YAKOBO 5

1Neryo muhulikirire lino, ĩnywe bandu b'ebindu! Mulire, muyilakire busana n'amalĩge awakandĩsyabahĩkako. 2Ebindu byenyũ byabirihonda, n'esyongimba syenyũ syabiriribwa n'ehinyurugunzu. 3Esyamagetsi n'ebĩtsĩpa byenyũ, byabĩrĩkwa amakenge, n'amakenge wabyo asyabya mũlangĩrĩ wenyũ, kandi asyalya emĩnyokũ yenyũ ng'omuliro. Mwabiriyibikira ebindu byenyũ omo biro by'enyũma-nyũma. 4Mũlebaye, simwetaliha abandu abahingira omo malima wenyũ, n'abandu abasolomago. Nabo bakabatsongera. N'erilaka lyabo lyabĩrĩhĩka omo matwĩ w'Omukama w'Amaka Gosĩ. 5Mwabirisiba muna-kihugo ng'abami, n'erĩyĩtsemesya ndeke. Mwabĩrĩnenehya emitima yenyũ busana n'ekiro ky'erikerwa. 6Mwabĩrĩsĩnga n'erĩĩta omundu mutunganene; naye sialilwa nenyũ. 7Neryo balĩkyetu, muyibombeke erĩhĩka oko kiro ky'eriasa ly'Omukama. Mũlebaye ngoko mũlĩmĩ akayibombeka, eririnda eriera ly'ebĩgũma by'enzwere nene by'ekitaka, iniakayibombeka erĩhĩka oko kiro embũla y'erĩmbere n'ey'erĩnyũma ikawa. 8Nenyũ nibya, muyibombeke! Mũsĩkaye emitima yenyũ, kusangwa ekiro ky'eriasa ly'Omukama kiri hakũhĩ. 9Balĩkyetu, simutongane, mukasyatswerwa na Nyamuhanga. Mũlebaye, omũtswerĩ imene oko lũkyo. 10Balĩkyetu mwibuke abamĩnyererĩ, ababũga omo lĩna ly'Omukama. Muganzebo ng'olulengo lw'erĩyĩyĩnĩa, n'eriyibombeka omo bũlĩge. 11Mũlebaye, tukaganza abayĩyĩnaya mo bandu b'obutseme. Mwabĩrĩowa engulu y'erĩyĩyĩnĩa lya Yobũ, kandi mwabirilangira ebyo Mukama asala amukolera. Kusangwa Omukama ni w'eriganyira kutsibu, kandi akaganyira abandu. 12Nĩkwa kwilaba ebyosĩ, balĩkyetu, omugulu mukalaga, sĩmũlahĩraye kutse omo lubula, kutse omo kihugo, kutse omo lindi erĩlahĩrya. Nĩkwa ega yenyũ ibye ega, n'eyihi yenyũ ibye iyihi, Nyamuhanga siabatswere. 13Hali mundu omo katĩkatĩ kenyũ akagalawa kwehĩ? Asabe. Hali oyukatsema kwehĩ? Imbe n'eripipa. 14Hali oyulwere omo katĩkatĩ kenyũ kwehĩ? Abirikire abakulu b'ekanĩsa, bamusabire, n'erĩmũhakabya amagũta omo lĩna ly'Omukama. 15N'erisaba erĩ ly'erĩkĩrĩrya lyasyalamya omũkonĩ, n'Omukama asyamũsũbya. Kandi amabya abirikola ebibi, asyabuyirwabyo. 16Neryo mũkangananaye ebibi byenyũ, n'erisabirana, imwatoka erĩlamĩbwa. Erisaba ly'omundu mutunganene likatoka omwatsi munene. 17Elĩa abya mundu nga twe, neryo mwasaba n'omũhwa ati, embũla siyiwe. Neryo embũla moyitawa oko kihugo emyaka ĩsatu n'emikera ndatu. 18Neryo mwaswasaba neryo olubula molwawĩsya embũla, n'ekitaka mokyalasya esyombuto. 19Balĩkyetu, hamabya mundu omo katĩkatĩ kenyũ oyukatala n'erĩlũa omo kwenene, n'ogundi akamũsũbũlya; 20muminye omwatsi ono, oyũkasũbũlaya omukola-nabi erĩmũlũsya okw'itala liwe, akalamaya omutima w'omukola-nabi oyo okw'ihola, kandi akaleka ebibi binene ibyabuyirwa.

will be added

X\