ABAEBRANIA 13

1Mwanzane ebiro byosĩ ng'abalĩkyetu. 2Simwibirirawe erĩkokya ab'ehandi, kusangwa abandi babĩrĩkokya abamalaĩka bo batya ĩsĩbasĩbo. 3Mwibuke abali omo mũlĩkĩ nga muli haguma nabo omo mũlĩkĩ, kandi mwibuke abakagalĩbawa, nga mũkagalĩbawa mutya omo mubiri. 4Abandu bosĩ bakenge erĩherũkya, n'engyingo yabo ibye yabo ĩbobene-bene; kusangwa Nyamuhanga asyatswera ab'amaragane n'abasĩngĩrĩ. 5Simukwamirire erianza esyofranka, nĩkwa mutsemere ebyo muwite. Kusangwa Nyamuhanga abĩrĩbũga ati, Sindiendisyakuleka na kera, kandi, sindiendĩsyakũsĩganĩa n'ahake. 6Kikaleka ĩtwabũga butsira eriubaha tuti, Omwami Mukulu nĩ mũwatĩkya wage, sindiendisyubaha! Kw'abandu banganyikolakĩ kwehĩ? 7Mwibuke abasondolĩ benyũ, ababaletera ekĩnywa kya Nyamuhanga. Kandi mwibuke emigendere yabo n'ebyo bakola, mũgerereraye erĩkĩrĩrya lyabo. 8Yesu Kristo sialihinduka; mũlĩgolo na mũnabwĩre, ega na kera, ikw'ane atya. 9Simutwalawe omw'ĩkangĩrĩrya ly'emĩsĩndo-mĩsĩndo n'ery'ehandi. Kusangwa lyowene emitima yenyũ ĩsĩkĩbawe n'olukogo lwa Nyamuhanga. Sĩyĩsĩkĩbawe omo myatsi y'ebyalya, eyitereta mugaso oko bakakwamayo. 10Abo abakakola omũbĩrĩ w'ehema sibawite ehamũlĩ y'erirya oko buhere obuli oko kiherero kyetu. 11Omũhererĩ Mukulu oko bahererĩ bosĩ akaleta omusasi w'esyonyama oko Habũyĩrĩre ng'obuhere busana n'ebibi. Nĩkwa ebĩnda by'esyonyama esĩ byabya ĩbĩkahĩsĩbawa ekyaswa ky'ekilaliriro. 12Neryo Yesu nibya mwagalwa eyĩhya oko lũkyo lw'omũyĩ, iniatoka erihigula abandu omo musasi wuwe ĩgowene. 13Neryo, tũmwegaye ekyaswa ky'omũyĩ, erihemulwa haguma naye. 14Kusangwa eno situwite mũyĩ owakakota, nĩkwa tukasonda-sonda omũyĩ owakandisyasa. 15Neryo busana na Yesu, tuhe eripipa lyetu ng'obuhere uku Nyamuhanga. Kandi emirenge yetu ipipe erĩna liwe. 16Simwibirirawe erikola ebibuya n'erĩwatĩkanĩa, kusangwa ebĩ biri ng'amahere awakatsemesaya Nyamuhanga. 17Mowe abakabasondola, kandi mukole ebyo bakababwira. Bakategaya emitima yenyũ, ng'abandu abakandĩsyakanganĩa Nyamuhanga ebyo bakola. Neryo bakole batya n'obutseme butsira obũlĩge. Bamakola n'obũlĩge sibwendibaletera ndũndĩ. 18Mubye mukatusabira, kusangwa tũnasĩ tuwite obunya-mutima bowene, ĩtwanzĩre erikola ebibuya omo myatsi yosĩ. 19Kandi ngabahatikana kutsibu musabe, Nyamuhanga ĩnĩanyĩsũbya ewenyũ yo lũba. 20Nyamuhanga abĩrĩlũbũkya Omukama wetu Yesu oko baholĩ, oyuli Mũlĩsya mukulu busana n'erĩũta omusasi wuwe omo ndagane ya kera na kera. Neryo Nyamuhanga w'obuholo, 21abahe emyatsi yosĩ eyitolere busana n'erikola erisonda liwe, akole omwisi wetu ebĩkamũtsemesaya. Akole ebĩ busana na Yesu Kristo; ukw'iye habye olukengerwa na kera na kera. Amina. 22Nĩkwa ngabahatikana, balĩkyetu, nyiti mowe ekĩnywa kyage ky'eribahana, kusangwa nabiribasakira ebĩnywa bike. 23Muminye ngoko mũlĩkyetu Tĩmoteo abiriboholwa; neryo Tĩmoteo amasa lũba, asyabya nage ekiro nasyabasunga. 24Mũkeraye abasondolĩ benyũ bosĩ, n'abandu bosĩ ba Nyamuhanga. Abali eĨtalĩa bakabakeraya. 25Olukogo lwa Nyamuhanga lubye n'ĩnywe bosĩ.

will be added

X\