YOANE 20

1Neryo oko kiro ky'erĩtsũka ky'eYenga, omwĩrĩmya iniakineyo, Marĩa Magdalene mwasa okw'isinda, neryo mwalangira erĩbwe ĩryabĩrĩlũsĩbwa okw'isinda. 2Nĩkwa mwatibita mwaya eyiri Sĩmonĩ Petero n'ogundi mwiga oyo Yesu abya anzĩre, neryo mwabwirabo ati, Balũsĩrye Omukama y'omw'isinda, kandi sĩtwasĩ aho bamũhĩrĩre! 3Neryo Petero mwahongoka n'ogundi mwiga oyo, mobaya okw'isinda. 4Nĩkwa ababiri bosĩ mobatibitira iguma, n'ogundi mwiga oyo mwalengya Petero y'amagulu, mwamutanga okw'isinda. 5Neryo mũnama mwasamaliramo, mwalangira esyongimba sy'ekĩtanĩ ĩsĩnĩkĩryeho, nĩkwa mwatingiramo. 6Neryo Sĩmonĩ Petero mwahĩkaho, ĩnĩanakwamĩre ogundi oyo, neryo mwingira omw'isinda. Naye mwalangira esyongimba sy'ekĩtanĩ ĩsĩnĩkĩryeho, 7n'ekitambala ekyabya oko mutwe, ĩsĩkĩkĩrye haguma n'esyongimba sy'ekĩtanĩ, nĩkwa ĩkĩrĩngĩre aho wakyo. 8Neryo ogundi mwiga oyo watsũka erĩhĩka okw'isinda mwingiramo nibya, naye mwalangira kandi mwĩkĩrĩrya. 9Kusangwa isibebaminya Amasako, kw'atolere erĩlũbũka oko baholĩ. 10Neryo abiga abo mobasyasuba eka wabo. 11Nĩkwa Marĩa abya imene eyĩhya okw'isinda akalira. Neryo abere anemulira, mũnama mwasamalira omw'isinda. 12Neryo mwalola oko bamalaĩka babiri ibambite esyongimba nyeru-nyeru, ĩbanĩkere aho mubiri wa Yesu abya ĩkĩrye, omuguma aho musegemo, n'ogundi aho bĩlambĩryo. 13Nabo mobamũbũlya bati, Mũkalĩ, busana nakĩ ukalira kwehĩ? Naye mwabwirabo ati, Kusangwa batwere Omukama wage, nage sĩnyasĩ aho bamũhĩrĩre. 14Neryo abere abĩbũga atya, mwakeba, mwalangira Yesu inianimeneho, nĩkwa ĩsĩasĩ kw'ali ini Yesu. 15Yesu mwamũbũlya ati, Mũkalĩ, ukalira busana nakĩ kwehĩ? Ukasonda-sondayandi kwehĩ? Naye mwaganĩrya ati yo mũlĩmĩ w'eririma, mwamubwira ati, Mukama, wamabya ini we wamutwere ehandi, unyibwire aho wamũhĩrĩre, nage ngandimutwala. 16Neryo Yesu mwamubwira ati, Marĩa! Naye mwamukebera, mwamubwira omo Kiebranĩa ati, Rabonĩ, kiti, Mũkangĩrĩrya. 17Yesu mwamubwira ati, Sũnyĩtũleko, Kusangwa sindinahetukira ewa Tata. Nĩkwa ugende oko bagala betu ubwirebo uti ngahetukira uku Tata wage, na Tata wenyũ, n'uku Nyamuhanga wage, n'uku Nyamuhanga wenyũ. 18Neryo Marĩa Magdalene mwayabwira abiga ati, Nabirilola oko Mukama. Kandi ati Omukama mwamubwira emyatsi eyĩ. 19Neryo omw'ĩgolo-golo ly'ekiro ekyo, eky'erĩtsũka eyenga, abiga mobahĩndana omo nyũmba n'esyonyũyĩ ĩsĩnakĩngĩre, busana n'eriubaha Abayũda. Neryo Yesu mwasa, mwahangana omo katĩkatĩ kabo. Mwabwirabo ati, Obuholo ũkw'ĩnywe! 20Neryo abere abĩbũga atya, mwakangyabo ebyala biwe, n'olukanga luwe. Neryo abiga mobatsema omugulu balangira Omukama. 21Neryo Yesu mwaswabwirabo ati, Obuholo kw'ĩnywe. Ngoko Tata anyituma, nage ko ngabatuma nyitya. 22Abere abĩbũga atya, mwahumulira kubo ati, Mwangirire Omũlĩmũ Abũyĩrĩre. 23Mwamabuyira ebibi by'abandu, ibyamabibuyirwa kubo; mwamatendibuyira ebibi by'abandu, ibyamabyegekwa kubo. 24Nĩkwa Toma, omuguma g'okw'ĩkũmĩ n'ababiri, oyo wahulawa mo Muhasa, siabya haguma nabo omugulu Yesu ahĩka. 25Neryo abandi biga mobamubwira bati, Twabirilola oko Mukama! Nĩkwa Toma mwabwirabo ati, Namatendilangira engolũ y'emĩsũmalĩ omo byala biwe, n'erĩhĩra omunwe wage g'omo myanya y'emĩsũmalĩ n'erĩhĩra ebyala byage omo lukanga luwe, sindiendĩsyĩkĩrĩrya n'ahake. 26Neryo enyũma w'ebiro munani abiga buwe babya omo nyũmba, na Toma haguma nabo. Neryo esyonyũyĩ ĩsĩnakĩngĩre, Yesu mwasa, mwahangana omo katĩkatĩ kabo, ati, Obuholo ũkw'ĩnywe! 27Neryo mwabwira Toma ati, Leta omunwe wawe, ulangire ebyala byage. Leta ebyala byawe, ũhĩrebyo omo lukanga lwage, subye bũtĩkĩrĩrya, nĩkwa wĩkĩrĩraye! 28Toma mwamũsũbĩrya ati, Omukama wage na Nyamuhanga wage! 29Yesu mwamubwira ati, Wabĩrĩkĩrĩrya kusangwa wabirinyilolako kwehĩ? Obutseme buli oko bakanyĩkĩrĩraya bate banyilolako. 30Yesu mwakola ebindi bitiko-tiko bingi embere sy'abiga buwe, ebĩtasakĩre omo kitabu ekĩ. 31Nĩkwa ebĩ bĩsakĩre imwatoka erĩkĩrĩrya Yesu kw'ali Kristo, Omugala wa Nyamuhanga, neryo omw'ĩkĩrĩrya erĩ imwabana engebe omo lĩna liwe.

will be added

X\