YOANE 12

1Neryo ebiro ndatu embere w'Ebiro Bikulu by'Erikiruka, Yesu mwahĩka eBetanĩa, aho Lazaro abya, oyo Yesu alũbũkaya oko baholĩ. 2Eyo mobamũhũkĩra ebyalya by'obũgenĩ. Marata abya akahũkũla, nĩkwa Lazaro abya ukw'abo babya oko mesa haguma na Yesu. 3Neryo Marĩa mwĩmya ekihande ky'elĩtre ky'amagũta w'enardo awakakumba ndeke kutsibu aw'obũgũlĩ bunene, mwahakabya ebisando bya Yesu, kandi mwasangula ebisando biwe omo nzwiri siwe, n'enyũmba yosĩ moyũsũla mw'ekikumbo kibuya ky'amagũta ayo. 4Nĩkwa Yũda Ĩskarĩota, omuguma g'oko biga buwe, oyo wahotera Yesu, mwabũga ati, 5Busana nakĩ amagũta aya sialitagũlĩbwa busana n'esyofranka magana asatu, isyahabwa oko bera kwehĩ? 6Nĩkwa Yũda abũga atya butsira erĩbũga ati atsomene abera, nĩkwa kusangwa abya mũrahĩ. Yũda abya akaheka engunza ĩnĩakĩba esyahĩrawa muyo. 7Neryo Yesu mwabũga ati, Mumuleke! Abikego busana n'ekiro nasyatabwa! 8Kusangwa muli n'abera haguma nenyũ ebiro byosĩ, nĩkwa ĩngye sindi haguma nenyũ ebiro byosĩ. 9Neryo endeko nene y'Abayũda mobowa Yesu kw'ali eBetanĩa. Neryo mobasa, butsira busana na Yesu ĩyowene, nĩkwa batoke erilangira Lazaro nibya, oyo Yesu alũbũkaya oko baholĩ. 10Nĩkwa abahererĩ bakulu mobaya embĩta y'erĩĩta Lazaro nibya. 11Kusangwa busana na Lazaro Abayũda bangi mobalũa kubo mobĩkĩrĩrya Yesu. 12Engyakya endeko nene eyahĩka oko Biro Bikulu ebyo, omugulu bowa ambu Yesu akandĩhĩka eYerũsalema, 13Mobatwa oko bisanza by'amabondo, mobayahĩndana naye, n'eribirikira bati, Nyamuhanga apipawe! Nyamuhanga atsumule oyukasa omo lĩna ly'Omwami Mukulu, iye yo Mwami wa Ĩsraelĩ. 14Neryo Yesu mwabana ekyana ky'epunda, mwĩkala kukyo, ngoko kĩsakĩre kiti, 15Uwe Mwali w'eSĩonĩ, sigubahe! Lebaya, omwami wawe akasa, Ĩnĩanĩkere oko kyana ky'epunda. 16Abiga biwe mobataminya emyatsi eyĩ erĩmbere, nĩkwa omugulu Yesu ahabawa olukengerwa, mobibuka ngoko emyatsi eyĩ yasakawa busana naye, kandi ngoko bamukolera emyatsi eyĩ. 17Neryo endeko eyabya haguma na Yesu omugulu abirikira Lazaro omw'isinda n'erĩmũlũbũkya oko baholĩ, moyatũla omwatsi oyo busana naye. 18Kyaleka endeko eyo ĩyahĩndana na Yesu, kusangwa bowa kw'akola ekitiko-tiko ekĩ. 19Neryo Abafarĩsayo mobabwirana bati, Mwamalangira, sitwetatokakĩ! Mũlebaye, ekihugo kyosĩ kyamamukwama! 20Neryo habya Abagĩrĩkĩ omo katĩkatĩ kabo abahetukira eYerũsalema erĩyaramya omo Biro Bikulu ebyo. 21Aba mobahĩka uku Fĩlĩpo, oyo wabya w'eBetesaĩda y'eGalĩlaya. Mobamũbũlya bati, Mukama, twanzĩre erilola uku Yesu. 22Fĩlĩpo mwayabwira Anderea, neryo Anderea na Fĩlĩpo mobabwira Yesu. 23Neryo Yesu mwasũbĩryabo ati, Endambĩ yabĩrĩhĩka, Omugala w'Omundu ahabawe olukengerwa. 24Kwenene, kwenene ngababwira, embuto y'engano yamatenditogera omo kitaka, n'erihola, ikabyaho ĩyoyene; nĩkwa yamahola, ikaheta kw'esyombuto nyingi. 25Oyukanza engebe yiwe akatalayayo; n'oyũkakwa engebe yiwe y'obusu omo kihugo kino, asyabikayo oko ngebe y'erikota. 