ABAEBRANIA 11

1Nĩkwa erĩkĩrĩrya ni 'minya kũndũ emyatsi eyo tũkahĩra kw'amaha, kandi nĩ'riga kwenene emyatsi eyo tutelangira. 2Kusangwa busana n'erĩkĩrĩrya lyabo, abandu ba kera mobabana erĩsĩmwa lya Nyamuhanga. 3Ni busana n'erĩkĩrĩrya tukaminya kw'ekihugo kyahangikawa omo kĩnywa kya Nyamuhanga, neryo ebikalolawako mobyalũa ukw'ebyo ebitelolawako. 4Busana n'erĩkĩrĩrya Abele mwaherera Nyamuhanga obuhere bowene kwilaba obwa Kaĩna. Neryo Nyamuhanga mwamwahula mo mutunganene kusangwa Nyamuhanga mwatũlago kw'amalĩga olũsũnzo luwe. Kandi busana n'erĩkĩrĩrya liwe, Abele nomo anahola, akĩnabũga. 5Busana n'erĩkĩrĩrya, Enoka mwatwalwa endata butsira erihola, naye mwatabanika, kusangwa Nyamuhanga mwamutwala endata; nĩkwa embere w'eritwalwa endata liwe, mokyatũlwa busana naye bati mwatsemesya Nyamuhanga. 6Kandi ahate erĩkĩrĩrya omundu siangatoka erĩtsemesya Nyamuhanga, kusangwa litolere oyũkahĩka uku Nyamuhanga inĩkĩrĩrya ko Nyamuhanga aneho, kandi kw'akahemba abakamusonda-sonda. 7Kandi busana n'erĩkĩrĩrya, Noa iniakahanawa na Nyamuhanga busana n'emyatsi eyite yalolwako, mwakenga Nyamuhanga; neryo mwakokotya obwato busana n'erĩlamya ekĩtũnga kiwe. Busana n'ekĩ mwahĩra olubanza oko kihugo, neryo mwabana eritunganene erĩkahĩka omo nzira y'erĩkĩrĩrya. 8Busana n'erĩkĩrĩrya, Abrahamũ omugulu abirikirawa, mwowa, n'eriya oko kihugo ekyo Nyamuhanga amulaga erimuhakyo. Neryo mwalũa omo kihugo kiwe, ĩsĩasĩ eyo akaya. 9Busana n'erĩkĩrĩrya, Abrahamũ mwĩkala ng'omubunga omo kihugo ekite kiwe, ekyalagawa. Mwĩkala omo mahema haguma na Ĩsaka, na Yakobo, abasangira erilaga eryo. 10Kusangwa Abrahamũ abya akalindirira omũyĩ W'ebibanza ebĩsĩkĩre. Omũyĩ ogo Nyamuhanga akokotaya n'erĩhĩmbago. 11Busana n'erĩkĩrĩrya, Sara mwabana amaka w'eriheka obukule, nomo anabya ĩnĩabĩrĩlabya omugulu w'eributa abana, kusangwa mwayiketera Nyamuhanga oyo wamulaga. 12Neryo Abrahamũ nomo mubiri wuwe abya ng'abirihola, mwabuta abandu bangi ng'esyongũnũnũ esiri omo kyanya, abateganzika ng'emisege eyiri oko mũsĩke w'engetsi. 13Abosĩ aba mobahola omw'ĩkĩrĩrya, isibetabana ebyalagawa na Nyamuhanga, nĩkwa mobalangirabyo hali, n'erĩrĩgabyo, kandi mobakangya ngoko babya balalĩrĩrĩ, n'abĩkalanĩ muna-kihugo. 14Kusangwa abakabũga emyatsi eyĩ, bakakangaya ndeke ngoko bakaronda ekihugo kyabo. 15Kandi kumbe balibya bakibuka ekihugo ekyo balũamo, nga babiribana omwanya w'erisuba mukyo. 16Nĩkwa lino, bakwĩre olukando lw'ekihugo kyowene ukw'aho, ekihugo ky'elubula. Kikaleka Nyamuhanga ĩniatakwa esĩsonĩ eriahulwa mo Nyamuhanga wabo; kusangwa abĩrĩkokoteryabo omũyĩ. 17Busana n'erĩkĩrĩrya, Abrahamũ omugulu alengawako, mwaha mugala wuwe Ĩsaka mo buhere. Kandi oyo wabana esyondagane, mwabya akahera ekyusa kiwe mo buhere. 18Kusangwa Nyamuhanga mwabwira Abrahamũ ati, Abana ba Ĩsaka basyahulwa mo bana bawe. 19Abrahamũ mwaganza ngoko Nyamuhanga angatoka erĩlũbũkya Ĩsaka oko baholĩ, kandi liri ng'eriswamubana ng'oyũkalũbũka oko baholĩ. 