YOANE 19

1Neryo Pilato mwĩmya Yesu mwamũswĩrya omo mikoba. 2N'abasĩrĩkanĩ mobaluka emisakisaki mo mbĩta, mobahĩrayo oko mutwe wuwe, kandi mobamwambalya ekanzu y'omunyama. 3Neryo mobamũhĩkako bati, Wabũkĩre uwe Mwami w'Abayũda! Neryo mobamũswĩrya ebĩkũndĩ by'omo bũsũ. 4Neryo Pilato mwaswahulukira eyĩhya, mwabwira endeko ati, Mũlebaye, ngabaleteraye, imwatoka eriminya ko ndetamubana ko musango. 5Neryo Yesu mwahulukira eyĩhya, inianambite embĩta y'emisakisaki, n'olukimba l'omunyama. Neryo Pilato mwabwirabo ati, Lebaya! Omundu yoyũ! 6Neryo omugulu abahererĩ bakulu n'abateya balola uku Yesu mobabirikira bati, Abambawe oko musalaba! Abambawe oko musalaba! Neryo Pilato mwabwirabo ati, Mũmwĩmaye ĩmwebene, mumubambe oko musalaba. Ĩngye sinditamubana ko musango. 7Abayũda mobamũsũbĩrya bati, Tuwite omugambo owakabũga ati atolere ĩnĩakwa, kusangwa mwayiyira mo Mugala wa Nyamuhanga. 8Omugulu Pilato owa ekĩnywa ekĩ mubaha kutsibu kw'aho. 9Neryo Pilato mwasuba omo kikali ky'omũtabalĩ, mwabũlya Yesu ati, Walũa hahi kwehĩ? Nĩkwa Yesu mwatamũsũbĩrya. 10Neryo Pilato mwabwira Yesu ati, Sĩwendĩbũga nage kwehĩ? Sĩwasĩ ko ndi n'ehamũlĩ y'erikubohola, kandi nyiwite ehamũlĩ y'erikubamba oko musalaba kwehĩ? 11Yesu mwamũsũbĩrya ati, Siwangabya n'ehamũlĩ ũkw'ĩngye utalyahabawayo na Nyamuhanga. Kikaleka omundu oyo wanyihotera uk'uwe iniabya ko musango w'ebibi binene kw'aho. 12Neryo Pilato abere owa ekyo, mwasonda eribohola Yesu. Nĩkwa Abayũda mobatsumira bati, Wamabohola omundu oyũ isuli mwĩra wa Kaĩsarĩ! Omundu oyukayiyira mo mwami iniakalwa na Kaĩsarĩ! 13Neryo Pilato abere abĩowa ebĩnywa ebĩ, mwaleta Yesu y'eyĩhya, neryo mwĩkala oko kĩtũmbĩ ky'omũtswerĩ, ahakahulawa mo Kibuga ky'Amabwe, nĩkwa omo Kĩebranĩa ni Gabata. 14Neryo yabya hakũhĩ na saa sĩta oko kiro ky'erĩkokotya busana n'Ekiro Kikulu ky'Erikiruka. Neryo Pilato mwabwira Abayũda ati, Mũlebaye, omwami wenyũ yoyũ! 15Nabo mobatsumira bati, Ĩtawe! Ĩtawe! Abambawe oko musalaba! Neryo Pilato mwabũlyabo ati, Nyibambe omwami wenyũ y'oko musalaba kwehĩ? Abahererĩ bakulu mobasũbĩrya bati, Situwite mwami nina Kaĩsarĩ ĩyowene. 16Neryo Pilato mwahereryabo Yesu ati abambawe oko musalaba. 17Neryo mobahamba Yesu, naye mwahuluka, inianayihekere omusalaba wuwe, erĩhĩka ahakahulawa mo Aherĩhanga, ahakahulawa omo Kiebranĩa mo Golgota. 18Eyo mobamubamba oko musalaba. Kandi mobabamba abandi bandu babiri kuguma naye oko misalaba, oko lundi luhande muguma, n'oko lundi luhande muguma, na Yesu omo katĩkatĩ kabo. 19Neryo Pilato mwasaka ekĩmĩnyĩsyo, neryo mwahĩrakyo oko musalaba. Kyabya kĩsakĩre kiti, YESU MŨNAZARETĨ, OMWAMI w'ABAYŨDA. 20Neryo Abayũda bangi mobasoma amasako ayo, kusangwa aho Yesu abambirawa habya hakũhĩ n'omũyĩ. Ekĩmĩnyĩsyo ekyo kyasakawa omo Kiebranĩa, n'omo Kiroma, n'omo Kĩgĩrĩkĩ. 21Neryo abahererĩ bakulu b'Abayũda mobabwira Pilato bati, Susake Omwami w'Abayũda, nĩkwa uti, Omundu oyũ mwabũga ati, Ĩngye indi mwami w'Abayũda. 22Pilato mwasũbĩrya ati, Ebyo nabirisaka, inabirisakabyo. 