ABAEBRANIA 12

1Nĩkwa ĩtwe, kusangwa tũtĩmbĩrweko n'endeko nene y'abalangĩrĩ, tũyĩlũsaye kw'ebyosĩ ebĩkatũkakĩraya, n'ebibi ebikatuhamba, tutibite n'erĩyĩyĩnĩa omo matangwa awali embere syetu. 2Neryo tũhĩre ameso wetu uku Yesu oyukatuleta okw'ĩkĩrĩrya n'oyũkaberererayalyo. Kusangwa Yesu mwayĩyĩnĩa oko musalaba, abya asĩ obutseme obwasyabya buwe, kandi mwatalebya esĩsonĩ syago nga kindu. Lino ĩkere oko luhande lw'amali lw'ekĩtũmbĩ ky'obwami kya Nyamuhanga. 3Neryo mũganĩraye Yesu oyo wayĩyĩnaya omo bũyĩgũ bw'abakola-nabi, neryo simuluhe kutse erioloba omo mitima yenyũ. 4Omo malwa wenyũ n'ebibi, sĩmwetahĩka aho bakũta omusasi wenyũ. 5Mwabiribirirwa ebĩnywa ebyo ebĩkasĩkaya omutima, ebĩkabũgawa nenyũ ng'abagala biti, Mugala wage, supone erisuyira ly'Omwami Mukulu, Kutse suleke omutima erioloba omugulu akakukunga. 6Kusangwa Omwami Mukulu akakunga oyo anzĩre, Kandi akaswĩraya obuli mugala oyũkamũkokaya. 7Neryo mũyĩyĩnaye omw'ikungwa erĩ, kusangwa Nyamuhanga akabakola ng'abagala buwe. Kusangwa omugala ni wahi oyo tata wuwe sialikunga kwehĩ? 8Nĩkwa mwamabya butsira erikungwa haguma n'abandi bosĩ, kwesĩ isimuli bagala, ĩmuli basa-na-nyĩnya. 9Kandi twabya n'abotata wetu b'ekihugo ibakatukunga, netu motwakengabo. Sĩtwangowa kwilaba aho Tata w'ebĩrĩmũ byetu, itwabyaho kwehĩ? 10Kusangwa abotata wetu mobatukunga akatambĩ kake ngoko baganĩraya bati litolere. Nĩkwa Nyamuhanga akatukunga eritukola ndeke, itwatoka erisangira obũbũyĩrĩre buwe. 11Erikunga lyosĩ riri nga bũlĩge oko katambĩ kake, butsira obutseme. Nĩkwa enyũma likaleta emĩbĩrĩ y'obuholo n'eritunganene omo mitima yabo, ukw'abo babĩrĩkangĩrĩrĩbwa mulyo. 12Neryo mũsĩkaye ebyala byolo-byolo n'amarwĩ awakatitimana! 13Mubye mukakwama enzira eyitunganene, ekirema sĩkĩkwe, nĩkwa kĩlamĩbawe. 14Mukwamirire n'omũhwa eribya n'obuholo n'abandu bosĩ, kandi mukwamirire eribya n'engebe ĩbũyĩrĩre. Oyũtabũyĩrĩre siendisyalola oko Mukama. 15Mũlebaye sihabye omundu oyukabula oko lukogo lwa Nyamuhanga. Kandi mũlebaye sihabye omundu oyũkalĩre omo mutima, oyukaleta obũlĩge, neryo abangi bakatsanda. 16Kandi sihabye mundu mũsĩngĩrĩ, kutse oyutekenga Nyamuhanga nga Esaũ, oyo wagũlaya omwandu wuwe w'obukulu busana n'ekisa kiguma. 17Kusangwa mũnasĩ ngoko enyũma w'aho, mwasonda eribana omũyĩsa wa tata wuwe nĩkwa mwatalĩgĩrwa. Kusangwa mwatabana enzira y'eribindula omwatsi akola, nomo anasondayago omw'irira ly'emĩsonĩa. 18Kusangwa sĩmwetahĩka oko kitwa ekyangatũlwako, n'oko muliro owakagulumira, n'oko mwĩrĩmya n'ekĩtũ kĩkĩnĩre, n'oko kanyabungu, 19n'omulenge w'engubi, n'omulenge w'oyũkabũga. Omugulu abandu bowa omulenge oyo mobalemba-lemba bati, omulenge oyo syasyeswabwirabo ekindi kĩnywa. 20Kusangwa mobataluka erĩowa eritegeka eryo lyabũga liti, Enyama yamatũla oko kitwa ekyo, ĩyĩtwa omo mabwe. 21Omwatsi oyo abya akũbahya abandu bo kutsibu. Kyaleka Musa ĩnĩabũga ati, Namubaha kutsibu n'erititimana. 22Nĩkwa ĩnywe mwabĩrĩhĩka oko kitwa ky'eSĩonĩ, n'omũyĩ wa Nyamuhanga oyuliho, n'oko Yerũsalema y'elubula, n'oko bamalaĩka abateganzika. 23Kandi mwabĩrĩhĩka okw'ĩhĩndana ly'ehimbere hya Nyamuhanga, ehĩsakĩre elubula, kandi mwabĩrĩhĩka uku Nyamuhanga Omũtswerĩ w'abandu bosĩ, n'oko bĩrĩmũ by'abandu batunganene abahĩkene. 24Kandi mwabĩrĩhĩka uku Yesu omũsangama w'erilagana lihya-lihya, n'oko musasi ow'erĩlagalĩrya, owakakanganaya omwatsi owene kwilaba erĩtũlago ly'omwatsi g'omusasi wa Abele. 25Mũlebaye simugane oyũkabũga. Abagana erĩowa oyo wabũga ekĩnywa kya Nyamuhanga oko kihugo, mobatabala. Kwilaba aho netu sitwendisyabala twamagana erĩowa omulenge w'oyo w'elubula. 26Oko mugulu oyo, omulenge wa Nyamuhanga mwasũka-sũkanĩa ekihugo, nĩkwa lino abirilaga ati, Nasyasũka-sũkya kandi, butsira ekihugo ĩkyokyene, nĩkwa n'olubula nibya. 27Omugulu akabũga ati, Akandi, akakangaya ndeke ngoko ebyahangikawa ebĩkasũka-sũkanĩbawa byasyalũsĩbwaho, neryo ebindu ebyo ebitetoka erĩsũka-sũkanĩbwa ĩbyasĩgalaho. 28Neryo tubye n'ewasĩngya, kusangwa tukabana obwami obutetoka erĩsũka-sũkanĩbwa. Tukolere Nyamuhanga n'erĩmũtsemesya, tumukenge n'erĩmũsĩkya. 29Kusangwa Nyamuhanga wetu ni muliro owakatogotaya.

will be added

X\