26Omundu amanyikolera, anyikwame, n'aho nyiri ha n'aho omugombe wage asyabya. Omundu amanyikolera, Tata asyamũsĩkya. 27Na lino omutima wage amahũka-hũka; neryo nyĩbũgekĩ kwehĩ? Nyiti, Tata ũnyĩlamaye oko ndambĩ eyĩ kwehĩ? Nĩkwa busana n'omwatsi oyũ namahĩka oko ndambĩ eyĩ. 28Uwe Tata, ulete olukengerwa oko lĩna lyawe! Neryo omulenge mwalũa elubula ati, Nabĩrĩhamyalyo, kandi nasyaswahamyalyo. 29Neryo endeko eyabya ihangene hakũhĩ n'erĩowa omulenge oyo, mobabũga bati, Bwamalũma! Abandi bati, Omũlaĩka amabũga naye! 30Yesu mwasũbĩrya, ati, Omulenge oyũ sĩalĩtabũga busana nage, nĩkwa busana nenyũ. 31Lino eritswera lyamahĩka oko kihugo kino; lino omũtabalĩ w'ekihugo kino asyaguswa eyĩhya. 32Nage, namasumbirwa endata oko kihugo, nasyakurira abandu bosĩ b'ũkw'ĩngye. 33Nĩkwa abũga ebĩ iniakahula omũsĩndo w'oluholo olo asyahola. 34Neryo endeko moyamũsũbĩrya iti, Twabĩrĩowa omo Migambo iti Kristo ayĩkala kera na kera. Neryo ũkabũga uti kwehĩ? Uti, Omugala w'Omundu atolere iniasumbirwa endata. Omugala w'Omundu oyũ nindi kwehĩ? 35Neryo Yesu mwabwirabo ati, Ekyakakala kikine kandi omo katĩkatĩ kenyũ oko katambĩ kake. Mulendere omugulu mukine n'ekyakakala ekyo, omwĩrĩmya siabatange. Oyukalendera omo mwĩrĩmya sĩasĩ eyo akaya. 36Omugulu muli n'ekyakakala mwĩkĩrĩraye ekyakakala, mutoke eribya bandu b'ekyakakala. Yesu abere abĩbũga emyatsi eyĩ, mwalũaho mwayĩbĩsa kubo. 37Nĩkwa nomo anakola ebitiko-tiko bingi embere wabo, mobatamwĩkĩrĩrya. 38Ekĩnywa ky'omũmĩnyererĩ Ĩsaya ikyatoka eribererera ekyabũga kiti, OmwamiMukulu, nindi yo wabĩrĩkĩrĩrya erĩtũlago lyetu kwehĩ? Omwami Mukulu abĩrĩbĩsũlĩra amaka wuwe ukuudi kwehi? 39Busana n'omwatsi oyũ, mobatatoka erĩkĩrĩrya, kusangwa Ĩsaya mwaswabũga ati, 40Nyamuhanga abĩrĩrĩba ameso wabo, Abĩrĩkalya emitima yabo, Ameso wabo syalangire, N'emitima yabo siyiminye, Kandi sibabinduke, Nage, ngalamyabo. 41Ĩsaya mwabũga emyatsi eyĩ kusangwa mwalangira olukengerwa lwa Yesu, kandi mwamwahula. 42Nĩkwa abatabalĩ bangi b'Abayũda mobĩkĩrĩrya Yesu; nĩkwa busana n'Abafarĩsayo mobatakangyalyo, bakasyahigwa omo nyũmba y'erĩhĩndanamo. 43Kusangwa mobanza erĩsĩmwa n'abandu kwilaba erĩsĩmwa na Nyamuhanga. 44Neryo Yesu mwabũga n'omulenge munene ati, Oyũkanyĩkĩrĩraya, sĩalĩnyĩkĩrĩraya ĩngyowene, nĩkwa akĩkĩrĩraya oyo wanyituma. 45Kandi oyukanyilolako, akalola ukw'oyo wanyituma, 46Nabĩrĩhĩka muna-kinugo ng'ekyakakala, neryo oyũkanyĩkĩrĩraya sĩasyĩkala omo mwĩrĩmya. 47Kandi omundu amowa ebĩnywa byage, isialibikabyo, sindimutswera, kusangwa mondasa eritswera ekihugo, nĩkwa nasa erĩlamya ekihugo. 48Oyukanyigana, isialilangira emyatsi yage, awite oyukamutswera; ekĩnywa ekyo nabũga kyo kyasyamutswera oko kiro ky'enyũmanyũma! 49Kusangwa mondabũga omw'iyihana lyage, nĩkwa Tata oyo wanyituma abirinyihana .ebyo nangabũga n'ebyo nangatũla. 50Kandi nyĩnasĩ erihana liwe ni ngebe y'erikota. Neryo emyatsi eyo ngabũga, ngabũga ngoko Tata abirimbwira.

will be added

X\