ABAEBRANIA 7

1Melkĩsedekĩ oyũ, abya mwami w'eSalemũ, kandi abya omũhererĩ wa Nyamuhanga Owendata Kutsibu. Neryo omugulu Abrahamũ abya akasubula akalũa eyo ayĩtĩra abami, mwahĩndana na Melkĩsedekĩ naye mwamutsumula. 2Kandi Abrahamũ mwamugabira ekihande kiguma eky'omw'ĩkũmĩ ky'ebyosĩ. Erĩna lya Melkĩsedekĩ riti, Omwami W'eritunganene; kandi abya mwami w'eSalemũ, erĩna liti, Omwami w'Obuholo. 3Melkĩsedekĩ siabya awite ĩse, isiawite nyĩnya isiawite abotata-kulu, isiawite omugulu abutawa kutse erihwa ly'engebe. Nĩkwa ahangikawa ng'Omugala wa Nyamuhanga. Akabya mũhererĩ ebiro byosĩ. 4Nĩkwa mũlebaye ngoko mundu oyũ abya mukulu. Abrahamũ, tata-kulu, mwamuha ekihande kiguma ky'omw'ĩkũmĩ ky'ebindu ebyo ahũnga. 5Kandi abana ba Lawĩ abali bahererĩ bakahanawa omo Migambo erĩmya ekihande kiguma ky'omw'ĩkũmĩ oko bandu abali b'ekihanda kyabo, nomo bangabya b'olubuto lwa Abrahamũ. 6Melkĩsedekĩ mwatabya w'ekihanda kyabo, nĩkwa mwĩmya ekihande kiguma ky'omw'ĩkũmĩ uku Abrahamũ, kandi mwatsumula omwenye ndagane ya Nyamuhanga. 7Nĩkwa butsira buhaka omundu muke akatsumulawa n'omukulu. 8Abahererĩ ni bandu bakahola nĩkwa bakahamba ekihande kiguma ky'omw'ĩkũmĩ. Nĩkwa kĩsakĩre ko Melkĩsedekĩ oyuliho, mwĩmya ekihande kiguma ky'omw'ĩkũmĩ. 9Kandi omundu anganabũga ati, omugulu Abrahamũ aliha ekihande kiguma ky'omw'ĩkũmĩ, ye Lawĩ (oyũkĩmayakyo) naye mwalihakyo. 10Kusangwa Lawĩ abya isialiabutwa, abya iniakine omo mubiri wa Abrahamũ omugulu Melkĩsedekĩ ahĩndana naye. 11Kumbe erĩhĩkana lyatokekana busana n'omũbĩrĩ w'obũhererĩ bwa Lawĩ, kusangwa Emigambo yahabawa n'abandu ba Ĩsraelĩ haguma n'obũhererĩ bwa Lawĩ, kumbe sihangabya obwaga bw'erĩhanganĩa ogundi mũhererĩ oko muhanda wa Melkĩsedekĩ oyute w'ekihanda kya Harũnĩ. 12Kusangwa omugulu obũhererĩ bukabindulawa, litolere eribindula Emigambo nibya. 13Kandi Omukama wetu, oyukahulawa omo myatsi eyĩ, abya w'ekindi kihanda ky'Abayũda. Kandi sihali mundu w'ekihanda ekĩ oyo wabya akahera amahere oko kiherero. 14Kusangwa kyasĩbwe ndeke kw'Omukama wetu ni w'omo kihanda kya Yũda. Musa mwatahula abahererĩ omo kihanda ekĩ. 15Omwatsi akũmayĩre ndeke ngoko ogundi mũhererĩ abirihuluka, oyuli nga Melkĩsedekĩ. 16Mwatayirwa mo mũhererĩ omo bihano by'abandu, nĩkwa mwabya mũhererĩ omo bũtokĩ bw'engebe eyitendisyahwa. 17Kusangwa kĩkatũlawa busana naye kiti, Uli mũhererĩ kera na kera ng'omuhanda w'obũhererĩ bwa Melkĩsedekĩ. 18Kusangwa ekihano ky'erĩmbere kĩkalũsĩbawaho busana n'obolo bwakyo, kandi sikiri n'endũndĩ. 19Kusangwa Emigambo ya Musa moyĩtahĩkanĩa kindu. Nĩkwa lino amaha awalengĩre abiriretwa; kandi busana nago tukasegera hakũhĩ na Nyamuhanga. 20Kandi hali erĩlahĩrya lya Nyamuhanga. 21Kusangwa abandi bahererĩ mobahĩrwaho butsira erĩlahĩrya. Nĩkwa Yesu mwahĩrwa mo mũhererĩ n'erĩlahĩrya, kusangwa Nyamuhanga mwamubwira ati, Omwami Mukulu abĩrĩlahĩrya, Isiendĩsyakũbyalyo ati, Uli mũhererĩ kera na kera. 22Ekĩ kikatuma ndeke Yesu iniabya muwato w'endagane eyĩlabĩre eyindi. 23Kandi abahererĩ ba kera babya bangi kusangwa babya bakahola isibetoka erikola omũbĩrĩ w'ebiro byosĩ. 24Nĩkwa Yesu kusangwa akakota syalĩũmbaya erikola omũbĩrĩ wuwe w'obũhererĩ. 25Busana n'ekyo akatoka erĩlamya lino n'ebiro byosĩ abakahĩka uku Nyamuhanga busana naye. Kandi akakota busana n'erisabirabo. 26Kusangwa Yesu yo Mũhererĩ Mukulu oko bahererĩ bosĩ, oyutolere. Kandi abũyĩrĩre, oyute ko mwatsi, oyute ko kibi, oyo wabirihigulwa oko bakola-nabi, n'erĩhamĩbwa endata oko matũkũ. 27Yesu siali ng'abandi bahererĩ bakulu oko bahererĩ bosĩ. Ibo bakahera amahere ebiro byosĩ busana n'ebibi byabo, n'akandi busana n'ebibi by'abandu. Kusangwa Kristo mwahera obuhere bo ngendo nguma nyisa omugulu ayiha. 28Kandi Emigambo ya Musa ĩkahĩra abandu abali bolo, ng'abahererĩ bakulu oko bahererĩ bosĩ. Nĩkwa ekĩnywa ekyalahĩrĩbawa mokyahĩka enyũma w'Emigambo, kĩkahĩra Omugala, oyo wayirawa ahĩkene, erĩhĩka na kera.

will be added

X\