ABAEBRANIA 6

1Neryo tugende embere omo myatsi eyĩhĩkene, tũsĩganaye erĩkangĩrĩrya ly'erĩtsũka ly'engulu ya Kristo. Situsibe omo myatsi eyĩ y'ekibanza: eribinduka n'erireka ebibi by'emĩbĩrĩ y'obusa, n'erĩkĩrĩrya uku Nyamuhanga, 2n'erĩkangĩrĩrya ly'erĩbatĩsya mũsĩndo-mũsĩndo, n'ery'erĩhĩra kw'ebyala, n'erĩlũbũka ly'abaholĩ, n'eritswera lya kera na kera. 3Netu twasyakola tutya, n'erilaba embere, Nyamuhanga amalĩga. 4Kusangwa siritokekene erĩsũbya abandu b'okw'ibinduka, ababiritoga kwenene. Kusangwa babya erĩmbere omo kyakakala kya Nyamuhanga. Babirirenga olũsũnzo lw'elubula, kandi babirisangira oko Mũlĩmũ Abũyĩrĩre. 5Kandi babirirenga ebibuya by'ekĩnywa kya Nyamuhanga, kandi babirirenga obũtokĩ bw'omugulu owakandisyasa. 6Neryo bamabitoga, siryetokekana kubo eriswabinduka n'erireka ebibi kusangwa bakaswabamba Omugala wa Nyamuhanga oko musalaba, n'eriswamuhemula. 7Nyamuhanga akatsumula ekitaka ekikabana embũla eyikawa kukyo engendo nyingi, ekitaka ekyo kĩkalasaya esyombuto syowene busana n'abakalima kukyo. 8Nĩkwa ekitaka ekyo kyamalasya amahwa n'amatolũ, sikiwite ndũndĩ. Kiri hakũhĩ n'eritakirwa na Nyamuhanga, n'endũlĩ yakyo nĩ'hĩsĩbwa. 9Nomo twangabũga tutya, abanze, nĩkwa busana nenyũ, tũnasĩ ndeke ngoko munawite emyatsi yowene eyikakwama erilama. 10Kusangwa Nyamuhanga sialikola ekitatunganene. Siangibirirwa omũbĩrĩ wenyũ, n'olwanzo olo mwakangaya busana naye, imwabirikolera, kandi mukinakolera abandu ba Nyamuhanga. 11Kandi twanzĩre kutsibu obuli mundu g'ũkw'ĩnywe akangaye omũhwa wuwe erĩhĩka oko ndũlĩ, n'erĩberererya amaha wuwe. 12Tuti simubye n'obũtowa nĩkwa mubye ĩmũkagerereraya abĩkĩrĩraya n'erĩyĩyĩnĩa n'eriangirira ebyo Nyamuhanga alaga. 13Kusangwa omugulu Nyamuhanga alaga Abrahamũ, mwayĩlahĩryako, kusangwa sihabya ogundi mukulu ukw'iye w'erĩlahĩryako. 14Mwabũga ati, Kwenene nasyakutsumula, kandi kwenene nasyakanyĩrĩrya abana bawe. 15Abrahamũ mwalindirira n'eritindaluha, neryo mwasunga ebyo Nyamuhanga alaga. 16Kusangwa abandu bakalahĩraya oko mundu mukulu kubo, kandi erĩlahĩrya likabuga obuhaka. 17Litya Nyamuhanga abya anzĩre erĩkangya abalagawa ngoko ate angabindula eriyisoha liwe, neryo mwalahĩrya kulyo. 18Neryo hali myatsi ĩbĩrĩ eyĩ eyitetoka eribinduka, kandi Nyamuhanga sialitoka eribiha muyo. Busana n'emyatsi eyĩ, tukahanda emitima yo kutsibu, ĩtwe twabirisagira uku Nyamuhanga, tuhambe ndeke amaha awabĩrĩhĩrwa embere syetu. 19Tuwite amaha aya awakasĩkaya emitima yetu. Amaha aya ni w'ekwenene, asĩkĩre, kandi akingira enyũma w'ekĩsũkũlĩryo ky'eHekalũ, 20aho Kristo abiriingira busana netu, iniabiribya mũhererĩ mukulu oko bahererĩ bosĩ, wa kera na kera omo muhanda wa Melkĩsedekĩ.

will be added

X\