ABAEBRANIA 9

1Endagane y'erĩmbere yabya n'ekihano busana n'erĩramya n'ahabũyĩrĩre ha muna-kihugo. 2Kusangwa mobahanganĩa eHema y'eyĩhya eyirimo omutagala owakahamba esyotala, n'emesa, n'amandu abũyĩrĩre; hano ho hahulawa mo Habũyĩrĩre. 3Neryo enyũma w'ekĩsũkũlĩryo ky'akabiri, mohabya eHema eyikahulawa mo Ahabũyĩrĩre Kutsibu. 4Kandi ho habya ekiherero ky'esyamagetsi eky'erĩhĩsya kw'obukwa, kandi erĩsandũko ery'endagano eryabiribambwako ehosĩ esyamagetsi. Kandi omo rĩsandũko eryo mwabya akalega k'esyamagetsi akali mw'amana, kandi omũtso wa Harũnĩ owalasaya amasasa, n'ehisayi hibiri hy'amabwe ehyasakawako esyondagane. 5N'endata oko lĩsandũko habya amakerũbĩ w'olukengerwa, awakasũkũlĩraya Aheriganyira. Nĩkwa hano sitwangahula lino ebyosĩ mo kiguma kiguma. 6Neryo emyatsi eyĩ yabere yabĩkokotĩbwa, abahererĩ mobabya bakingira ebiro byosĩ omo hema y'eyĩhya erikola omũbĩrĩ wabo w'ekisomo. 7Nĩkwa Omũhererĩ Mukulu oko bahererĩ bosĩ ĩyowene mwabya akingira omo Hema y'Ahabũyĩrĩre Kutsibu engendo nguma nyisa oko buli mwaka. Abya akaheka omusasi haguma naye, owakaha Nyamuhanga busana naye, n'akandi busana n'ebibi by'abandu, ebyo bakola omo butaminya bwabo. 8Omũlĩmũ Abũyĩrĩre akakangaya omo myatsi eyĩ ngoko enzira y'eriya Ahabũyĩrĩre Kutsibu siritalĩbũkala omugulu ehema y'eyĩhya ikinahangene. 9Omwatsi oyũ ali ng'ekĩsosekanĩo ky'omugulu ono. Akakangaya ngoko olũsũnzo n'amahere ebyo abandu bakaha Nyamuhanga sibyangatoka erĩerya obunya-mutima bw'oyukasoma. 10Kusangwa bikahula ebyalya, n'erĩpũlya n'eriyikosa mĩsĩndo-mĩsĩndo. Ebĩ ni bihano by'erikwama erĩhĩka oko mugulu w'erĩtũngananĩa emyatsi yosĩ. 11Nĩkwa Kristo abĩrĩhĩka ng'Omũhererĩ Mukulu oko bahererĩ bosĩ w'emyatsi mibuya eyabĩrĩhĩka. Akakola omo Hema nene kwilaba eyindi, eyĩhĩkene kwilaba. Ni Hema eyitalukawa n'ebyala by'abandu, kandi si y'erihangika ly'ekihugo kino. 12Yesu mwatingira Ahabũyĩrĩre Kutsibu n'omusasi w'esyombene n'ow'ebyana by'esyonde, nĩkwa mwingira engendo nguma nyisa n'omusasi wuwe ĩyowene-wene, iniakabana erilama lya kera na kera busana netu. 13Kusangwa kumbe omusasi w'esyombene, n'esyonume, haguma n'erĩbũ ly'enyana bĩkalagalĩrĩbawa oko bandu ababĩrĩhalya, bikahigulabo n'erĩerya emibiri yabo, 14kumbe kwilaba aho, omusasi wa Kristo akeraya. Kristo omo Mũlĩmũ w'erikota mwayiha uku Nyamuhanga ng'obuhere obute ko kĩtĩngũ. Omusasi wuwe oyo, akeraya obunya-mutima bwetu oko mĩbĩrĩ eyĩkatwĩta, itwatoka erikolera Nyamuhanga oyuliho. 15Busana n'omwatsi oyũ, Yesu nĩ mũsanganĩa w'endagane nyihya-nyihya. Kusangwa oluholo lw'omundu lwabĩrĩtongolya abandu abahalaya omo ndagane y'erĩmbere. Neryo lino ababiribirikirwa na Nyamuhanga bakatoka eribana omũyĩsa w'erikota ogo Nyamuhanga alaga. 16Kusangwa ahali endagane y'ebindu, litolere ihabya oluholo lw'oyo walaga ebindu ebyo. 17Kusangwa erilaga ly'omwandu likabererera omo luholo lw'oyo walaga. Omugulu omundu oyo akineho, erilaga eryo siriri kw'endũndĩ. 18Neryo endagane y'erĩmbere moyahangana busana n'omusasi 19Kusangwa Musa, abere abĩkanganĩa oko bandu bosĩ obuli kihano ky'Emigambo, mwĩmya omusasi w'esyonyana haguma n'amagetsi, n'obweya bw'esyombũlĩ bw'engula n'ehĩsopo, neryo mwalagalĩryago oko kitabu ky'Emigambo n'oko bandu bosĩ. 20Mwabũga ati, Oyũ ni musasi w'endagane eyo Nyamuhanga abiribahana. 21Kandi mwalagalĩrya omusasi g'oko Hema n'ebindu byosĩ by'ekisomo. 22Kandi omo myatsi y'Emigambo, hakũhĩ n'ebindu byosĩ, bĩkerĩbawa omo musasi, kandi ebibi sibyebuyirawa ahate erĩũtĩka ly'omusasi. 23Neryo lyabya litolere ebĩsosekanĩo ebĩ by'ebindu by'elubula, ĩbyerĩbwa omo nzira eyĩ, nĩkwa eby'elubula bitolere amahere awalabĩre aya. 24Kusangwa Yesu mwatingira Ahabũyĩrĩre ahakokotĩbawa n'ebyala by'abandu, ahabya ekĩsosekanĩo ky'Ahabũyĩrĩre h'ekwenene, nĩkwa mwingira elubula aho akabanika embere sya Nyamuhanga busana netu. 25Nĩkwa Kristo mwatayiha esyongendo nyingi. Ng'Omũhererĩ Mukulu oko bahererĩ bosĩ abya akingira Ahabũyĩrĩre obuli mwaka haguma n'omusasi owate wuwe. 26Kumbe Kristo ng'abiriagalwa ngendo nyingi erĩtsũka ekiro ekihugo kyahangikawa n'erĩhĩka lino. Nĩkwa lino oko ndũlĩ y'emigulu, abiriminyikala ngendo nguma eriyiha busana n'erĩlũsya ebibi. 27Kandi kyahĩrawa busana n'abandu bosĩ bahole ngendo nguma, n'enyũma w'aho Nyamuhanga atswerebo. 28Litya Kristo nibya mwahabwa ngendo nguma eriheka ebibi by'abandu bangi. Kandi asyaminyikala engendo y'akabiri butsira eriheka ebibi, nikwa busana n'erĩlamya abakamulindirira.

will be added

X\