YOANE 16

1Nabiribabwira emyatsi eyĩ, neryo simwangahũka-hũkya emitima yenyũ. 2Basyabahiga-hĩganĩa omo manyũmba wabo w'erĩhĩndanamo. Kandi omugulu asyasa, neryo oyukabĩta asyaganĩrya ng'akakola omũbĩrĩ wa Nyamũhanga. 3Basyakola emyatsi eyĩ, kusangwa sibetaminya Tata kutse ĩngye. 4Nĩkwa nabiribabwira emyatsi eyĩ, neryo omugulu endambĩ yabo yasyahĩka, imwatoka erĩyĩbũkyayo ngoko nababwira. Mondababwira emyatsi eyĩ erĩmbere kusangwa nabya haguma nenyũ. 5Nĩkwa lino ngaya ukw'oyo wanyituma; kandi sihali mundu ũkw ĩnywe oyũkambũlaya ati, Ukaya hahi kwehĩ? 6Nĩkwa kusangwa nabiribabwira emyatsi eyĩ, emitima yenyũ ĩkũsũla n'obũlĩge. 7Ngababwira omwatsi w'ekwenene nyiti, Lyowene busana nenyũ inagenda, kusangwa namatendigenda, Omũwatĩkya isiendisyabahĩkako. Nĩkwa namagenda nasyabatumiraye. 8Naye asyabya asa, asyasĩnga ekihugo busana n'ebibi, kandi busana n'omwatsi w'ebitunganene, kandi busana n'omwatsi w'eritswera lya Nyamuhanga. 9Asyasĩngabo omo mwatsi w'ebibi, kusangwa sĩbalĩnyĩkĩrĩraya. 10Kandi asyasĩngakyo busana n'eritunganene, kusangwa ngaya uku Tata, nenyũ imutaswanyilolako. 11Kandi asyasĩngabo omo mwatsi w'eritswera, kusangwa omũtabalĩ w'ekihugo kino abiritswerwa. 12Ĩngye nyiwite eyindi myatsi mingi y'eribabwira, nĩkwa simwangatoka erĩowayo lino. 13Nĩkwa omugulu Omũlĩmũ w'omwatsi w'ekwenene asyasa, iye asyabasondola omo myatsi yosĩ y'ekwenene, kusangwa siendĩsyabũga omo hamũlĩ yiwe ĩyowene, nĩkwa asyababwira ebyo akowa, kandi' asyabatũiĩra emyatsi eyo eyĩkandĩsyahĩka. 14Asyanyĩpipa, kũsangwa asyimya emyatsi eyo ngabũga n'erĩbatũlĩrayo 15Emyatsi. yosĩ eyo Tata awite ni yage, kyaleka ĩnabũga nyiti, Asyĩmya emyatsi eyo ngabũga, n'erĩbatũlĩrayo. 16Hakĩsĩya katambĩ kake, neryo imutaswanyilolako; kandi enyũma w'aho hake, imwasyanyilolako. 17Abandi b'oko biga buwe mobabwirana bati, Ekĩ ni kyahi? Ekyo akatubwira ati, Hakisĩya katambĩ kake imũtaswanyilolako; kandi enyũma w'aho hake, imwaswanyilolako. Kandi ati, Kusangwa ngaya uku Tata. 18Neryo babya bakabũga bati, Ekĩ ni kyahi akabũga ati, Akatambĩ kake kwehĩ? Sĩtwasĩ ebyo akahula. 19Yesu mwaminya ko bakasonda erĩmũbũlya, neryo mwabwirabo ati, Mongabũga nyiti, Hakĩsĩya katambĩ kake, imutaswanyilolako, kandi enyũma w'aho hake, imwasyanyilolako. Ebyo byo mũkabũlaya omo katĩkatĩ kenyũ kwehĩ? 20Kwenene, kwenene ngabũga nenyũ nyiti, Mwasyalira n'erilaka, nĩkwa ekihugo kyasyatsema. Mwasyabya n'obũlĩge, nĩkwa obũlĩge bwenyũ bwasyahinduka mo butseme. 21Omũkalĩ omugulu akakunda ali n'obũlĩge kusangwa endambĩ yiwe yabĩrĩhĩka; nĩkwa omugulu amabibuta omwana, sialisyibuka kandi eriagalwa liwe, nĩkwa akatsema ati, Omwana amabibutwa omo kihugo. 22Neryo nenyũ nibya muli n'obũlĩge lino: nĩkwa nasyaswabalolako kandi, n'emitima yenyũ yasyatsema, kandi sihali mundu oyo wasyabasagula obutseme bwenyũ. 23Neryo oko kiro ekyo sĩmwendĩsyanyĩbũlyakĩ. Kwenene, kwenene ngababwira, Ekĩndũkĩ mwasyabũlya Tata, asyabahakyo kusangwa muli biga bage. 24Erĩhĩka lino, sĩmwetabũlyakĩ omo lĩna lyage; mũbũlaye, neryo mwasyabanakyo, obutseme bwenyũ butoke erĩhĩkana. 25Nabiribabwira emyatsi eyĩ omo mĩsyo. Omugulu asyasa neryo sindiendisyababwira umu mĩsyo, nĩkwa nasyababwira ndeke-ndeke emyatsĩ ya Tata. 26Oko kiro ekyo, mwasyabũlya omo lĩna lyage; sĩndĩbũga nenyũ nyiti, Nasyabũlya Tata busana nenyũ; 27kusangwaye Tata abanzĩre. Abanzĩre kusangwa mũnyanzĩre, kandi kusangwa mwabĩrĩkĩrĩrya ko nalũa ewa Nyamuhanga. 28Nalũa uku Tata, kandi monahĩka omo kihugo; neryo ngalũa omo kihugo n'eriya uku Tata. 29Neryo abiga buwe mobamubwira bati, Lero, ũkabũga netu ndeke-ndeke, sũlĩbũga omo mĩsyo. 30Lino tũnasĩ ko wasĩ emyatsi yosĩ, kandi, suli n'obwaga omundu akakũbũlya mwatsi. Ekĩ kikaleka ĩtwĩkĩrĩrya ko walũa uku Nyamuhanga. 31Yesu mwasũbĩryabo ati, Mwamĩkĩrĩrya lino kwehĩ? 32Lebaya, endambĩ yasyasa, kandi endambĩ eyo yabĩrĩhĩka, omugulu mwasyapanza-panzirwa obuli mundu eka wuwe mwasyanyĩsĩga ĩngyowene. Nĩkwa sindi ĩngyowene, kusangwa Tata ali haguma nage. 33Namababwira emyatsi eyĩ imwabana obuholo busana n'erĩmatikana nage. Omo kihugo mwasyabana erĩendererĩbwa. Nĩkwa muhande emitima! Nabĩrĩkĩnda ekihugo!

will be added

X\