĩrĩkĩrĩrya twabiriminya k'uli Mũbũyĩrĩre wa Nyamuhanga. 70Yesu mwasũbĩryabo ati, Mondayisoga nywe, erĩkũmĩ n'ababiri, kwehĩ? Nĩkwa omuguma g'ũkw'ĩnywe nĩ Satanĩ. 71Nĩkwa abya akahula Yũda mugala wa Sĩmonĩ Ĩskarĩota. Kusangwa Yũda abya muguma g'okw'ĩkũmĩ n'ababiri, iyukandisyamuhotera.

will be added

X\