YAKOBO 2

1Balĩkyetu, simuyire ebitaga omo migendere yenyũ, ĩnywe mwabĩrĩkĩrĩrya n'erikwama Omukama wetu Yesu Kristo, omwenye olukengerwa. 2Kusangwa omundu amahĩka omo nyũmba yenyũ y'erĩhĩndanamo iniambite embũka y'esyamagetsi, n'esyongimba esyowenenga. Kandi omundu mwera akahĩkamo iniambite esyongimba sĩtowene. 3Neryo mukakenga oyukambala esyongimba syowenenga muti, Ĩkala ahowene hano. Kandi mukabwira omundu mwera, muti, Hangana halya. Kutse muti, Ĩkala hano ahisi, hakũhĩ n'ekĩtũmbĩ kyage. 4Si mwabirisombola abandu omo katĩkatĩ kenyũ, n'eritswera emyatsi busana n'amalengekanĩa mabi kwehĩ? 5Abalĩkyetu banze, muhulikirire ndeke! Nyamuhanga mwayisoga abera b'ekihugo eribya ng'abandu b'ebindu omw'ĩkĩrĩrya, abasyabana Obwami obo Nyamuhanga abirilaga oko bakamwanza. 6Nĩkwa ĩnywe mukahemula omundu mwera! Si ba bandu b'ebindu abakabanũbaya, n'eribakurira embere sy'abatswerĩ kwehĩ? 7Ni bandu b'ebindu abakatsuma erĩna libuya eryo Nyamuhanga abiribahulamo. 8Nĩkwa mukandikola ndeke mwamaberererya omugambo w'Obwami owali omo masako ati, Wanze mũlĩkyenyũ ngoko ũyanzĩre. 9Nĩkwa mwamayira ebitaga, mukakola ebibi, kandi mwamasĩngwa n'Emigambo ng'abakahalaya. 10Kusangwa oyukakwama Emigambo yosĩ, nĩkwa amaketa omuguma, ĩnĩabĩrĩhalya omo byosĩ. 11Kusangwa oyo wabũga ati, Isiwasĩngĩra, yo wabũga ati, Ĩsĩwĩta. Nĩkwa wamatendĩsĩngĩra, nĩkwa ũkĩta, ĩwabĩrĩhalya omo Migambo. 12Neryo mũbũge, mukole ng'abandu abasyatswerwa n'omugambo owakaleta obwĩranda. 13Kusangwa Nyamuhanga siendisyaganyira omundu oyukagana eriganyira ogundi. Nĩkwa eriganyira lĩkakĩnda eritswera. 14Balĩkyetu, nĩ ndũndĩ yahi busana n'omundu oyũkabũga ati awite erĩkĩrĩrya, nĩkwa emĩbĩrĩ yiwe isĩrĩkangayalyo. Erĩkĩrĩrya eryo lyanganamũlamya kwehĩ? 15Mugala wetu kutse mwali wetu anganabya butsira esyongimba, kutse anganabula eky'erirya. 16Nĩ ndũndĩ yahi eribwirabo uti, Mugende buholo, mũsĩsĩmũke, mũgũte ndeke, nĩkwa simulihabo ebitolere emibiri yabo? 17Erĩkĩrĩrya ko liri ritya. Lyamabya liri ĩryolyene butsira emĩbĩrĩ, ĩrĩholĩre. 18Omundu anganabũga ati, Uwe uwite erĩkĩrĩrya, nage ngwite emĩbĩrĩ. Ũngangaye erĩkĩrĩrya lyawe eritawite mĩbĩrĩ, nage ngandĩkũkangya erĩkĩrĩrya lyage omo mĩbĩrĩ yage. 19Ũkĩkĩrĩraya ngoko Nyamuhanga ni muguma. Ũkabũga ndeke. Nĩkwa esyombĩnga nasyo sĩkĩrĩrĩraya ekyo, kandi sĩkasũka-sũkana. 20Uwe mundu mũkĩrũ, ũnanzĩre erĩmĩnyĩsĩbwa ngoko erĩkĩrĩrya butsira mĩbĩrĩ ni busa kwehĩ? 21Omugulu Abrahamũ tata wetu, ahera mugala wuwe Ĩsaka oko kiherero, mwatatũngananĩbwa omo mĩbĩrĩ yiwe kwehĩ? 22Mũlebaye ngoko erĩkĩrĩrya molyakola omo mĩbĩrĩ yiwe, kandi erĩkĩrĩrya liwe molyahĩkana omo mĩbĩrĩ yiwe. 23Neryo amasako mwabererera, awakabũga ati, Abrahamũ mwĩkĩrĩrya Nyamuhanga, neryo Nyamuhanga mwamuganza ng'omutunganene busana n'erĩkĩrĩrya liwe. Kandi Nyamuhanga mwahula Abrahamũ mo mwĩra wuwe. 24Neryo mũlebaye ngoko Nyamuhanga akatũngananaya omundu busana n'ebyo akakola, butsira erĩkĩrĩrya ĩryolyene. 25Ko lyabya litya n'omũmalaya ye Rahabũ. Mwatũngananĩbwa na Nyamuhanga busana n'ebyo akola omugulu akokaya abakwenda ba Ĩsraelĩ, n'erĩkangyabo eyindi nzira y'erilabamo. 26Kusangwa ngoko mubiri owate mo kĩrĩmũ aholĩre, ko liri litya erĩkĩrĩrya butsira mĩbĩrĩ lĩholĩre.

will be added

X\