YAKOBO 1

1Ĩngye Yakobo, omugombe wa Nyamuhanga n'Omukama Yesu Kristo, ngabakeraya ĩnywe bihanda ĩkũmĩ n'ebibiri ababiripanza-panzwa omo kihugo kyosĩ. 2Balĩkyetu, omugulu mukabana erirengwako mĩsĩndo-mĩsĩndo, mubye n'obutseme. 3Kusangwa mũnasĩ omugulu erĩkĩrĩrya lyenyũ likalengawako, likaleta erĩyĩyĩnĩa. 4Nĩkwa litolere erĩyĩyĩnĩa lyenyũ lĩhĩkane ndeke, imwabya bandu abahĩkene imwabirikula ndeke, isimulibula mwatsi. 5Nĩkwa hamabya mundu omo katĩkatĩ kenyũ oyukabula amenge, abũlaye Nyamuhanga oyukaha ndeke oko bandu bosĩ butsira buhemu; neryo omundu oyo asyahabwa amenge ayo. 6Nĩkwa abũlaye ĩnĩakĩkĩrĩraya, butsira eritika-tika. Kusangwa oyukatika-tika ali ng'ebisunda by'omo ngetsi, ebĩkakũnawa n'eriguswa n'erihunga. 7Omundu ng'oyo sĩaganĩraye ati asyabana kindu ew'Omukama. 8Kusangwa ni mundu w'emitima ĩbĩrĩ, sĩasĩkĩre omo nzira siwe syosĩ. 9Nĩkwa omũlĩkyetu mwera atseme omugulu akahamĩbawa na Nyamuhanga. 10N'omundu w'ebindu atseme omugulu akakehĩbawa na Nyamuhanga. Kusangwa ab'ebindu basyahwaho ng'omusanga w'ebiti. 11Kusangwa eryuba likahuluka haguma n'erihunga, bĩkahĩsaya ebiti ebyo, n'omusanga wabyo akatogonga, n'obubuya bwabyo bukahera. N'omundu w'ebindu kw'asyahwerekerera atya omugulu akakola emĩbĩrĩ yiwe. 12Obutseme buli n'omundu oyũkasĩka omw'irengwako, kusangwa amabitoka erirengwako asyangirira embĩta y'engebe, eyo Nyamuhanga abirilaga abamwanzĩre. 13Omundu sĩabũge omugulu akalengawako ati, Nyamuhanga yukamulengako, kusangwa Nyamuhanga sialitoka erirengwako n'ekibi, kandi sialirenga uku mundu. 14Nĩkwa obuli mundu akalengawako omugulu akakurawa n'erihekwa n'esyongumbu siwe nyibi. 15Neryo esyongumbu siwe nyibi syabiheka obukule, sikabuta ebibi, n'ebibi byabikula, bikaleta oluholo. 16Sĩmũtebĩbawe, balĩkyetu banze. 17Obuli lũsũnzo lubuya n'obuli lũsũnzo lowene, bĩkalũa endata, kandi bikasira uku Tata w'ekyakakala kyosĩ, oyutebinduka kutse eriyihindula. 18Kusangwa mwayisoga eritubuta omo kĩnywa ky'ekwenene itwatoka eribya b'erĩmbere umw'ebyo ahangika. 19Balĩkyetu banze, muminye ekĩ. Obuli mundu abye akowa lũba, nĩkwa sĩabũge lũba, kutse siahitane lũba. 20Kusangwa erihitana ly'abandu siririyira eritunganene lya Nyamuhanga. 21Neryo muguse obuli mwatsi atĩsĩrĩre, n'emibere yosĩ y'ebibi. Neryo mwangirire n'omutima molo ekĩnywa ekyo Nyamuhanga akahĩra omo mitima yenyũ, ekikatoka erĩbalamya. 22Mubye bandu abakakola n'erĩowa ebĩnywa bya Nyamuhanga, butsira abakahulikirira lisa n'eriyiteba. 23Kusangwa omundu amowa ekĩnywa isialikolakyo, ali ng'omundu oyukayisamalira omo kisasamira n'eriyiminya; 24kusangwa akayisamalira, neryo iniagenda, n'eribirirwa lũba kw'alwe asosĩre. 25Nĩkwa omundu oyukalangira ndeke omugambo owahĩkene, ow'obwĩranda, iniakakwamago ndeke, asyabana obutseme bwa Nyamuhanga omo mũbĩrĩ wuwe, kusangwa sialihulikirira buyira n'eribirirwago; akakolago. 26Omundu amaganĩrya ati akakwama ekisomo kyo ndeke, nĩkwa isialikunga olulimi luwe, akayiteba, n'ekisomo kiwe ni kya busa. 27Ekisomo kibuya, ekite n'ebĩtĩsĩrĩre embere sya Nyamuhanga Tata kyekĩ: erĩwatĩkya esyongũbĩ n'abakwakalĩ omo bũlĩge bwabo, kandi eriyihigula oko myatsi mibi y'ekihugo.

will be added

X\