ABAEBRANIA 4

1Nyamuhanga abirituha endagane y'eriluhuka liwe. Neryo tubahe hakasyabya omuguma g'ũkw'ĩnywe oyukabula eriingira omw'iluhuka eryo. 2Kusangwa Engulu Yowene moyatũhĩkako ngoko yahĩka kubo; nĩkwa ekinywa ekyo bowa mokitetawatĩkyabo kusangwa mobagana erĩkĩrĩryakyo. 3Nĩkwa ĩtwe twĩkĩrĩraya tukingira omw'iluhuka lya Nyamuhanga; ngoko kĩsakĩre kiti, Monalahĩrya omw'ihitana lyage nyiti, Sibendisyingira omo kihugo ekyo aho nangaherebo eriluhuka. Mwabũga atya nomo emĩbĩrĩ yiwe yanahwa oko mugulu ahangika ekihugo. 4Kusangwa kĩbũgĩre ehandi busana n'ekiro ky'ebirinda kiti, Nyamuhanga mwaluhuka oko kiro ky'ebirinda oko mĩbĩrĩ yiwe yosĩ akola. 5Kandi busana n'omwatsi oyũ ati, Sibendisyingira omo kihugo ekyo aho nangaherebo eriluhuka. 6Neryo abakangĩrĩrĩbawa Engulu Yowene erĩmbere mobatingira omw'iluhuka eryo busana n'erĩtendĩkĩrĩrya. Nĩkwa abandi bakingira omw'iluhuka eryo. 7Neryo Nyamuhanga akahula kandi ekiro ati, Mũnabwĩre. Enyũma w'ebiro bingi Nyamuhanga mwabũga omo bĩnywa bya Dawĩdĩ ati, Lero mũnabwĩre, mwamowa omulenge wuwe, Sĩmũkalaye emitima yenyũ. 8Kusangwa kumbe Yosũa aha abandu eriluhuka lya Nyamuhanga, kumbe Nyamuhanga siangasyahula ekindi kiro enyũma w'aho. 9Neryo hane eriluhuka busana n'abandu ba Nyamuhanga eriri ng'eriluhuka ly'eSabato. 10Kusangwa oyukingira omw'iluhuka lya Nyamuhanga naye akaluhuka oko mĩbĩrĩ yiwe, ngoko Nyamuhanga aluhuka oko mĩbĩrĩ yiwe. 11Neryo tuyitsinge kutsibu eringira omw'iluhuka eryo. Sihabye omundu oyukagana erĩowa ngoko bakola, n'eritaluka eriingira mulyo. 12Kusangwa ekĩnywa kya Nyamuhanga kiriho, kandi kinemukola omũbĩrĩ, kandi kĩtwĩre kwilaba omũyalĩ owawite amoya abiri. Kikatsimita erĩhĩka okw'igaba omutima n'ekĩrĩmu; kandi erĩhĩka okw'igaba esyonungo n'omungoso. Kandi kikatoka eritswera erisonda n'amalengekanĩa g'omutima. 13Sihali ekĩhangĩkĩre ekĩbĩsamĩre uku Nyamuhanga. Nĩkwa ebyosĩ bisanzukere, kandi biminyikere omo meso wa Nyamuhanga. Kandi twasyayĩkangya ukw'iye. 14Tuhambe ndeke emyatsi eyo twabĩrĩkĩrĩrya, kusangwa tuwite omũhererĩ mukulu oko bahererĩ bosĩ, oyo wabirilaba omo lubula, Ye Yesu Mugala wa Nyamuhanga. 15Kusangwa omũhererĩ wetu mukulu oko bahererĩ bosĩ si mundu oyũtetũkwĩra obũlĩge omo bolo-bolo bwetu. Nĩkwa tuwite omũhererĩ mukulu oko bahererĩ bosĩ oyo walengawako omo myatsi y'emĩsĩndo yosĩ eyikatulengako netu, nĩkwa mwatakola ebibi. 16Neryo tuyitwale hakũhĩ n'obwĩranda oko kĩtũmbĩ ky'obwami kya Nyamuhanga, ahali olukogo. Tutoke eribana eriganyira, kandi twangirire olukogo lw'erĩtũwatĩkya oko mugulu w'obwaga.

will be added

X\