23Neryo abasĩrĩkanĩ babere babibamba Yesu y'oko musalaba, mobaheka esyongimba siwe mobagabasyo mo magabo ani, oko buli mũsĩrĩkanĩ erĩgabo liguma. Kandi mobaheka ekanzu eyalukawa mo lukimba luguma-guma. Ekanzu eyo yabya butsira mulando, ĩyĩlũkĩre luguma-guma erĩtsũka endata n'erĩhĩka omo yosĩ. 24Neryo abasĩrĩkanĩ mobabwirana bati, Situtuleyo, nĩkwa tukange obukanga busana nayo ng'ikandibya yandi, erĩberererya Amasako awakabũga ati, Mobagaba esyongimba syage omo katĩkatĩ kabo, Mobakanga obukanga busana n'ekanzu yage. Neryo abasĩrĩkanĩ mobakola batya. 25Neryo nyĩnya wa Yesu, na mwali wabo nyĩnya, ye Marĩa muka Kleopa, na Marĩa Magdalene, babya bimene hakũhĩ n'omusalaba wa Yesu. 26Neryo Yesu abere alangira koyo wuwe n'omwiga oyo abya anzĩre, inianimene kahũhĩ, mwabwira nyĩnya ati, Mũkalĩ, lebaya, mugala wawe yoyũ! 27Neryo Yesu mwabwira omwiga oyo ati, Lebaya, koyo wawe yoyũ! N'erĩtsũka oko ndambĩ eyo omwiga oyo mwamutwala eka wuwe. 28Neryo enyũma w'aho Yesu ĩnĩanasĩ kw'emyatsi yosĩ yamabihwa, Amasako abererere, mwabũga ati, Nyĩkwĩre enyota. 29Neryo erĩrega lyabyaho eryoswĩre mw'epada. Neryo mobahĩra embũhũma yoswĩre mw'epada, mobahĩrayo oko hĩsopa, mobahĩrayo oko buno buwe. 30Neryo abere abibuga erĩpũlya epada eyo, mwabũga ati, Byamahwa. Neryo mũnamya omutwe wuwe neryo mwataswahumula. 31Neryo Abayũda kusangwa kyabya Kiro ky'Erĩkokotya, mobabũlya Pilato bati amagulu w'abandu abĩtawa abũnangawe, neryo balũsĩbawe oko misalaba. Kusangwa sibabya banzĩre emibiri yabo ĩkasĩgala oko misalaba omo Sabato, kusangwa ekiro ky'eSabato ekyo kyabya kiro kikulu. 32Neryo abasĩrĩkanĩ mobasa, mobabũna emihimbi y'omundu w'erĩmbere, n'emihimbi y'ogundi mundu oyo wabambawa haguma na Yesu. 33Nĩkwa babere bahĩka uku Yesu, mobalebya kw'amabihola, mobatabũna emihimbi yiwe. 34Nĩkwa omuguma g'oko basĩrĩkanĩ mwatsimita omo lukanga luwe mw'erĩtũmo, neryo-neryo omusasi n'amagetsi mobyalũamo. 35Kandi oyo walangira omwatsi oyũ abĩrĩtũlago, n'erĩtũlago liwe ni kwenene. Kandi anasĩ kw'akabũga kwenene, neryo imwatoka erĩkĩrĩrya. 36Kusangwa emyatsi eyĩ moyabya itya, erĩberererya Amasako awakabũga ati, Erĩkũha liwe n'eriguma sĩryendĩsyabũnwa. 37Kandi awandi Masako akabũga ati, Basyalangira oyo batsimita. 38Enyũma w'emyatsi eyĩ Yosefũ w'oko mũyĩ w'eArĩmatea mwayabũlya Pilato y'ehamũlĩ y'eritwala omubiri wa Yesu. Yosefũ oyũ abya mwiga wa Yesu, nĩkwa omo bũbĩso-bĩso, busana n'eriubaha Abayũda. Pilato mwamuha ehamũlĩ, neryo Yosefũ mwasa mwatwala omubiri wuwe. 39Kandi Nĩkodemo naye mwasa oyo watsũka erĩhĩka uku Yesu omo kiro, mwaleta erĩtũlũngana ly'amane-mane n'obukwa, nga kĩlo makũmĩ ani. 40Abandu babiri aba mobĩmya omubiri wa Yesu, mobasengago omo myenda y'ekĩtanĩ haguma n'amanũkato awakakumba ndeke. Eyĩ ye mitsye y'Abayũda y'erita omundu. 41Nĩkwa aho Yesu abambirawa oko musalaba habya eririma. Omw'irima erĩ mwabya eyisinda nyihya-nyihya, eyite yatatabwa mo mundu. 42Neryo busana n'eKiro ky'Erĩkokotya ky'Abayũda, kandi kusangwa eyisinda eyo yabya hakũhĩ naho, mobahĩra Yesu y'omo.

will be added

X\