YOANE 1

1Okw'ĩtsũka ly'erĩmbere Ekĩnywa kyabyaho, n'Ekĩnywa ekyo kyabya haguma na Nyamuhanga, kandi Ekĩnywa ekyo kyabya Nyamuhanga. 2Neryo Ekĩnywa ekyo kyabya haguma na Nyamuhanga okw'ĩtsũka ly'erĩmbere. 3Kandi busana naye emyatsi yosĩ moyahuluka eribyaho, isihali kindu ekyahangikawa ekyo atahangika. 4Ekĩnywa ekyo kyabya n'engebe, n'engebe eyĩ moyabya kyakakala ky'abandu. 5Kandi ekyakakala ekyo kĩkakoleraya omo mwĩrĩmya, n'omwĩrĩmya mwatalĩmyakyo. 6Nyamuhanga mwatuma omundu, oyo wahulawa mo Yoane. 7Yoane mwahĩka erĩtũla omwatsi iniatoka erĩtũla omwatsi w'ekyakakala, abandu bosĩ batoke erĩkĩrĩrya. 8Yoane siabya ekyakakala ekyo, nĩkwa asa atoke erĩtũla omwatsi w'ekyakakala ekyo. 9Ekyo kyabya kyakakala ky'ekwenene ekĩkahĩka omo kihugo, n'erĩkolerya obuli mundu. 10Ekĩnywa ekyo kyabya omo kihugo, kandi ni iye yo wabumba ekĩhugo, nĩkwa ekihugo mokitetamuminya. 11Iye mwahĩka omo kihugo kiwe, n'ababya bandu buwe mobatetamũkokya. 12Nĩkwa abosĩ abamũkokaya, n'erĩmwĩkĩrĩrya, mwahabo ehamũlĩ eribya bana ba Nyamuhanga. 13Nĩkwa mobatabutwa mo bana ba Nyamuhanga omo nzira y'omubiri, kutse omw'isonda ly'omubiri, kutse omw'isonda ly'abandu, nĩkwa Nyamuhanga yo wabutabo. 14N'Ekĩnywa ekyo mokyabya mundu, naye mwĩkala omo katĩkatĩ ketu. Netu motwalangira olukengerwa luwe ĩloswĩre n'olukogo n'ekwenene. Olukengerwa olũ lwabya olwa Mugala Ekyusa ekyabutawa na Tata. 15Yoane mwatũla omwatsi wa Yesu, mwabirikira ati, Oyũ yoyo nahula nyiti, Oyukasa enyũma syage ni mukulu kwĩngye, kusangwa anatula isindinabutwa. 16Omo lukogo luwe olũtswagĩre abiritutsumula, iniakatuha olukogo n'olundi lukogo. 17Kusangwa Nyamuhanga mwaha Musa Emigambo, nĩkwa olukogo n'ekwenene, Yesu Kristo yo waletabyo. 18Sihali mundu wabilangira Nyamuhanga na kera; nina Nyamuhanga. Ekyusa, oyuli oko kĩkũba kya Tata, yo wabirimũmĩnyĩsya. 19Ebĩ byo Yoane akanaya, omugulu Abayũda bamutumira abahererĩ n'Abalawĩ bakalũa eYerũsalema erĩmũbũlya bati, Uwendi kwehĩ? 20Yoane mwatagana erĩtũlago, nĩkwa mwakangyabo ndeke ati, Sindi Kristo. 21Nabo mobamũbũlya bati, Uwendi? Uli Elĩa kwehĩ? Yoane mwasũbĩrya ati, Ĩngye si iye. Kandi mobabũlya bati, Uli mũmĩnyererĩ kwehĩ? Naye mwasũbĩrya ati, Iyihi. 22Neryo mobamũbũlya bati, Uwendi kwehĩ? Itwatoka erĩsũbĩrya abaliatutuma. Ukayahula uti kwehĩ? 23Yoane mwasũbĩryabo ati, Ĩngye indi mulenge w'oyukabiri-kirira omo mbwarara, ngoko mũmĩnyererĩ Ĩsaya abũga ati, Mũtũngananaye embalu y'Omukama. 24Neryo Abafarĩsayo bo batuma abakwenda abo. 25Mobabũlya Yoane bati, Ũkabatĩsaya busana nakĩ wamabya isuli Kristo, kutse Elĩa, kutse mũmĩnyererĩ kwehĩ? 26Yoane mwasũbĩryabo ati, Ngabatĩsaya omo magetsi, nĩkwa omo katĩkatĩ kenyũ hahangene omuguma oyo mũtasĩ. 27Iye akasa enyũma wage, nĩkwa ĩngye sinyitolere erĩkũndũla omukoba w'engendero yiwe. 28Emyatsi eyĩ yakolawa eBetanĩa, eyisirya w'eYorodanĩ, aho Yoane abatĩsĩraya. 