ABAEBRANIA 3

1Neryo balĩkyetu, bana ba Nyamuhanga, abo Nyamuhanga abirikira nibya, mũganĩraye ndeke Yesu, omukwenda n'omũhererĩ mukulu oko bahererĩ bosĩ, ow'emyatsi eyo tũkĩkĩrĩraya. 2Yesu abya butsira eriregula uku Nyamuhanga, ngoko Musa naye abya butsira eriregula omo nyũmba yosĩ ya Nyamuhanga. 3Nĩkwa Yesu atolere eribana olukengerwa lunene kwilaba Musa, ngoko mũhĩmbĩ w'enyũmba akasĩkĩbawa kwilaba enyũmba. 4Kusangwa obuli nyũmba ĩkahĩmbawa n'omundu, nĩkwa Nyamuhanga nĩ mũhĩmbĩ w'emyatsi yosĩ. 5Neryo Musa abya butsira eriregula ng'omugombe omo nyũmba yosĩ ya Nyamuhanga; Musa mwatũla emyatsi eyo Nyamuhanga akasyabũga enyũma. 6Nĩkwa Kristo abya butsira eriregula ng'Omugala oyũkategaya enyũmba ya Nyamuhanga. Netu tuli enyũmba eyo, twamahanda omutima, kandi tukayiketera n'eriyihalamba omo maha wetu. 7Neryo, ngoko Mũlĩmũ Abũyĩrĩre akabũga ati, Lero mũnabwĩre, mwamowa omulenge wuwe, 8Sĩmũkalaye emitima yenyũ ng'omugulu bayisamambula uku Nyamuhanga. Ng'ekiro balengawako omo mbwarara. 9Eyo abotata wenyũ banyĩsĩsĩrĩraya n'erinyirengako. Mobalangira emĩbĩrĩ yage emyaka makũmĩ ani. 10Neryo monahitana oko bandu abo, Monabũga nyiti, Bakatala ebiro byosĩ omo mitima yabo; Sibetaminya esyonzira syage. 11Monalahĩrya omw'ihitana lyage nyiti, Sibendisyingira omo kihugo ekyo, ekyo nangaherebo eriluhuka. 12Neryo balĩkyetu, mũtegaye, sihabye mundu muguma omo katĩkatĩ kenyũ, ow'omutima mubi n'ow'erĩtendĩkĩrĩrya, ebikaleka akalũa uku Nyamuhanga oyuliho. 13Nĩkwa mũsĩkanaye emitima omugulu bukinahulawa mũnabwĩre, hakasyabya omundu muguma omo katĩkatĩ kenyũ akatebĩbwa n'ebibi n'erĩkalya omutima wuwe. 14Kusangwa twabirisangira uku Kristo, twamasĩka ndeke omw'iyiketera lyetu erĩhĩka oko ndũlĩ. 15Ngoko Amasako akabũga ati, Mũnabwĩre mwamowa omulenge wuwe, Sĩmũkalaye emitima yenyũ ng'omugulu bayisamambula uku Nyamuhanga. 16Kusangwa ni bahi abowa Nyamuhanga, n'eriyisamambula ukw'iye kwehĩ? Kwenene si ba bosĩ abalũa eMĩsĩrĩ haguma na Musa kwehĩ? 17Nyamuhanga ahitana uku bahi oko myaka makũmĩ ani kwehĩ? Si ba bandu abakola ebibi abahwera omo mbwarara kwehĩ? 18Mwatahula abagana erĩowa kwehĩ omugulu alahĩrĩraya ati, Sibendisyingira n'ahake omw'iluhuka liwe. 19Neryo tukalangira ko bataluka eriingira busana n'erĩtendĩkĩrĩrya lyabo.

will be added

X\