YOANE 18

1Neryo Yesu abere abisaba ebĩnywa ebĩ, mwahongoka n'abiga buwe, mwasoka omusya w'eKĩdũronĩ. Neryo aho habya eririma, neryo Yesu n'abiga buwe mobingira omw'irima eryo. 2Nĩkwa Yũda nibya oyo wamuhotera, mwaminyaho, kũsangwa Yesu abya ĩnĩakahĩndanaho n'abiga buwe esyongendo nyingi. 3Neryo Yũda mwaya omw'irima eryo n'omulondo w'ekisambala ky'Abaroma ekyo ahabawa, haguma n'abateya abatumawa n'abahererĩ bakulu n'Abafarĩsayo. Kandi mobahĩka ĩbanahekĩre esyotala, n'ebisosomole, n'ebindu by'amalwa. 4Neryo Yesu abya asĩ emyatsi yosĩ eyikandĩmũhĩkako, neryo mwahuluka mwabũlyabo ati, Mukasonda-sondandi kwehĩ? 5Mobamũsũbĩrya bati, Yesu Omũnazaretĩ. Neryo Yesu mwabwirabo ati, Nĩ ĩngye! Neryo Yũda oyo wamuhotera, abya iniahangeneho haguma nabo. 6Neryo Yesu abere abwirabo ati, Nĩ ĩngye, mobasuba enyũma mobawa oko kitaka. 7Kandi Yesu mwabũlyabo ati, Mukasonda-sondandi kwehĩ? Nabo bati, Yesu Omũnazaretĩ. 8Yesu mwasũbĩryabo ati, Nabiribabwira kw'indi nĩ ĩngye. Mwamabya ĩnĩ ĩngye mukasonda-sonda, muleke aba bagende. 9Erĩberererya ekĩnywa ekyo Yesu abũga ati, ukw'abo wamba sĩndĩtatalya n'omuguma. 10Neryo Sĩmonĩ Petero abya n'omũyalĩ omo lubo. Neryo mwakulago, mwabandago omugombe w'Omũhererĩ Mukulu oko bahererĩ bosĩ, mwatwa okũtũ kuwe kw'amali. Erĩna ly'omugombe oyo lyabya Malko. 11Neryo Yesu mwabwira Petero ati, Hĩra omũyalĩ g'omo lubo. Sindiendĩpũlya olũtehĩ lw'amalĩge olo Tata abirimba kwehĩ? 12Neryo omulondo w'ekisambala ky'Abaroma, n'omukulu wabo n'abateya b'Abayũda, mobahamba Yesu mobamuboha. 13Neryo mobamutwala erĩmbere uku Ana, kusangwa abya ĩsebyala wa Kayafa, oyo wabya Mũhererĩ Mukulu oko bahererĩ bosĩ oko mwaka oyo. 14Nĩkwa Kayafa abya oyo wahana Abayũda ati, Lyowene omundu muguma iniahola busana n'abandu bosĩ. 15Neryo Sĩmonĩ Petero, n'ogundi mwiga mobakwama Yesu. Neryo ogundi mwiga oyo abya asĩbwe n'Omũhererĩ Mukulu oko bahererĩ bosĩ, neryo mwingira haguma na Yesu omo kibuga ky'Omũhererĩ Mukulu oko bahererĩ bosĩ. 16Nĩkwa Petero mwimana oko lũkyo ahĩhya. Nĩkwa ogundi mwiga oyo wabya asĩbwe n'Omũhererĩ Mukulu oko bosĩ, mwahulukira eyĩhya, mwakanĩa n'omũteya w'olũyĩ, neryo mwĩngĩrya Petero. 17Neryo omwana-muto mugombe oyo wategaya olũkyo, mwabũga na Petero ati, Suli muguma g'oko biga b'omundu oyũ kwehĩ? Petero mwasũbĩrya ati, Sĩ ĩngye! 18Neryo habya eritsuku, n'abagombe n'abateya mobakya omuliro w'amakala, neryo babya bimeneho bakota kugo. Petero naye mwayaho, mwimanaho, mota oko muliro. 19Neryo Omũhererĩ Mukulu oko bahererĩ bosĩ mwabũlya Yesu busana n'abiga buwe, kandi mwamũbũlya busana n'erĩkangĩrĩrya liwe. 20Yesũ mwamũsũbĩrya ati, Nabĩrĩbũga embere sy'abandu n'eriminyikala ndeke. Ebiro byosĩ monakangĩrĩrya omo manyũmba w'erĩhĩndanamo n'omo Hekalũ aho Abayũda bakahĩndana. Mondabũga kĩnywa ky'obũbĩso-bĩso. 21Ũkanyĩbũlaya busana nakĩ kwehĩ? Ũbũlaye abandu abahulikirira ebyo nabwirabo. Lebaya, aba banasĩ ebyo nabũga. 