YOANE 4

1Neryo Omukama abere aminya kw'Abafarĩsayo babĩrĩowa ko Yesu akayira n'erĩbatĩsya abiga bangi oko ba Yoane, 2nĩkwa Yesu ĩyũtebatĩsaya, nĩkwa abiga buwe bo babatĩsaya. 3Yesu mwalũa eYũdea mwaswaya eGalĩlaya. 4Kandi kyabya kitolere inialabira oko kihugo ky'eSamarĩa. 5Neryo Yesu mwahĩka oko mũyĩ w'eSamarĩa owakahulawa mo Sũkarĩ, hakũhĩ n'ekitaka ekyo Yakobo aha mugala wuwe ye Yosefũ. 6Neryo ekitehero kya Yakobo kyabyaho. Neryo Yesu, ĩnĩalũhĩre busana n'olugendo luwe kwĩkala atya oko kitehero. Endambĩ yabya hakũhĩ na saa sĩta. 7Omũkalĩ w'eSamarĩa mwahĩkaho akateha amagetsi. Yesu mwamubwira ati, Umba aw'erĩpũlya. 8Kusangwa abiga ba Yesu babya ibabiriya oko mũyĩ eriyagula ebyalya. 9Omũkalĩ w'eSamarĩa oyo mwabwira Yesu ati, Uwe uli Mũyũda, nage indi Mũsamarĩa, ũkanyĩbũlaya aw'erĩpũlya uti kwehĩ? Kusangwa Abayũda baponene n'Abasamarĩa. 10Yesu mwamũsũbĩrya ati, Kumbe wasĩ olũsũnzo lwa Nyamuhanga, n'oyũkabũga nawe ati, Umba aw'erĩpũlya, kumbe wabĩrĩmũbũlya, naye kumbe abirikuha amagetsi w'engebe. 11Omũkalĩ mwamubwira ati, Mukama, suwite eky'eritehamo, n'ekitehero ni kiri. Neryo ukabana magetsi w'engebe ayo go hahi kwehĩ? 12Tata-kulu wetu Yakobo, mwatuha, ekitehero ekĩ, naye mwapũlya kukyo n'abagala buwe, n'ebihangulo biwe, nawe uli mukulu kwilaba tata-kulu wetu ye Yakobo kwehĩ? 13Yesu mwamũsũbĩrya ati, Oyũkapũlaya oko magetsi aya asyaswakwa enyota. 14Nĩkwa oyũkapũlaya amagetsi ago nasyamuha siendisyaswakwa enyota na kera. Nĩkwa amagetsi ago nasyamuha asyabya omwisi wuwe eyĩsoko y'amagetsi awakakũnũnũka n'erimuha engebe y'erikota. 15Omũkalĩ mwabũga ati, Mukama, umbe oko magetsi ayo, neryo sindiendĩsyaswakwa nyota, kutse ndasyaswasa eno n'eriteha magetsi! 16Yesu mwamubwira ati, Ugende, ubirikire ĩbawe, mwase eno. 17Omũkalĩ oyo mwasũbĩrya ati, Singwite ĩbage. Yesu mwamũsũbĩrya ati, Wamabũga ndeke uti suwite ĩbawe. 18Kusangwa wabiribya n'abĩbawe batanu, n'oyo guli naye sĩ ĩbawe. Ekĩ wabĩrĩbũga kwenene. 19Omũkalĩ mwabũga na Yesu ati, Mukama, namalebya k'uli mũmĩnyererĩ. 20Abotata wetu mobaramya Nyamuhanga oko kitwa ekĩ, nenyũ mũkabũga muti eYerũsalema ho abandu batolere erĩramĩrya Nyamuhanga. 21Yesu mwamubwira ati, Mũkalĩ, ũnyĩkĩrĩraye, omugulu asyasa isimwendisyaswaramya Tata oko kitwa ekĩ, kutse eYerũsalema. 22Ĩnywe mũkaramaya ekyo mũtasĩ; ĩtwe tũkaramaya ekyo twasĩ, kusangwa erilama lĩkalũa oko Bayũda. 23Nĩkwa omugulu akasa, kandi lino ane, abaramya b'ekwenene basyaramya Tata omo kĩrĩmũ n'ekwenene, kusangwa Tata akasondaya abandu abali batya eribya baramya buwe. 24Nyamuhanga nĩ Mũlĩmũ, n'abakamũramaya litolere ĩbamũramya omo kĩrĩmũ n'omo kwenene. 25Omũkalĩ mwabũga na Yesu ati, Nyasĩ Masĩya asyasa, Oyukahulawa mo Kristo, ekiro oyo asyasa, asyatubwira emyatsi yosĩ. 26Yesu mwamũsũbĩrya ati, Ĩngye ngabũga nawe, ni iye. 27Oko saa eyo abiga ba Yesu mobasubula, neryo mobasweka kusangwa abya akabũga n'omũkalĩ oyo. Nĩkwa sihabya oyũkabũga ati, Ukasondakĩ kwehĩ? Kutse, Busana nakĩ ũkabũga naye kwehĩ? 