YOANE 5

1Enyũma w'emyatsi eyĩ, habya ebiro bikulu by'Abayũda, neryo Yesu mwahetukira eYerũsalema. 2Kandi eYerũsalema hakũhĩ n'Olũkyo lw'Esyombũlĩ, hali ekitsinga ekiwite ebitalikirire bitanu. Ekitsinga ekyo kikahulawa mo Betesaĩda. 3Omo bitalikirire ebĩ habya endeko y'abakonĩ, esyondĩmatĩme, n'ebirema, n'abũmĩre, [ibakalindirira erĩtabũkala ly'amagetsi. 4Kusangwa omũlaĩka w'Omukama iniakandagala igumi-guma omo kitsinga eripanza amagetsi. Neryo oyũkatsũka eriya omo magetsi anabĩtabũkala, ĩnĩalamĩbwa oko ndwala eyo alwe akwĩre.] 5Neryo omundu muguma abyaho, inialwere oko myaka makũmĩ asatu n'omunani. 6Neryo Yesu mwamulangira iniagotsereho, kandi mwaminya omundu oyo kw'abirilwala biro bingi. Neryo mwamũbũlya ati, Wanzĩre erilama kwehĩ? 7Omũkonĩ oyo mwamũsũbĩrya ati, Mukama, singwite omundu w'erĩnyĩhĩra omo kitsinga omugulu amagetsi akatabũkala; nĩkwa omugulu ngalenga eriyamo, ogundi mundu akanyitanga. 8Neryo Yesu mwamubwira ati, Hangana, uheke engyingo yawe, uyigendere. 9Neryo-neryo omundu oyo mwalama. Neryo mwaheka engyingo yiwe, mwayigendera. Nĩkwa ekiro ekyo kyabya ekiro ky'eSabato. 10Neryo Abayũda mobabwira oyo walamĩbawa bati, Mũnabwĩre ni Sabato, kandi Emigambo ĩkakũganaya eriheka engyingo yawe. 11Nĩkwa mwasũbĩryabo ati, Oyũlyanyĩlamaya yuliambwira ati, Uheke engyingoyawe, uyigendere. 12Nabo mobamũbũlya bati, Omundu oyo yondi oyukakubwira ati, Uheke engyingo yawe uyigendere kwehĩ? 13Nĩkwa oyo walamĩbawa mwataminya nga nindi, kusangwa Yesu iniamabĩlũaho omugulu endeko yabyaho. 14Enyũma w'aho, Yesu mwamweya omo Hekalũ, mwamubwira ati, Lebaya, wabirilama. Suswekola ekibi, ukasyabya ko mwatsi akalĩre kw'aho. 15Neryo omundu oyo mwalũaho, mwayabwira Abayũda kw'ali ini Yesu oyo wamũlamaya. 16Busana n'omwatsi oyũ Abayũda mobatsũka erĩendererya Yesu, kusangwa abya akakola emyatsi eyĩ oko kiro ky'eSabato. 17Nĩkwa Yesu mwasũbiryabo ati, Tata wage akakola emigulu yosĩ, ĩngye nage ngakola. 18Busana n'omwatsi oyũ Abayũda mobasonda-sonda erĩmwĩta kwilaba; kusangwa ambu abya akaketa omugambo w'eSabato, kandi kusangwa abya akahula Nyamuhanga mo Tata wuwe, ĩnĩakayĩrĩngĩrĩranaya na Nyamuhanga. 19Neryo Yesu mwasũbĩryabo ati, Kwenene, kwenene ngabũga nenyũ nyiti, Omugala sialikola kindu ĩyowene, nĩkwa akakola ebyo akalangira Tata wuwe akakola; kusangwa ebyosĩ Ĩse akakola, byo Mugala akakola atya nibya. 20Kusangwa Ĩse anzĩre Mugala, kandi akamũkangaya emyatsi yosĩ eyo akakola. Kandi emĩbĩrĩ minene ũkw'eyĩ asyamũkangyayo, imwatoka erisweka. 21Kusangwa ngoko Tata akalũbũkaya abaholĩ n'erihabo engebe, litya Omugala akaha engebe ukw'abo anzĩre erihayo. 22Kandi Tata sialitswera omundu n'omuguma. Nĩkwa abĩriha Omugala ehamũlĩ y'eritswera lyosĩ. 