YOANE 21

1Enyũma w'emyatsi eyĩ, Yesu mwayĩkangya kandi oko biga buwe oko ngetsi y'eTĩberĩa. Neryo mwayĩkangya kubo omo mũsĩndo oyũ. 2Sĩmonĩ Petero, na Toma oyukahulawa mo Muhasa, na Natanaelĩ w'eKana y'eGalĩlaya, n'abagala ba Zebedayo, n'abandi biga babiri, babya haguma. 3Sĩmonĩ Petero mwabwirabo ati, Ĩngye ngayasoha amahere. Mobamubwira bati, Netu tukagenda haguma nawe. Neryo mobahuluka mobingira omo bwato, n'omo kiro ekyo mobatabana kindu. 4Nĩkwa bwabere bwasonda erikya, Yesu mwahangana oko mũsĩke w'engetsi, nĩkwa abiga mobataminya kw'ali Yesu. 5Neryo Yesu mwabũlyabo ati, Bana, munawite amahere kwehĩ? Mobamũsũbĩrya bati, Iyihi. 6Neryo mwabwirabo ati, Muguse ebĩsohĩ by'oko luhande lw'amali lw'obwato neryo mwasyabanago. Neryo mobagusa ebĩsohĩ, neryo-neryo mobataluka erikurabyo busana n'amahere mangi. 7Neryo omwiga oyo Yesu abya anzĩre mwabwira Petero ati, Yo Mukama! Neryo omugulu Sĩmonĩ Petero owa kw'ali iyo Mukama, mwambala olukimba luwe, kusangwa abya iniabiriambula esyongimba siwe, neryo mwayigusa omo ngetsi. 8Abandi biga mobasa omo bwato buke ibanemukura obutahataha ĩbũnoswĩre n'amahere, kusangwa sibabya hali oko mũsĩke, nga metre makũmĩ mwenda n'ĩbĩrĩ (92 m). 9Neryo babere bahĩka oko kitaka, mobalangira omuliro w'amakala inianeho, n'amahere oko muliro oyo, n'obundu. 10Yesu mwabwirabo ati, Mulete oko mahere ago mukabisoha. 11Sĩmonĩ Petero mwayakura ebĩsohĩ oko kitaka, ĩbĩnoswĩre n'amahere manene-manene, erĩgana n'amakũmĩ atanu n'awasatu (153), nomo anabya mangi, ebĩsohĩ mobitatulika. 12Yesu mwabwirabo ati, Mwase mulye. Sihabye omwiga oyo walenga erĩmũbũlya ati, Uwendi kwehĩ? Ĩbanasĩ kw'ali iyo Mukama. 13Neryo Yesu mwasa, mwĩmya obundu, mwahabobo. Kandi mwahabo n'amahere. 14Eyĩ ni ngendo y'akasatu Yesu akayĩkangya oko biga; abĩlũbũkĩbwa oko baholĩ. 15Neryo babere babirya, Yesu mwabũlya Sĩmonĩ Petero ati, Sĩmonĩ, mugala wa Yoane, ũnanyanzĩre kwilaba aba kwehĩ? Naye mwamubwira ati, Ega, Mukama! Ũnasĩ ko nyĩkwanzĩre. Yesu mwamubwira ati, Ũtegaye ebyana by'esyombũlĩ syage. 16Neryo Yesu mwamũbũlya engendo y'akabiri ati, Sĩmonĩ, mugala wa Yoane, ũnanyanzĩre kwehĩ? Naye mwamũsũbĩrya ati, Ega, Mukama, ũnasĩ ko nyĩkwanzĩre. Yesu mwamubwira ati, Ũtegaye esyombũlĩ syage. 17Neryo Yesu mwamũbũlya engendo y'akasatu ati, Sĩmonĩ, mugala wa Yoane, ũnanyanzĩre kwehĩ? Neryo Petero mwabya n'obũlĩge kusangwa Yesu amamũbũlya engendo y'akasatu ati, Ũnanyanzĩre kwehĩ? Neryo mwamubwira ati, Mukama, ũnasĩ emyatsi yosĩ, ũnasĩ ko nyĩkwanzĩre! Neryo Yesu mwamubwira ati, Ũtegaye esyombũlĩ syage. 18Kwenene, kwenene ngakubwira nyiti, omugulu wabya mũlwana, wabya igukayĩkũndĩka omo mukaba wawe, igukagenda eyo wanzĩre; nĩkwa ekiro wasyabya mũsyakulu, wasyakakya ebyala byawe, n'ogundi mundu asyakũkũndĩka omukaba, n'erikutwala aho ũtanzĩre erigenda. 19Nĩkwa Yesu mwabũga ekĩ iniakahula omũsĩndo w'oluholo olo Petero asyahola busana n'eripipa Nyamuhanga. Neryo Yesu mwamubwira ati, Unyikwame! 20Neryo Petero mwabinduka, mwalangira omwiga oyo Yesu anzĩre akakwamabo, yo mwiga oyo wabya akegemera oko kĩkũba kya Yesu okw'irya ly'erĩgolo-golo, n'erĩbũga ati, Mukama, nindi yukakuhotera kwehĩ? 21Neryo Petero abere amulangira, mwabũga ati, Mukama, omundu oyo asyayira ati kwehĩ? 22Yesu mwamubwira ati, Namanza akasĩgalira erĩhĩka aho nasyasira, oyo ni mwatsi wawe kwehĩ? Uwe tanyikwama! 23Neryo ekĩnywa ekĩ mokyagenda-genda omo katĩkatĩ k'abalĩkyabo, kiti ambu omwiga oyũ siendisyahola. Nĩkwa Yesu mwatamubwira ati, Siendisyahola; nĩkwa ati, Namanza akasĩgalira erĩhĩka aho nasyasira, oyo ni mwatsi wawe kwehĩ? 24Oyũ yo mwiga oyũkatũla emyatsi eyĩ, kandi yo wasaka emyatsi eyĩ, netu tũnasĩ erĩtũlago liwe ko ni kwenene. 25Nĩkwa hali eyindi myatsi mingi eyo Yesu akola. Kumbe eyosĩ yalisakawa mo muguma muguma, mbino ekihugo kyosĩ sĩkyangasũngĩre omwanya busana n'ebitabu ebyangasakĩrwe.

will be added

X\