YOANE 3

1Neryo habya omundu w'Abafarĩsayo, omũtabalĩ w'Abayũda, oyukahulawa mo Nĩkodemo. 2Omundu oyo mwasa uku Yesu omo kiro, ati, Mũkangĩrĩrya, tũnasĩ k'uli mũkangĩrĩrya oyo walũa ewa Nyamuhanga. Kusangwa sihali mundu oyo wangatoka erikola ebitiko-tiko ebyo ukakola, Nyamuhanga ate haguma naye. 3Yesu mwamũsũbĩrya ati, Kwenene, kwenene, ngabũga nawe, nyiti, Omundu amatendibutwa kandi, siangatoka erilola oko Bwami bwa Nyamuhanga. 4Nĩkodemo mwabũlya Yesu ati, ko mundu angatoka eributwa ati, amabibya mukulu kwehĩ? Angatoka eriingira omo nda ya koyo wuwe n'eriswabutwa kwehĩ? 5Yesu mwamũsũbĩrya ati, Kwenene, kwenene, ngakubwira nyiti, Omundu amatendibutwa oko magetsi n'oko Mũlĩmũ, siangatoka eriingira omo Bwami bwa Nyamuhanga. 6Omubiri akabuta omubiri, n'Omũlĩmũ akabuta omũlĩmũ. 7Susweke kusangwa mongakubwira nyiti, Litolere imwabutwa kandi. 8Erihunga likabuhirira eyo lyanzĩre, nawe ũkowa erihuha lyalyo, nĩkwa ĩsĩwasĩ eyo lĩkalũa, kutse eyo likaya; kw'ali atya obuli mundu oyo Mũlĩmũ akabuta. 9Neryo Nĩkodemo mwamũsũbĩrya n'erĩmũbũlya ati, Kw'emyatsi eyĩ yangabya iti kwehĩ? 10Yesu mwasũbĩrya ati, Uwe uli mũkangĩrĩrya wa Ĩsraelĩ isuliminya emyatsi eyĩ kwehĩ? 11Kwenene, kwenene, ngabũga nawe, ĩtwe tũkabũga ebyo twasĩ, kandi tũkatũla omwatsi w'ebyo twabirilangira, nenyũ sĩmũlĩrĩga erĩtũlago lyetu. 12Namabya ngababwira emyatsi y'ekihugo ĩsĩmũlĩtĩkĩrĩryayo, namababwira emyatsi y'elubula, mwasyĩkĩrĩryayo muti kwehĩ? 13Sihali omundu oyo wahetukira elubula, yo n'Omugala w'Omundu oyo wandagala akalũa elubula. 14Ngoko Musa asumbira enzoka y'endata omo mbwarara, litya Omugala w'Omundu atolere erisumbirwa endata. 15Neryo omundundi oyũkamwĩkĩrĩraya abane engebe y'erikota. 16Kusangwa Nyamuhanga mwanza ekihugo ky'atya, kyaleka iniaha Mugala wuwe, Ekyusa kiwe, neryo oyũkamwĩkĩrĩraya siahere, nĩkwa abye n'engebe y'erikota. 17Kusangwa Nyamuhanga mwatatuma Mugala wuwe omo kihugo eribya Mũtswerĩ wakyo, nĩkwa abye Omũlamya wakyo. 18Oyũkĩkĩrĩraya Omugala sialitswerawa, nĩkwa oyũtetĩkĩrĩrya iniamabitswerwa, kusangwa sĩalĩtĩkĩrĩrya oko Mugala, Ekyusa kya Nyamuhanga. 19Neryo eritswera lyerĩ, ekyakakala kyabiriasa omo kihugo, n'abandu mobanza omwĩrĩmya kwilaba ekyakakala, kusangwa emĩbĩrĩ yabo yabya mibi. 20Kusangwa obuli mundu oyukakola ebibi akakwa ekyakakala ky'obusu, kandi sĩalĩhĩka oko kyakakala, emĩbĩrĩ yiwe mibi ĩkasyamĩnyĩkalĩbwa. 21Nĩkwa oyukakola ekwenene akasa oko kyakakala, emĩbĩrĩ yiwe iminyikale kw'ikakolawa omo nzira y'erĩowa Nyamuhanga. 22Enyũma w'emyatsi eyĩ, Yesu n'abiga buwe mobasa omo kihugo ky'eYũdea. Eyo, Yesu mwasiba nabo ĩnĩakabatĩsaya. 23Yoane nibya abya akabatĩsĩrya eAĩnonĩ hakũhĩ n'eSalĩmũ, kusangwa ho habya magetsi mangi; kandi abandu babya bakahĩka n'erĩbatĩsĩbwa. 24Kusangwa Yoane isialiaguswa omo mũlĩkĩ. 25Neryo obuhaka mobwahuluka omo katĩkatĩ k'abiga ba Yoane n'Omũyũda oko mwatsi w'erĩerya. 26Neryo abiga abo mobahĩka uku Yoane, mobamubwira bati, Mũkangĩrĩrya, oyo wabya haguma nawe eyisirya w'eYorodanĩ, oyo wahula, lebaya, akabatĩsaya, n'abandu bosĩ bakamũhĩkako! 27Yoane mwasũbĩryabo ati, Omundu sialibana ekindu ekyo Nyamuhanga atamuha, kĩkalũa elubula. 28Nenyũ muli batũlĩ b'omwatsi wage ngoko nabũga nyiti. Ĩngye sindi Kristo, nĩkwa natumawa embere siwe. 29Oyuwite omũherũkĩ, nĩ ĩba w'omũherũkĩ; nĩkwa omwĩra w'ĩba w'omũherũkĩ, oyo wimene n'erimuhulikirira, akatsema kutsibu erĩowa omulenge w'ĩba w'omũherũkĩ. Litya obutseme bwage bwamahĩkana. 30Litolere iniahama, nage inakeha. 31Oyũkalũa endata alengĩre abosĩ, n'ow'ekihugo ni w'ekihugo, kandi akabũga eby'ekihugo. Oyũkalũa elubula alengĩre abosĩ. 32Akatũla omwatsi w'ebyo abirilangira n'ebyo abĩrĩowa, kandi sihali mundu oyũkalĩga erĩtũlago liwe. 33Oyũkalĩga erĩrũlago liwe, akakangaya ngoko Nyamuhanga ni kwenene. 34Kusangwa oyo Nyamuhanga abirituma akabũga ebĩnywa bya Nyamuhanga, kusangwa Nyamuhanga sialirengera mundu y'Omũlĩmũ wuwe. 35Tata anzĩre Omugala, kandi abĩrĩhĩra emyatsi yosĩ omo byala biwe. 36Oyũkĩkĩrĩraya Omugala awite engebe y'erikota; nĩkwa oyutekenga Omugala siendisyalola oko ngebe, nĩkwa erihitana lya Nyamuhanga lĩmwĩkereko kera na kera.

will be added

X\