YOANE 15

1Ĩngye indi mũlĩkĩrĩkĩ w'ebĩnyũ w'ekwenene, kandi Tata wage nĩ mũlĩmĩrĩ. 2Obuli mutahi owamatikene nage, owateheta kw'ebĩgũma, akatwago; kandi oko buli mutahi owakahetaya ebĩgũma, akasara kugo kw'ebĩtowene, omutahi oyo atoke eriheta kw'ebindi bĩgũma. 3Mwabiriera busana n'ekĩnywa ekyo nabiribabwira 4Mumatikane kwĩngye, nage ngandimatikana kwĩnywe. Ngoko omutahi sialĩhetaya ebĩgũma ĩgowene, amatendimatikana n'endĩna y'ebĩnyũ, litya nenyũ simwangatoka erireta endũndĩ uku Nyamuhanga mutamatikene ũkw'mgye. 5Ĩngye indi ndĩna y'ebĩnyũ, nenyũ muli mitahi. Oyumatikene nage, nage nyimatikene naye, yo yukayira endũndĩ nene busana na Nyamuhanga. Kusangwa mutamatikene nage simwangatoka erikolakĩ. 6Omundu amatindamatikana nage, akagusawa eyĩhya ng'omutahi, iniuma, Emitahi ng'eyĩ ikakumirawa haguma, iyaguswa omo muliro iyahya. 7Mwamamatikana kwĩngye, n'ebĩnywa byage bĩkĩkala omo mitima yenyũ, mũbũlaye ekĩndũkĩ ekyo mwanzĩre, neryo mwasyakolerwakyo. 8Mwamayira endũndĩ nene, Tata wage akasĩkĩbawa busana n'ekyo, kandi mũkakangaya ko muli biga bage. 9Nabiribanza ngoko Tata abirinyanza. Mwĩkale omo lwanzo lwage. 10Mwamakenga ebihano byage, mwasyĩkala omo lwanzo lwage, ngoko nage nabirikenga ebihano bya Tata wage, neryo nyĩkere omo lwanzo luwe. 11Nabiribabwira emyatsi eyĩ, obutseme bwage bubye omo mitima yenyũ, kandi obutseme bwenyũ bũhĩkane. 12Ekihano kyage kiti: mwanzane, ngoko nabiribanza. 13Sihali mundu oyuwite olwanzo lũlengĩre olũ, ati omundu akasiga engebe yiwe busana n'abĩra buwe. 14Nenyũ muli bĩra bage, mwamakola ebyo ngabahana. 15Sindibahula kandi mo bagombe kusangwa omugombe sialiminya ebyo mukama wuwe akakola. Nĩkwa ngabahula mo bĩra, kusangwa nabĩrĩbamĩnyĩsya emyatsi yosĩ eyo ngowa uku Tata wage. 16Simwetayisoga ngye, nĩkwa nayisoga nywe, kandi nabĩrĩbahĩra eriyatunda endũndĩ, kandi endũndĩ yenyũ iyatoka eribyaho. Neryo Tata asyabaha ekĩndũkĩ ekyo mũkabũlaya omo lĩna lyage. 17Neryo ngabahana nyiti, Mwanzane. 18Ekihugo kyamabakwa obusu, muminye ko kyanyĩkwa obusu embere w'erĩbakwabo. 19Nga muli b'ekihugo, kũmbe ekihugo kyangabanzĩre ng'abakyo. Nĩkwa nayisoga nywe omo kihugo kino, kandi simuli bakyo; kikaleka ekihugo ĩkyabakwa obusu. 20Mwibuke ekĩnywa ekyo nababwira nyiti, Omugombe sialengĩre omukama wuwe. Bamabya babĩrĩnyendererya, nenyũ basyabendererya nibya; bamabya bakengĩre ekĩnywa kyage, basyakenga n'ekyenyũ nibya. 21Nĩkwa basyabakola emyatsi yosĩ eyĩ kusangwa muli bandu bage, kusangwa sĩbasĩ oyo wanyituma. 22Kumbe nyitasa n'erĩbũga nabo, nga sibawite olubanza lw'ebibi, nĩkwa lino sibawite eriyigana ebibi byabo. 23Oyũkanyĩkwa obusu, akakwa Tata wage y'obusu. 24Kumbe sinditakola emĩbĩrĩ omo katĩkatĩ kabo eyitakolawa n'ogundi mundu, sibangabya n'olubanza lw'ebibi; nĩkwa lino babirinyilolako, kandi babĩrĩnyĩkwa obusu, ĩngye na Tata wage nibya. 25Nĩkwa babirikola ekĩ, ekĩnywa kibererere ekyasakawa omo Migambo yabo, iti, Banyĩkwa obusu butsira ekikaleka. 26Omugulu Omũwatĩkya asyasa, oyo nasyatuma akalũa ewa Tata, Omũlĩmũ w'omwatsi w'ekwenene, oyũkalũa uku Tata, akandĩsyatũla omwatsi wage. 27Nenyũ nibya, mwasyatũla omwatsi wage, kusangwa mwabiribya haguma nage erĩtsũka erĩmbere.

will be added

X\