YOANE 10

1Kwenene, kwenene ngababwira nyiti, Oyutelaba omo lũkyo lw'obutsunga bw'esyombũlĩ, nĩkwa akalaba handi, nĩ mũrahĩ n'omũnyeyĩ. 2Nĩkwa omundu oyukalaba omo lũkyo nĩ mũlĩsya w'esyombũlĩ. 3Neryo omũteya w'olũkyo akamukingulira, n'esyombũlĩ sĩkowa omulenge wuwe, kandi akabirikira esyombũlĩ siwe omo mena wasyo, neryo akahũlũkĩraya sy'eyĩhya. 4Neryo amabĩhũlũkya esiwe syosĩ, akagenda embere wasyo, n'esyombũlĩ sikamukwama kusangwa sĩnasĩ omulenge wuwe. 5Kandi sisyekwama ow'ehandi, nĩkwa sikamusaga, kusangwa sĩsĩasĩ omulenge wuwe. 6Yesu mwatwĩrabo omũsyo oyũ, nĩkwa mobataminya nga ni myatsi yahi eyo abũga nabo. 7Neryo Yesu mwabũga nabo kandi, ati, Kwenene, kwenene ngabũga nenyũ, Ĩngye indi lũkyo lw'esyombũlĩ. 8Abosĩ abasa embere syage nĩ barahĩ n'abanyeyĩ, nĩkwa esyombũlĩ mosĩtowabo. 9Ĩngye indi lũkyo, omundu amingirira ũkw'ĩngye asyalamĩbwa; kandi asyingira n'erihuluka, n'eribana eby'erirya. 10Omũrahĩ akahĩka busana n'erĩĩba lisa, n'erĩĩta, n'erĩherya. Ĩngye nasa babane engebe, kandi babane engebe nyingi eyĩtswagĩre. 11Ĩngye indi mũlĩsya wowene. Omũlĩsya wowene akasiga engebe yiwe busana n'esyombũlĩ. 12Omũhĩngĩ, oyute mũlĩsya isi mwenye esyombũlĩ, akasĩgasyo, iniatibita omugulu akalangira embwa y'omolĩ ikasa, neryo embwa y'omolĩ ĩkapũrasyo, n'eripanzasyo. 13Omũhĩngĩ akatibita kusangwa nĩ mũhĩngĩ, isialitsomana esyombũlĩ. 14Ĩngye indi mũlĩsya wowene. Kandi nyasĩ esyombũlĩ syage, n'esyombũlĩ syage nasyo sĩnyasĩ. 15Ngoko Tata anyasĩ, nage nyasĩ Tata; kandi ngasiga engebe yage busana n'esyombũlĩ. 16Kandi nyiwite esindi mbũlĩ, esite sy'omo butsunga obũ; litolere inaletasyo nibya, nasyo syasyowa omulenge wage; syasyabya ekihangulo kiguma haguma n'omũlĩsya muguma. 17Busana n'omwatsi oyũ, Tata wage anyanzĩre kusangwa ngasiga engebe yage inatoka erĩswĩmyayo. 18Sihali mundu oyukanyisagulayo, nĩkwa ngasigayo omo hamũlĩ yage. Nyiwite ehamũlĩ y'erisigayo, kandi ngwite ehamũlĩ y'erĩswĩmyayo. Tata wage abirinyihana ati nyikole nyitya. 19Kandi mohaswahuluka erigabana omo katĩkatĩ k'Abayũda busana n'ebĩnywa ebĩ. 20Abangi ba kubo mobabũga bati, Ali ko mbĩnga! Nĩ mũsĩre! Busana nakĩ mũkamowa kwehĩ! 21Abandi bati, Oyuli kw'embĩnga sĩalĩbũga atya. Embĩnga yangatoka erĩrĩbũla ameso w'endĩmatĩme, kwehĩ? 22Oko ndambĩ eyo Ebiro Bikulu by'Erihigula mobyabya eYerũsalema 23Kandi omugulu oyo abya w'eritsuku, neryo Yesu abya iniakalendera omo Hekalũ omo baraza ya Solomono. 24Neryo Abayũda mobamũtĩmbako bakamũbũlya bati, Esaa yingaha ũkatũganga-gangaya kwehĩ? Wamabya uli Kristo, utubwire ndeke-ndeke. 25Yesu mwasũbĩryabo ati, Mongababwira, nenyũ simwetĩkĩrĩrya. Emĩbĩrĩ eyo ngakola omo lĩna lya Tata wage, ĩkatũlago busana nage. 26Nĩkwa sĩmũlĩkĩrĩraya, kusangwa simuli mbũlĩ syage. 27Esyombũlĩ syage sĩkowa omulenge wage; kandi nyasĩsyo, nasyo sikanyikwama. 28Nage ngahasyo engebe y'erikota, kandi nasyo sisyendisyahera na kera, kandi sihali oyo wangatoka erĩpũrasyo omo byala byage. 29Tata wage oyo wambasyo, ni mukulu oko bosĩ, kandi sihali wangatoka erĩpũrasyo omo byala bya Tata. 30Ĩngye na Tata tuli muguma. 31Abayũda mobaswatola amabwe kandi erimugusa goko. 32Yesu mwabwirabo ati, Nabĩrĩbakangya emĩbĩrĩ mingi yowene eyo Tata amba nyikoleyo; busana n'omũbĩrĩ wahi mukanyigusa kw'amabwe kwehĩ? 33Abayũda mobamũsũbĩrya bati, Sĩtwekũswĩraya amabwe busana n'omũbĩrĩ owene, nĩkwa busana n'eritsuma Nyamuhanga! Kusangwa uwe mundu buyira, ukayiyira mo Nyamuhanga! 34Yesu mwasũbĩryabo ati, Sĩkĩsakĩre omo Migambo yenyũ kwehĩ, iti, Nyamuhanga mwabũga ati, Muli esyonyamuhanga? 35Tũnasĩ kw'Amasako sialiketawa, neryo Nyamuhanga abiribirikirabo mo syonyamuhanga abo ekĩnywa kya Nyamuhanga kyahĩkako. 36Nĩkwa ĩngye, Tata abirinyihigula n'erinyituma omo kihugo. Neryo mukanyahula muti, Ukatsuma, kusangwa nabũga nyiti indi Mugala wa Nyamuhanga kwehĩ? 37Namatindakola emĩbĩrĩ ya Tata wage, sĩmũnyĩkĩrĩraye. 38Nĩkwa namakolayo, nomo mwangabya mũtanyĩkĩrĩrye, mwĩkĩrĩraye emĩbĩrĩ eyo, mutoke eriminya n'erĩkĩrĩrya ngoko Tata amatikene ũkw'ĩngye, nage nyimatikene na Tata. 39Kandi mobasonda-sonda erimutsimba, nĩkwa mwasunukala omo byala byabo. 40Neryo Yesu mwaya kandi eyisirya w'eYorodanĩ aho Yoane abatĩsĩraya erĩmbere, neryo mwĩkalayo. 41Kandi abandu bangi mobamũhĩkako, mobabũga bati, Yoane mwatakola ekitiko-tiko, nĩkwa emyatsi yosĩ ahula busana n'omundu oyũ, yabya ya kwenene. 42Kandi abandu bangi mobamwĩkĩrĩrya eyo.

will be added

X\