28Neryo omũkalĩ oyo mwasĩga erĩrega liwe, mwaya oko mũyĩ, mwabwira abandu bayo ati, 29Mwase, mũlebaye omundu, oyo wamambwira ebyosĩ nakola. Oyũ si Kristo kwehĩ? 30Nabo mobalũa oko mũyĩ, mobahĩka uku Yesu. 31Omo mugulu oyo abiga mobalemba-lemba Yesu bati, Mũkangĩrĩrya, ulya! 32Nĩkwa Yesu mwabwirabo ati, Ngwite akalyo k'erirya ako mũtasĩ. 33Kyaleka abiga ĩbabũlanĩa bati, Hali mundu wamuletere akalyo kwehĩ? 34Nĩkwa Yesu mwabwirabo ati, Akalyo kage ni 'kola erisonda ly'oyo wanyituma, n'eribuga omũbĩrĩ ogo amba. 35Sĩmwebũga muti, Hakĩsĩya mikera ĩnĩ erigesa ĩryahĩka, kwehĩ? Lebaya, ngababwira nyiti, Musumbe ameso wenyũ, musamalire amalima erĩre, amahĩka erigeswa. 36Oyukagesa akahamba oluhembo. Kandi akahĩndanaya esyombuto busana n'engebe y'erikota, neryo omũbĩbĩ n'omũgesĩ ibatoka eritsemera haguma. 37Kusangwa erĩbũga erĩ ni kwenene riti, Omundu muguma akabiba, n'ogundi akagesa. 38Ngabatuma eriyagesa aho mutakola; abandi babirikola, nenyũ mwabiriingira omo mĩbĩrĩ yabo. 39Neryo omo mũyĩ oyo, Abanya Samarĩa bangi mobĩkĩrĩrya Yesu busana n'ekĩnywa ky'omũkalĩ oyo wabũga ati, Amambwira ebyosĩ ebyo nakola. 40Neryo Abanya Samarĩa babere bahĩka uku Yesu, mobamuhatikana bati ĩkale haguma nabo. Neryo Yesu mwĩkalaho biro bibiri. 41Abandi bangi mobĩkĩrĩrya busana n'ekinywa kya Yesu. 42Mobabwira omũkalĩ bati, Lino tũkĩkĩrĩraya, si busana n'erĩbũga lyawe, nĩkwa kusangwa ĩtwe twabĩrĩowa ĩtwebene-bene, kandi tũnasĩ oyũ, kwenene kw'ali Mũlamya w'ekihugo. 43Neryo enyũma w'ebiro bibiri, Yesu mwalũaho mwaya eGalĩlaya. 44Kusangwa Yesu abya ĩnĩabĩrĩbũga ati, Omũmĩnyererĩ sĩalĩsĩkĩbawa omo kihugo ky'ewabo. 45Neryo omugulu ahĩka eGalĩlaya, Abanya Galĩlaya mobamũkokya kusangwa mobalangira emyatsi yosĩ akola eYerũsalema oko biro bikulu, kusangwa nabo mobaya oko biro bikulu ebyo. 46Neryo Yesu mwaya kandi eKana y'eGalĩlaya, aho abindulira amagetsi mo bĩnyũ. Nĩkwa eKapernaũma habya omũtabalĩ muguma, n'omugala wuwe abya alwere. 47Omugulu owa ko Yesu abĩrĩlũa eYũdea n'eriya eGalĩlaya, omũtabalĩ oyo mwahĩka uku Yesu, n'erĩmũbũlya ati andagale erĩlamya mugala wuwe, kusangwa abya hakũhĩ n'erihola. 48Neryo Yesu mwamubwira ati, Ĩnywe mwamatendilangira ebitiko-tiko n'eby'eriswekera, sĩmwendĩsyĩkĩrĩrya n'ahake. 49Omũtabalĩ oyo mwabũga na Yesu ati, Mukama, andagalirayo omwana wage ate ahola. 50Yesu mwamubwira ati, Genda, mugala wawe aneho. Omundu oyo mwĩkĩrĩrya ekĩnywa ekyo Yesu amubwira, neryo mwagenda. 51Neryo abagombe buwe mobahĩndana naye akandagala bati, Mugala wawe aneho. 52Naye mwabũlyabo esaa omwana wuwe atsũka erilama. Nabo mobamubwira bati, Mũlĩgolo oko saa sirinda erĩhũhana molyamũlũĩreko. 53Neryo ĩse mwaminya ko yabya oko saa eyo Yesu amubwira ati, Mugala wawe aneho. Neryo omundu oyo mwĩkĩrĩrya n'enyũmba yiwe yosĩ. 54Ekĩ ni kitiko-tiko ky'akabiri ekyo Yesu akola abĩlũa eYũdea akaya eGalĩlaya.

will be added

X\