YAKOBO 4

1Erinegena n'amalwa omo katĩkatĩ kenyũ bĩkalũa hahi kwehĩ? Bĩkalũa oko syongumbu syenyũ esĩkalũa omo mibiri yenyũ. 2Mukasonda ebindu byo kutsibu, nĩkwa simuwitebyo, neryo mukasonda erĩĩta abandi. Mukatsura nĩkwa simwetoka eribanabyo; kikaleka imwalwa n'erinegena. Simuwite ebyo mwanzĩre kusangwa sĩmwebũlaya Nyamuhanga. 3Mũkabũlaya neryo simwebanabyo, kusangwa mũkabũlaya nabi, muti mũkakolesayabyo omo syongumbu syenyũ. 4Ĩnywe basĩngĩrĩ, sĩmwasĩ ko bwĩra bw'ekihugo nĩ bũyĩgũ uku Nyamuhanga kwehĩ? Neryo oyukasonda eribya mwĩra w'ekihugo akayiyira mo nzĩgũ ya Nyamuhanga. 5Kutse mũkagaĩnraya muti Amasako akabũga buyira kwehĩ, ati, Ekĩrĩmũ ekyo Nyamuhanga abĩrĩhĩra omwisi syetu, kyoswĩre n'erisonda litsibu. 6Nĩkwa olukogo olo Nyamuhanga akaha lũlengĩre. Neryo Amasako ati, Nyamuhanga akalwa n'abakayiheka, nĩkwa akakangaya olukogo ukw'abo bakayĩkehaya. 7Neryo mwolobe embere sya Nyamuhanga. Mulwe n'eSatanĩ, nayo ikandisyabasaga. 8Mũyĩtũnde hakũhĩ na Nyamuhanga, naye akandĩyĩtũnda hakũhĩ nenyũ. Mũnabaye ebyala byenyũ, ĩnywe bakola-nabi! Mweraye emitima yenyũ ĩnywe mũkayĩtendereraya. 9Mũkwe obũlĩge, mũsũsũmane, mulire: eriseka lyenyũ libinduke mw'ĩsũsũmana, n'obutseme bwenyũ bubinduke mo ngitsi. 10Mũyĩkehaye embere sy'Omukama, naye akandĩbahamya. 11Balĩkyetu, simuhandikirirane. Oyukahandikirira mũlĩkyabo, kutse erimutswera, akahandikirira Emigambo n'eritswerayo. Nĩkwa wamatswera Emigambo, sukiri oyukakenga Emigambo, nĩkwa uli mũtswerĩ wayo. 12Nyamuhanga ĩyowene akayira Emigambo n'eribya mũtswerĩ. Iye ĩyowene akatoka erĩlamya n'erĩherya, nikwa uwe uwendi uti ukatswera mũlĩkyenyũ kwehĩ? 13Muhulikirire, ĩnywe mũkabũga muti, Mũnabwĩre kutse engyakya, twasyaya oko mũyĩ mulebe, aho twasyasiba omwaka muguma. Aho twasyatũndya, n'eribana endũndĩ. 14Kwesĩ sĩmwasĩ nga mwasyabya muti omo ngyakya. Kusangwa engebe yenyũ iri ng'oluhohe, olukahuluka katambĩ kake, neryo ilwabulirayo. 15Neryo ekitolere ĩwabũga uti, Omukama amabya anzĩre, twasyabyaho itwakola ekĩ kutse ekindi. 16Nĩkwa lino, mukayihalamba omo miyiheko yenyũ. Emiyihalambo yosĩ eyo ni kibi. 17Neryo, omundu oyo wasĩ ekibuya ekyo angakola, nĩkwa sialikolakyo, omundu oyũ ali m'omusango w'ebibi.

will be added

X\