22Neryo Yesu abere abĩbũga ebĩ, omuguma g'oko balembya oyo wabya imeneho hakũhĩ, mwaswĩrya Yesu ekĩkũndĩ ati, Ũkasũbĩraya Omũhererĩ Mukulu oko bahererĩ bosĩ y'utya uti kwehĩ? 23Yesu mwamũsũbĩrya ati, Namabya ngabũga nabi, wahule ebibi ebyo. Nĩkwa namabũga kwenene, ũkanyĩswĩrĩrayakĩ kwehĩ? 24Neryo Ana mwatuma Yesu ĩnĩanabohĩre, uku Kayafa, Omũhererĩ Mukulu oko bahererĩ bosĩ. 25Neryo Sĩmonĩ Petero abya imene akota oko muliro, Neryo abandi mobamubwira bati, Nawe suli muguma g'oko biga buwe kwehĩ? Petero mwagana ati, Sĩ ĩngye. 26Neryo omuguma g'oko bagombe b'Omũbererĩ Mukulu oko bahererĩ bosĩ, ĩnĩ w'ekĩtũnga ky'oyo Petero atwa kw'okũtũ, mwamũbũlya ati, Mondakulolako omw'irima haguma naye kwehĩ? 27Neryo Petero mwagana kandi. Neryo-neryo engoko-lume moyabika. 28Neryo mobalũsya Yesu ewa Kayafa, mobamutwala omo kikali ky'omũtabalĩ Pilato. Nĩkwa bwabya ngyakya-ngyakya. Neryo Abayũda mobataya omo kikali kya Pilato bati sĩbahalaye omo Migambo, batoke erirya oko Biro Bikulu by'Erikiruka. 29Neryo Pilato mwahulukirabo eyĩhya, mwabũlyabo ati, Omũndu oyũ, mukamuhandikirira ũkũkĩ kwehĩ? 30Mobamũsũbĩrya bati, Omundu oyũ atalwe mukola-nabi nga sitwetamuleta uk'uwe. 31Pilato mwabwirabo ati, Mũmwĩmaye ĩmwebene, mumutswere omo migambo yenyũ. Abayũda mobamũbwira bati, Situwite hamũlĩy'erĩĩta omundu n'omuguma. 32Mobyabya bitya erĩberererya ekinywa ekyo Yesu abũga akamĩnyĩsya omũsĩndo w'oluholo akandisyahola. 33Neryo Pilato mwasuba omo kikali ky'omũtabalĩ, mwabirikira Yesu, mwamũbũlya ati, Uli mwami w'Abayũda kwehĩ? 34Yesu mwamũsũbĩrya ati, Ni iwe ũkaganĩraya uwowene, kutse ni bandi bakubwira busana nage kwehĩ? 35Pilato mwasũbĩrya ati, Ĩngye indi Mũyũda kwehĩ? Ekihanda kyawe n'abahererĩ bakulu bo bakuleta ũkw'ĩngye; wamakolakĩ kwehĩ? 36Yesu mwasũbĩrya ati, Obwami bwage si bw'ekihugo kino. Kumbe obwami bwage bũlwe bw'ekihugo kino, kumbe abagombe bage bangalwa isinangahoterwa n'Abayũda. Nĩkwa obwami bwage si bw'eno. 37Neryo Pilato mwabũga ati, Uli mwami kwehĩ? Yesu mwamũsũbĩrya ati, Ũkabũga ko ndi mwami. Busana n'ekĩ nabutawa kandi nabĩrĩhĩka omo kihugo busana n'ekĩ, erĩtũla omwatsi w'ekwenene. Obuli mundu w'omwatsi w'ekwenene akowa omulenge wage. 38Pilato mwabũlya Yesu ati, Omwatsi w'ekwenene nĩkĩ kwehĩ? Pilato abere abũga atya, mwahulukira eyĩhya ahali Abayũda, mwabwirabo ati, Ĩngye sinditamubana ko musango. 39Nĩkwa ĩnywe muwite omutsye w'eribaboholera omundu muguma omo Biro Bikulu by'Erikiruka. Neryo mwanzĩre inababoholera Omwami w'Abayũda kwehĩ? 40Nabo mobabirikira kutsibu kandi bati, Butsira omundu oyũ, twanzĩre Baraba. Nĩkwa Baraba abya mũnyeyĩ.

will be added

X\