ABAEBRANIA 5

1Obuli mũhererĩ mukulu oko bahererĩ bosĩ akayisogawa omo katĩkatĩ k'abandu, akahĩrawa erikolera Nyamuhanga busana n'abandu. Naye akaha olũsũnzo n'amahere busana n'ebibi. 2Akatoka erikola lyolo-lyolo n'abandu abatasĩ kindu n'abakatala, kusangwa naye ni molo nibya. 3Neryo litolere iniahera amahere busana n'ebibi biwe ngoko akaherera ebibi by'abandu. 4Kandi sihali omundu oyukayisoga erĩsĩkĩbwa ng'omũhererĩ mukulu oko bahererĩ bosĩ, nĩkwa ni Nyamuhanga oyukabirikira omundu busana n'omũbĩrĩ oyũ, ngoko abirikira Harũnĩ. 5Litya Kristo mwatayĩhamya eribya mũhererĩ mukulu oko bahererĩ bosĩ, nĩkwa Nyamuhanga mwamubwira ati, Uli Mugala wage, Namakubuta mũnabwĩre. 6Kandi mwabũga ehandi ati, Uli mũhererĩ kera na kera Ng'omuhanda w'obũhererĩ bwa Melkĩsedekĩ. 7Omugulu Yesu abya eno ng'omundu, mwasaba n'eriremba-lemba uku Nyamuhanga, omw'ilakirira n'emĩsonĩa, ukw'oyo abya n'amaka w'erĩmũlamya oko luholo, kandi Nyamuhanga mwamowa busana n'obugenge buwe. 8Nomo anabya Mugala wa Nyamuhanga, mwiga erĩowa omo myatsi agalawamo. 9Kandi abere abiyirwa m'oyũhĩkene, mwabya nzũko y'erilama erya kera na kera busana n'abosĩ abakamowa. 10Nyamuhanga mwamwahula mo mũhererĩ mukulu oko bahererĩ bosĩ omo muhanda wa Melkĩsedekĩ. 11Busana n'omwatsi oyũ tuwite bingi by'erĩbũga, kandi bĩkalĩre erĩbamĩnyĩsyabyo, kusangwa mwabiribya n'obũtowa. 12Kusangwa manga-hano ĩnywe mwangabere abakangĩrĩrya, kwesĩ mwangaswakangĩrĩrĩbwa emyatsi y'erĩmbere y'ebĩnywa bya Nyamuhanga. Mukinatolere amabere butsira akalyo. 13Kusangwa oyukalya amabere akine mwana, isialiabegera ebĩnywa by'eritunganene. 14Nĩkwa akalyo ni k'abandu bakulu, ababirikola n'erĩgĩsĩbwa omo myatsi mingi, ibabiritoka erisombola ekibuya n'ekibi.

will be added

X\