29Neryo engyakya Yoane mwalangira Yesu akasa aho ali, neryo mwabũga ati, Lebaya, Ekyana ky'Embũlĩ kya Nyamuhanga oyũkalũsaya ebibi by'ekihugo! 30Oyũ yoyo nahula nyiti, Hali mundu oyukasa enyũma wage, oyuli mukulu kwĩngye, kusangwa anatula isindinabutwa. 31Nage mondamuminya, nĩkwa monasa erĩbatĩsya omo magetsi, erĩmũmĩnyĩkalya oko bandu ba Ĩsraelĩ. 32Yoane mwatũla omwatsi oyũ ati, Monalangira Omũlĩmũ akandagala akalũa elubula ng'akalĩkũkũ, n'erimubyako. 33Nage mondamuminya, nĩkwa Nyamuhanga oyo wanyituma erĩbatĩsya omo magetsi, mwambwira ati, Oyo wasyalangira Omũlĩmũ akamwandagalirako n'erimubyako, yo yũkabatĩsaya omo Mũlĩmũ Abũyĩrĩre. 34Nĩkwa nabirilangirakyo, kandi ngababwira nyiti, Oyũ ni Mugala wa Nyamuhanga. 35Kandi engyakya Yoane abya imene haguma n'abiga buwe babiri. 36Neryo mwalangira Yesu akalaba, neryo mwabũga ati, Lebaya, Ekyana ky'Embũlĩ kya Nyamuhanga! 37N'abiga babiri abo mobowa akabũga atya neryo mobakwama Yesu. 38Yesu mwakeba, mwalangirabo bakamukwama, neryo mwabũga ati, Mukasondakĩ kwehĩ? Nabo mobabwira Yesu bati, Rabĩ, ekĩnywa ekĩ kiti Mũkangĩrĩrya, wĩkerehi kwehĩ? 39Yesu mwabwirabo ati, Mwase, mũlebayeho. Neryo mobasa mobalangira aho ĩkere. Neryo mobasiba haguma naye ekiro ekyo, kusangwa yabya hakũhĩ na saa ĩkũmĩ. 40Omuguma g'oko babiri abowa Yoane akabũga n'erigenda haguma na Yesu, abya Anderea, mugala wabo Sĩmonĩ Petero. 41Neryo Anderea mwatsũka eriyabana mugala wabo ye Sĩmonĩ, mwamubwira ati, Twabiribana Masĩya, (Ekĩnywa ekĩ kiti, Kristo). 42Neryo Anderea mwaleta Sĩmonĩ uku Yesu. Yesu mwamutungerera mwabũga ati, Uli Sĩmonĩ, mugala wa Yoane. Wasyahulwa mo Kefa (Ekĩnywa ekĩ kiti, Petero). 43Kandi engyakya Yesu mwasonda eriya eGalĩlaya. Neryo Yesu mweya Fĩlĩpo, mwamubwira ati, Unyikwame. 44Nĩkwa Fĩlĩpo abya w'omũyĩ w'eBetesaĩda, omũyĩ wa Anderea na Petero. 45Neryo Fĩlĩpo mwayabana Natanaelĩ, mwamubwira ati, Twabiribana oyo Musa asaka omo kitabu ky'Emigambo, n'abamĩnyererĩ nabo basaka busana naye. Ni Yesu w'eNazaretĩ, mugala wa Yosefũ. 46Neryo Natanaelĩ mwamũbũlya ati, Kw'ekindu kyowene kyanganalũa eNazaretĩ kwehĩ? Fĩlĩpo mwamubwira ati, Wase ũlebaye. 47Yesu mwalangira Naranaelĩ akasa ukw'iye, neryo mwabũga busana naye ati, Lebaya, Omũĩsraelĩ kwenene, oyute mo matebo! 48Natanaelĩ mwabwira Yesu ati, Ukanyiminya uti kwehĩ? Yesu mwamũsũbĩrya ati, Mongakulangira omugulu ũlũe omo ndĩna y'omuti w'omũtĩnĩ, Fĩlĩpo ate akubirikira. 49Natanaelĩ mwamũsũbĩrya ati, Mũkangĩrĩrya, uli Mugala wa Nyamuhanga! Uli Mwami wa Ĩsraelĩ! 50Yesu mwamũsũbĩrya ati, Ukĩkĩrĩraya kusangwa nakubwira nyiti, Mongakulangira omo ndĩna y'omuti w'omũtĩnĩ kwehĩ? Wasyalangira emyatsi minene ũkw'eyĩ 51Neryo Yesu mwabwirabo ati, Kũndũ-kũndũ, ngababwira nyiti, mwasyalangira olubula ilukingukere, n'abamalaĩka ba Nyamuhanga ibakahetuka n'eriandagalira oko Mugala w'Omundu.

will be added

X\