YOANE 13

1Nĩkwa embere w'Ebiro Bikulu by'Erikiruka, Yesu mwaminya kw'endambĩ yiwe yamabĩhĩka ey'erĩlũa omo kihugo kino, n'eriya eyiri Ise. Abya iniabirianza abuwe ababya omo kihugo, kandi mwanzabo erĩhĩka oko ndũlĩ. 2Neryo babere bakalya omw'ĩgolo-golo, Satanĩ yabya ĩyabĩrĩhĩra omo mutima wa Yũda Iskarĩota mugala wa Sĩmonĩ erihotera Yesu. 3Kandi Yesu abya asĩ kw'Ĩse abĩrĩhĩra emyatsi yosĩ y'omo hamũlĩ yiwe. Kandi abya asĩ kw'alũa ewa Nyamuhanga iniakasyaya ewa Nyamuhanga. 4Neryo Yesu mwahangana aho balira. Neryo mwambula olundi lukimba, neryo mwĩmya ekĩsangũlĩryo, neryo mwayihangakyo. 5NeryoYesu mũta amagetsi okw'ĩtũba, neryo mwatsũka erĩnabya ebisando by'abiga, n'erisangulabyo omo kĩsangũlĩryo ekyo abya ayĩhangĩre. 6Neryo mwahĩka uku Sĩmonĩ Petero. Naye mwamubwira ati, Mukama, ũkanabaya ebisando byage kwehĩ? 7Yesu mwamũsũbĩrya ati, Ekyo ngakola sĩwasĩkyo lino, nĩkwa wasyaminyakyo enyũma. 8Petero mwamubwira ati, Siwendĩsyanabya ebisando byage na kera. Yesu mwamũsũbĩrya ati, Namatendĩnabya ebisando byawe, isuli n'obusangi haguma nage. 9Sĩmonĩ Petero mwamubwira ati, Mukama, sũnabaye ebisando byage, ĩbyobyene! Nĩkwa ũnabaye ebyala byage n'omutwe wage nibya! 10Yesu mwamubwira ati, Oyo wabirinaba erĩre, nĩkwa atolere erinaba oko bisando biwe bisa. Nenyũ mwerĩre, nĩkwa butsira ĩnywe bosĩ. 11Kusangwa Yesu abya asĩ oyukandisyamuhotera. Kyaleka ĩnĩabũga ati, Sĩmwerĩre ĩnywe bosĩ. 12Neryo abere abĩnabya ebisando byabo, neryo mwaswĩkala oko mesa. Neryo mwabũlyabo ati, Mwanamaminya ekyo ngabibakolera kwehĩ? 13Mukanyahula mo Mũkangĩrĩrya n'Omukama, mũkabũga ndeke, kusangwa ĩngye ko nyine nyitya. 14Ĩngye indi Mukama n'Omũkangĩrĩrya, neryo nabĩrĩbanabya oko bisando byenyũ. Nenyũ mutolere ĩmwanabanĩa oko bisando byenyũ. 15Kusangwa nabiribaha ekĩmĩnyĩsyo, imwakola ngoko nabiribakolera. 16Kwenene, kwenene ngabũga nenyũ, omugombe sialengĩre omukama wuwe, n'omukwenda sialengĩre oyuliamutuma. 17Mwamaminya emyatsi eyĩ, muli n'obutseme mwamakolayo. 18Sindibahula ĩnywe bosĩ. Nyĩnasĩ abo nayisoga. Nĩkwa ni busana n'erĩberererya Amasako, awakabũga ati, Oyukalya akalyo kage, abĩrĩnyĩlolya k'omugongo. 19Ngababwira lino, ebĩ bite byahĩka, neryo ekiro byasyahĩka, imwatoka erĩkĩrĩrya ĩngye kw'indi ye. 20Kwenene, kwenene ngababwira, oyũkakokaya omundu oyo ngatuma, iniakanyĩkokaya; n'oyũkanyĩkokaya, akakokaya oyo wanyituma. 21Neryo Yesu abere abĩbũga ebĩ, mwasũsũmana omo mutima mwatũlago ati, Kwenene, kwenene ngababwira nyiti, Omuguma w'ũkw'ĩnywe asyanyihotera. 22Abiga mobasamalirana ĩsĩbasĩ ng'akahulandi. 23Omuguma g'oko biga oyo Yesu abya anzĩre mwabya akegemera oko kĩkũba kya Yesu. 24Neryo Sĩmonĩ Petero mwamũkoherya ati, Utubwire ng'akahulandi. 25Naye, kusangwa abya akegemera oko kĩkũba kya Yesu, mwamũbũlya ati, Mukama, nindi kwehĩ? 26Yesu mwamũsũbĩrya ati, Yoyo ngandĩkolerya ekitole ky'omo kibindi n'erimuhakyo. Neryo Yesu mwakolerya ekitole ky'omo kibindi mwahakyo Yũda, omugala wa Ĩskarĩota. 27Neryo Yũda abere abĩmya ekitole ekyo, Satanĩ mwingira omwisi wuwe. Yesu mwamubwira ati, Ekyo ukandikola, ukolekyo lũba. 28Nĩkwa sihabya mundu oko mesa oyo waminya nga ni mwatsi wahi aleka Yesu iniamubwira atya. 29Abandi baganĩraya bati kusangwa Yũda abya n'engunza y'esyofranka, Yesu mwamubwira ati, agule ebindu ebitutolere busana n'eBiro Bikulu; kutse ahe ekindu oko bera. 30Neryo Yũda abere abĩĩmya ekitole ekyo, mwahuluka lũba. Kandi ibwamabihumbera. 31Neryo omugulu Yũda ahuluka, Yesu mwabũga ati, Lino Omugala w'Omundu amabana olukengerwa, kandi Nyamuhanga amabana olukengerwa omwisi wuwe. 32Neryo Nyamuhanga amabana olukengerwa omwisi wuwe, Nyamuhanga ĩyowene asyabanira Omugala w'Omundu y'olukengerwa. Kandi asyamubanira olukengerwa neryo-neryo. 33Abana balere, indi haguma nenyũ katambĩ kake. Mwasyanyisonda-sonda, neryo ngoko nabwira Abayũda, nenyũ ngababwira nyiti, Eyo ngaya simwangatoka erĩhĩkayo. 34Ngabaha ekihano kihya-kihya nyiti, Mwanzane. Ngoko nabiribanza, nenyũ mwanzane mutya. 35Neryo mwamabya n'olwanzo, omuguma busana n'ogundi, abandu bosĩ basyaminya ko muli biga bage. 36Sĩmonĩ Petero mwabũlya Yesu ati, Mukama, ukayahi kwehĩ? Yesu mwamũsũbĩrya ati, Eyo ngaya siwangatoka erinyikwama lino; nĩkwa wasyanyikwama bolo. 37Petero mwamũbũlya ati, Mukama, busana nakĩ sinangatoka erikukwama lino-lino kwehĩ? Nasyasiga engebe yage busana nawe. 38Yesu mwamũsũbĩrya ati, Wasyasiga engebe yawe busana nage kwehĩ? Kwenene, kwenene ngabũga nawe, engoko-lume siyendibika utewanyigana ngendo ĩsatu.

will be added

X\