23Neryo abosĩ batoke erĩsĩkya Omugala, ngoko bakasĩkaya Tata. Oyũtesĩkaya Omugala, sĩalĩsĩkaya Tata oyo wamutuma. 24Kwenene, kwenene ngababwira, oyũkowa ebĩnywa byage, n'erĩkĩrĩrya oyo wanyituma, awite engebe y'erikota. Kandi siendisyatswerwa, nĩkwa abĩrĩlũa omo luholo, abiringira omo ngebe. 25Kwenene, kwenene, ngababwira, endambĩ ikasa, na lino ineho, omugulu abaholĩ basyowa omulenge w'Omugala wa Nyamuhanga, n'abo abakowa basyabyaho. 26Kusangwa ngoko Tata ni mwenye engebe, litya abiriha Omugala eribya omwenye engebe. 27Kandi abiriha Omugala ehamũli y'eritswera esyombanza, kusangwa iye ni Mugala w'Omundu. 28Simusweke busana n'ekĩ; kusangwa endambĩ ikasa, oko mugulu oyo, abosĩ abali omo masinda basyowa omulenge wuwe. 29Basyalũa omo masinda wabo; abakola emĩbĩrĩ mibuya basyalũbũka oko ngebe, n'abakola ebibi basyalũbũka oko lubanza lw'eritswerwa. 30Sinditoka erikola kindu omw'iyihana lyage; ngatswera ngoko Nyamuhanga akambwira, n'eritswera lyage ritunganene; kusangwa sindisonda erikola ebyo nyanzĩre, nĩkwa erianza ly'oyo wanyituma. 31Namatũla omwatsi wage ĩngyowene, erĩtũlago lyage si kwenene. 32Hali gundi oyũkatũlago busana nage; kandi nyĩnasĩ ebyo akabũga busana nage ni kwenene. 33Mwabiritumira Yoane y'abakwenda, naye abĩrĩtũla omwatsi w'ekwenene. 34Nĩkwa ĩngye sindi n'obwaga bw'erĩtũlago ly'abandu; nĩkwa ngabũga emyatsi eyĩ, imwatoka erĩlamĩbwa. 35Yoane abya tala eyikaka n'erĩkolerya, nenyũ mwabya mwanzĩre eritsema katambĩ omo kyakakala kiwe. 36Nĩkwa ĩngye ngwite erĩtũlago lĩnene-kwilaba erya Yoane; kusangwa emĩbĩrĩ eyo Tata abirimba eribugirira, emĩbĩrĩ eyo ngakola ĩkatũlago busana nage, iti Tata abirinyituma. 37Na Tata oyo wanyituma, iye abĩrĩtũla omwatsi busana nage. Ĩnywe sĩmwetowa omulenge wuwe na kera, kutse erilangira ekĩsosekanĩo kiwe. 38Kandi simuwite ekĩnywa, kusangwa sĩmũlĩkĩrĩraya oyo atuma. 39Mukasoma Amasako, kusangwa mũkaganĩraya muti muwite engebe y'erikota. Kandi Amasako ayo akatũlago busana nage! 40Nĩkwa sĩmũlĩrĩga erĩmbĩkako imwatoka eribana engebe. 41Sindisonda eripipwa n'abandu. 42Nĩkwa nyĩbasĩ; simuwite olwanzo lwa Nyamuhanga omo mitima yenyũ. 43Nabĩrĩhĩka omo lĩna lya Tata wage, nenyũ sĩmũlĩtanyĩkokya; ogundi amasa omo lĩna liwe ĩyowene, mwasyamũkokya. 44Mukatoka erĩkĩrĩrya muti, omugulu mukabana erĩsĩkanĩa omuguma oko gundi kwehĩ, isimulisonda-sonda erĩsĩkya erĩkalũa uku Nyamuhanga ĩyowene. 45Sĩmũganĩraye muti nasyabahandikirira embere sya Tata. Musa yo wasyabahandikirira. Ni Musa oyo mũkahĩra kw'amaha. 46Kusangwa kumbe mwĩkĩrĩraya uku Musa, nga mwanganyĩkĩrĩrye; kusangwa iye mwasaka emyatsi yage. 47Nĩkwa mwamatendĩkĩrĩrya Amasako wuwe, mwasyĩkĩrĩrya ebĩnywa byage byo muti kwehĩ?

will be added

X\