ABAEBRANIA 2

1Busana n'omwatsi oyũ, litolere ĩtwateya ndeke ebyo twabĩrĩowa, tukasyayihengeka, tũkalũa oko kwenene. 2Kusangwa ekĩnywa ekyabũgawa n'abamalaĩka mokyahangana ndeke, n'obuli ĩlolo n'erĩtendĩowa mobyasuyirwa ngoko litolere. 3Netu twasyabala tuti twamapona erilama lĩnene ringaha kwehĩ? Omukama mwatsũka erĩtũla engulu y'erilama erĩ, neryo abamowa mobahanganĩayo ndeke. 4Kandi Nyamuhanga mwatũlago haguma nabo iniakakola ebiminyikalo, by'obũtokĩ, n'eby'eriswekera, n'ebitiko-tiko mĩsĩndo-mĩsĩndo. Kandi mwaha olũsũnzo lw'Omũlĩmũ Abũyĩrĩre ng'erisonda liwe. 5Kusangwa Nyamuhanga mwatahĩra abamalaĩka mo bakama b'ekihugo ekyo abya akandihangika, ekyo tukahula. 6Kusangwa kĩsakĩre kiti, Ko mundu nĩkĩ kwehĩ? uti ukamwibuka kwehĩ? Kutse omwana w'omundu nindi kwehĩ? uti ukamutsomana kwehĩ?. 7Wabirimuyira mo muke oko bamalaĩka busana n'akatambĩ kake; Kandi wabĩrĩmũsĩngya omo lukengerwa n'erĩsĩkya ly'Omwami, Wabĩrĩmũhĩra mo mũtabalĩ oko myatsi wahangika, 8Wabĩrĩhĩra emyatsi yosĩ omo hamũlĩ yiwe. Kusangwa omugulu ahĩra emyatsi yosĩ omo hamũlĩ yiwe, mwatasĩganĩa kindu ekite omo hamũlĩ yiwe. Nĩkwa lino situlitwalangira emyatsi yosĩ omo hamũlĩ yiwe. 9Nĩkwa tukalangira Yesu, oyo wayirawa mo muke oko bamalaĩka busana n'akatambĩ kake, iniatoka omo lukogo lwa Nyamuhanga erihola busana n'abandu bosĩ. Neryo Yesu busana n'eriagalwa liwe ly'oluholo, abiribana olukengerwa n'erĩsĩkya ly'Omwami. 10Kusangwa lyabya litolere busana na Nyamuhanga, oyo wahangika ebindu byosĩ n'oyũkategaya ebindu byosĩ, eriyira Yesu mo mundu oyũhĩkene busana n'eriagalwa liwe. Neryo Yesu oyo wakokotaya erilama lyabo, atoke erireta abana bangi erisangira olukengerwa luwe. 11Kusangwa oyukahigula n'abakahigulawa bawite Tata muguma; busana n'omwatsi oyũ, Yesu sialibana esĩsonĩ eriahulabo mo bagala babo, 12ati, Nasyakanganĩa erĩna lyawe oko bagala betu, Nasyakwimbira n'erikupipa embere w'endeko yosĩ. 13N'akandi ati, Nasyayiketera Nyamuhanga. N'akandi ati, Ĩngye yono n'abana abo Nyamuhanga abirimba. 14Neryo kusangwa abana ni bandu b'omubiri n'omusasi, Yesu ĩyowene mwĩmya omubiri n'omusasi ng'abo. Mwakola atya iniatoka omo luholo luwe erĩherya Satanĩ oyo wabya n'obũtokĩ bw'oluholo. 15Kandi iniatoka eribohola abosĩ ababya ng'abakobe omo biro byabo byosĩ busana n'eriubaha oluholo. 16Kusangwa kwenene si bamalaĩka bo akawatĩkaya, nĩkwa kĩsakĩre kiti, Akawatĩkaya abana ba Abrahamũ. 17Kyaleka Yesu iniayirwa ng'abalĩkyabo omo myatsi yosĩ, kandi iniatoka eribya omũhererĩ mukulu oko bahererĩ bosĩ oyukaganyira, n'oyuteregula omo mũbĩrĩ wa Nyamuhanga, ebibi by'abandu bibuyirawe. 18Kusangwa iye abiriagalwa omw'irengwako, akatoka erĩwatĩkya abakalengawako.

will be added

X\