YOANE 14

1Sĩmũhanga-hangaye emitima yenyũ; mwĩkĩrĩraye Nyamuhanga, nage mũnyĩkĩrĩraye. 2Omo nyũmba ya Tata muli byumba bingi by'erĩĩkalamo. Ngayakokotaya aho wenyũ, kumbe si kwenene, kumbe nabiribabwira. 3Kandi namayakokotya aho wenyũ, nasyaswasa, n'eribatwala ewage; neryo imwatoka eribya aho nyiri. 4Kandi mũnasĩ enzira y'eriya eyo ngaya. 5Toma mwamubwira ati, Mukama, sĩtwasĩ eyo ukaya, twasyaminya enzira yo tuti kwehĩ? 6Yesu mwamubwira ati, Ĩngye indĩ nzira, ĩngye indi mwatsi w'ekwenene, ĩngye indi ngebe; sihali mundu ũkahĩka uku Tata ate kwĩngye. 7Kumbe mwabya mũnyasĩ, nga mwabiriminya Tata wage nibya. N'erĩtsũka lino mũmwasĩ, kandi mwabirimulolako. 8Fĩlĩpo mwamubwira ati, Mukama, ũtũkangaye Tata, ekyo kyasyatutolera. 9Yesu mwamubwira ati, Nabiribya nenyũ omugulu ungaha, nĩkwa sulitanyiminya kwehĩ Fĩlĩpo? Oyo wamanyilangira iniabirilangira Tata. Busana nakĩ ũkabũga uti, Ũtũkangaye Tara kwehĩ? 10Fĩlĩpo, sũlĩkĩrĩraya ko nyimatikene na Tata, na Tata kw'amatikene ũkw'ĩngye kwehĩ? Ebĩnywa ngababwira sĩndĩbũgabyo omw'iyihana lyage. Nĩkwa Tata oyumatikene nage akakola emĩbĩrĩ yiwe. 11Mũnyĩkĩrĩraye ko nyimatikene na Tata, na Tata amatikene ũkw'ĩngye. Kutse mwĩkĩrĩraye busana n'emĩbĩrĩ ĩyoyene. 12Kwenene, kwenene ngababwira, oyũkanyĩkĩrĩraya, emĩbĩrĩ eyo ngakola, asyakolayo nibya; kandi asyakola emĩbĩrĩ eyĩrengĩre eyĩ, kusangwa ngaya uku Tata. 13Kandi nasyakola obuli mwatsi ogo mwasyabũlya omo lĩna lyage, Tata apipawe umu Mugala. 14Emyatsi yosĩ mũkabũlaya omo lĩna lyage, nasyakolayo. 15Mwamanyanza, mwasyakenga ebihano byage. 16Kandi nasyabũlya Tata, naye asyabaha ogundi Mũwatĩkya, Omũlĩmũ w'omwatsi w'ekwenene iniabya haguma nenyũ kera na kera. 17Ekihugo sikiritoka erĩmũkokya, kusangwa sikyemulolako, kutse erimuminya. Nĩkwa inywe mũmwasĩ, kusangwa ĩkere nenyũ, kandi amatikene nenyũ. 18Sindiendĩsyabasĩga nga ngũbĩ; nasyaswasa ũkw'ĩnywe. 19Enyũma w'akatambĩ kake ekihugo sikyendisyaswanyĩlolako, nĩkwa ĩnywe mwasyanyilolako; kusangwa nyiriho, nenyũ mwasyabyaho nibya. 20Oko kiro ekyo mwasyaminya ko nyimatikene uku Tata wage, nenyũ mumatikene ũkw'ĩngye nage nyimatikene ũkw'ĩnywe. 21Oyuwite ebihano byage, n'erikengabyo, yo yukanyanza; kandi Tata wage asyanza oyukanyanza; nage nasyamwanza, nasyayĩkangya ukw'iye. 22Yũda, oyute Ĩskarĩota, mwamũbũlya ati, Mukama, byamabya biti kwehĩ? uti, wasyayĩkangya ũkw'ĩtwe, ũteyĩkangaya oko kihugo kwehĩ? 23Yesu mwamũsũbĩrya ati, Omundu amanyanza asyakenga ekĩnywa kyage. Kandi Tata wage asyamwanza netu twasyamũhĩkako, ĩtwakokotya obwĩkalo bwetu haguma naye. 24Oyũtanyanzĩre sialikenga ebĩnywa byage. Kandi ekĩnywa ekyo mũkowa si kyage, nĩkwa ni kya Tata oyo wanyituma. 25Nabiribabwira emyatsi eyĩ omugulu nyikine haguma nenyũ. 26Nĩkwa Omũwatĩkya, Omũlĩmũ Abũyĩrĩre, oyo Tata asyatuma omo lĩna lyage, iye akandisyabakangĩrĩrya emyatsi yosĩ, kandi asyabĩbũkya emyatsi yosĩ eyo nababwira. 27Obuholo ngabasĩgĩra, ngabaha obuholo bwage. Ngabahabo, butsira ng'ekihugo ko kikaha. Sĩmũhanga-hangaye emitima yenyũ, kandi simubahe. 28Momowa ngababwira nyiti, Ngagenda, kandi nasyaswasa ũkw'ĩnywe. Kumbe mũlwe mũnyanzĩre, nga mwabiritsema, kusangwa ngaya uku Tata; kusangwa andengĩre. 29Lino nabiribabwira ebĩ bite byahĩka, neryo omugulu byasyahĩka, imwatoka erĩkĩrĩrya. 30Sindiendĩsyabũga nenyũ kandi bingi, kusangwa omũtabalĩ w'ekihugo akahĩka, kandi siawite ehamũlĩ ũkw'ĩngye. 31Ngoko Tata anyihana, ko ngakola nyitya, ekihugo kitoke eriminya ko nyanzĩre Tata. Muhangane tũlũe hano.

will be added

X\