20Busana n'erĩkĩrĩrya, Ĩsaka mwatsumula Yakobo na Esaũ omo myatsi eyasyasa. 21Busana n'erĩkĩrĩrya, Yakobo abere asonda erihola mwatsumula obuli mugala wa Yosefũ. Neryo mwaramya Nyamuhanga iniakahanganira oko mũtso wuwe. 22Busana n'erĩkĩrĩrya, Yosefũ abere asonda erihola, mwahula erĩlũa ly'Abaĩsraelĩ omo kihugo ky'eMĩsĩrĩ, kandi mwahana busana n'amakũha wuwe. 23Busana n'erĩkĩrĩrya, ababũtĩ ba Musa mobamũbĩsa emikera ĩsatu, ekiro abutawa. Kusangwa mobalangira kw'ali mwana mubuya, kandi mobatubaha eriketa ekihano ky'omwami. 24Busana n'erĩkĩrĩrya, Musa abere abikula mwagana eribirikirwa mo mugala wa mwali wa Farao. 25Musa mwayisoga erĩendererĩbwa haguma n'abandu ba Nyamuhanga, kwilaba erĩyĩtsemesya akatambĩ kake omo bitsange by'ebibi. 26Musa mwaganza erĩsekererĩbwa busana na Kristo nga ndũndĩ nene eyĩlabĩre obuteke bosĩ bw'eMĩsĩrĩ, kusangwa abya akayiketera oluhembo. 27Busana n'erĩkĩrĩrya Musa mwalũa eMĩsĩrĩ, mwatubaha erihitana ly'omwami. Kusangwa mwayĩyĩnĩa, iniakalangira oyutelolawako. 28Busana n'erĩkĩrĩrya, Musa mwahĩra Erikiruka, kandi mwategeka erĩhakabya ly'omusasi oko syongyo, omũlaĩka w'oluholo siasyetũla oko himbere hyabo. 29Busana n'erĩkĩrĩrya, Abaĩsraelĩ mobasoka Engetsi y'Omunyama ng'ekitaka kyũmĩre, n'Abanya Mĩsĩrĩ omugulu balenga erisoka, mobasendĩbwa. 30Busana n'erĩkĩrĩrya, ekĩyĩte ky'amabwe eky'eYerĩko mokyaterera ahisi, Abaĩsraelĩ ĩbamabĩtĩmba kukyo ebiro birinda. 31Busana n'erĩkĩrĩrya, Rahabũ omũmalaya mwatahera haguma n'abatakenga Nyamuhanga, kusangwa mwakokya abalĩngĩ omo buholo. 32Nasyaswabũga bindi byahi kwehĩ? Kusangwa singwite omugulu w'eryahula Gĩdeonĩ, Baraka, na Samũsonĩ, Yefũta, Dawĩdĩ, Samwelĩ n'abamĩnyererĩ; 33mobakĩnda amami busana n'erĩkĩrĩrya, mobakola emĩbĩrĩ y'eritunganene, mobabana ebyo Nyamuhanga alaga, mobakũmba amuno w'esyondale. 34Kandi mobalĩmya omuliro owakalĩre, mobabala omũyalĩ. Ababya bolo mobabana amaka, mobabya esyombangĩ omo malwa, n'erihiga emilondo y'ehandi. 35Abakalĩ mobaswasunga abaholĩ babo busana n'erĩlũbũkĩbwa. Kandi abandi mobagalĩbwa, ibakagana eriboholwa, ibatoka eribana erĩlũbũka oko ngebe yowene kwilaba. 36Kandi abandi mobasekererĩbwa, mobagalwa, n'erĩswĩrĩbwa, kandi abandi mobabohwa omo mahulula n'erĩhĩrwa omo mũlĩkĩ. 37Mobĩtwa omo mabwe, abandi mobatũbwa omo mĩsũmeno mo bitswe bibiri, mobĩtwa omo mũyalĩ, mobalendera ibambite esyongobĩ sy'esyombũlĩ n'esy'esyombene, mobabula ebyosĩ, mobendererĩbwa, mobakolwa nabi. 38Ekihugo kyabya isikitolerebo. Babya bakagenda kitya-kitya omo mbwarara n'oko bitwa, ĩbĩkere omo myangalũ, n'omo byũna omo kitaka. 39Abosĩ aba mobasĩmwa busana n'erĩkĩrĩrya lyabo, nĩkwa mobatabana ekyo balagawa. 40Kusangwa Nyamuhanga iniabiritubikira ekibuya kw'aho, neryo Nyamuhanga abya anzĩre ĩtwahĩkana haguma nabo.

will be added

X\