ABAEBRANIA 8

1Neryo enzumwa y'omwatsi tũkabũga yeyĩ: tuwite omũhererĩ mukulu oko bahererĩ bosĩ w'omũsĩndo oyũ. Ĩkere oko luhande lw'amali lw'ekĩtũmbĩ ky'Omwenye Obukulu omo lubula. 2Omũhererĩ mukulu oko bahererĩ bosĩ oyo, akakola omũbĩrĩ ahabũyĩrĩre, n'omo Hema y'ekwenene eyo Mukama ahanda, butsira bandu. 3Obuli mũhererĩ mukulu oko bahererĩ bosĩ, akahamulawa erihera olũsũnzo n'amahere uku Nyamuhanga. Neryo kitolere omũhererĩ mukulu oko bahererĩ bosĩ oyũ iniabya n'ekindu ky'eriha uku Nyamuhanga. 4Kumbe alibya muna-kihugo, kumbe siangabere mũhererĩ n'ahake. Kusangwa hali abahererĩ abakaha olũsũnzo uku Nyamuhanga ng'Emigambo ko yikategeka. 5Bakakola omo kĩsosekanĩo n'omo kyũtsũtsũ ky'emyatsi y'elubula. Ngoko Nyamuhanga ahana Musa omugulu abya akatsũka erihanda eHema ati, Ũlebaye, ukole emyatsi yosĩ omo lulengo olo wakanganĩbawa oko kitwa. 6Nĩkwa Yesu abiribana omũbĩrĩ mubuya w'obũhererĩ kwilaba aho, ngoko kandi Yesu nĩ mũsanganĩa w'endagane yowene kwilaba eyabo, kusangwa ihangene okw'erilaga libuya kw'aho. 7Kusangwa kumbe endagane y'erĩmbere yitabya mw'eky'erikungirwa, kumbe sihangabya obwaga bw'eyindi ndagane. 8Kusangwa Nyamuhanga akakunga abandu ati, Omwami Mukulu ati, Lebaya ebiro bikasa, Nage nasyayira endagane nyihya-nyihya n'ekĩtũnga kya Ĩsraelĩ, Kandi n'ekĩtũnga kya Yũda. 9Eyĩ siyendisyasosa endagane eyo nayira n'abotata wabo. Oko kiro ekyo nawatabo oko byala n'erisondolabo omo kihugo ky'eMĩsĩrĩ. Nĩkwa mobatakwama endagane eyo nahĩra kubo, Neryo Omwami Mukulu ati, Nage namaponabo. 10Neryo Omwami Mukulu ati, Enyũma w'ebiro ebyo, nasyayira endagane haguma n'ekĩtũnga kya Ĩsraelĩ; Nasyahĩra Emigambo yage omo malengekanĩa wabo, Kandi nasyasakayo omo mitima yabo. Nasyabya Nyamuhanga wabo, Nabo basyabya bandu bage. 11Nabo sibendĩsyakangĩrĩranĩa obuli mundu na mũlĩkyabo, Kutse obuli mundu na mugala wabo, bati, Muminye Omwami Mukulu, Kusangwa abosĩ basyanyiminya, Erĩtsũka oko muke erĩhĩka oko mukulu wabo. 12Nasyaganyira amalolo wabo, Kandi sindiendisyaswibuka ebibi byabo. 13Omugulu abũga ati, Endagane nyihya-nyihya, Nyamuhanga mwaganza ey'erĩmbere mo ngulukulu. Nĩkwa ekikabya kikulu-kulu, ekĩkakwa, kikasonda erihwaho.

will be added

X\