ABAEBRANIA 10

1Kusangwa Emigambo iri ng'ekyũtsũ-tsũ buyira ky'emyatsi yowene eyikandisyahuluka. Siyirisosa kwenene emyatsi eyo. Emigambo siyangatoka erĩhĩkanĩa abandu abakahĩka hakũhĩ oko mahere ago bakahera oko buli mwaka butsira erĩũmbya. 2Kite kitya, kumbe abandu abakaramaya Nyamuhanga babiriera ndeke kw'ebibi byabo, kumbe obunya-mutima bwabo sĩbwangakangyabo ebibi byabo. Kandi ĩbabĩrĩũmbya erihera obuhere. 3Nĩkwa amahere aya, abya akĩbũkya abandu ebibi byabo obuli mwaka. 4Kusangwa omusasi w'esyonume n'ow'esyombene sialitoka erĩlũsya ebibi. 5Neryo omugulu Kristo ahĩka omo kihugo mwabũga ati, Amahere n'esyohongo, sĩwanzĩrebyo, Nĩkwa wabĩrĩnyĩkokoterya omubiri. 6Sulitatsemera amahere w'erĩokya n'amahere busana n'erĩlũsya ebibi. 7Neryo monabũga nyiti, Ĩngye yono, namasa. Erikola erisonda lyawe, uwe Nyamuhanga, Ngoko kĩsakĩre busana nage omo kitabu ky'Emigambo. 8Omugulu abũga erĩmbere ati, Amahere n'esyohongo, n'amahere w'erĩokya n'amahere busana n'ebibi, sĩwanzĩrebyo kutse eritsemerabyo. Mwabũga atya nomo amahere aya akaherawa ngoko Emigambo ikategeka. 9Neryo mwabũga ati, Lebaya, namasa erikola erisonda lyawe. Nyamuhanga akalũsaya amahere gosĩ wa kera n'erĩhĩra obuhere bwa Kristo omo mwanya wago. 10Nĩkwa Yesu Kristo mwakola erisonda lya Nyamuhanga. Neryo kusangwa Yesu Kristo mwakola erisonda lya Nyamuhanga, twabirihigulwa, kusangwa Yesu Kristo abiriha omubiri wuwe go ngendo nguma busana na kera na kera. 11Obuli mũhererĩ w'Abayũda akahangana ebiro byosĩ oko mũbĩrĩ w'ekisomo, n'erihera amahere engendo nyingi. Amahere ayo sialitoka erĩlũsya ebibi. 12Nĩkwa Kristo mwahera obuhere buguma bwa kera na kera busana n'ebibi, neryo mwĩkala oko luhande lw'amali lwa Nyamuhanga. 13Akalinda erĩhĩka aho esyonzĩgũ siwe syasyahĩrwa ng'ekĩtũmbĩ ky'ebisando biwe. 14Kusangwa omo buhere buguma abĩrĩhĩkanĩa kera na kera ababirihigulwa. 15N'Omũlĩmũ Abũyĩrĩre nibya akatũtũlĩrago; kusangwa akatsũka eritubwira ati, 16Omwami Mukulu ati, Enyũma w'ebiro ebyo, nasyayira endagane haguma nabo. Nasyahĩra emigambo yage omo mitima yabo, Kandi nasyasĩkyayo omo malengekanĩa wabo. 17N'akandi ati, Sindiendisyaswibuka ebibi byabo, n'erĩhalya lyabo. 18Neryo ahali eribuyira ly'ebibi ebĩ, sihakiri kandi obwaga bw'obuhere busana n'erĩlũsya ebibi. 19Neryo balĩkyetu, tunawite obwĩranda bw'eriingira Ahabũyĩrĩre Kutsibu busana n'omusasi wa Yesu. 20Iye abĩrĩtũlĩbũlĩra enzira nyihya-nyihya, eyikaleta engebe, kandi eyikalaba omo kĩsũkũlĩryo ky'omubiri wuwe. 21Neryo tuwite omũhererĩ mukulu oyukasondola enyũmba ya Nyamuhanga. 22Tuyitwale hakũhĩ na Nyamuhanga, n'omutima w'ekwenene, n'erĩkĩrĩrya erĩtswayĩre ndeke, itunawite emitima yerĩre oko bunya-mutima bubi, n'emibiri eyerĩre omo magetsi owene. 23Tuhambe ndeke amaha wetu ago tũkwamĩre, butsira eritika-tika, kusangwa oyo watũla omwatsi oyũ sialiregula. 24Tũganĩraye ngoko twangĩbũkanĩa oko lwanzo n'emĩbĩrĩ yowene. 25Situleke erĩhĩndana lyetu haguma, ng'emibere y'abandi bandu, nĩkwa tũsĩkanaye. Kandi tuyitsinge umw'ebyo, omugulu tukalangira ekiro ky'Omukama kĩkahĩka hakũhĩ. 26Twamasimbirira erikwama ebibi omo pono, itwamabiminya ndeke omwatsi w'ekwenene, ko hatakiri buhere busana n'ebibi. 27Nĩkwa hali eririndirira omw'iubaha omusango n'omuliro owakalĩre, owakandisyabuga esyonzĩgũ sya Nyamuhanga. 28Oyukaketa Emigambo ya Musa akahola butsira eriganyirwa busana n'erĩtũlago ly'abalangĩrĩ babiri kutse basatu. 29N'oyukapona Omugala wa Nyamuhanga, n'erilangira omusasi w'endagane owamuhigula ng'ekindu buyira, atolere erisuyirwa kutsibu kw'aho. N'oyukatsuma Omũlĩmũ w'olukogo, uti omundu oyo siatolere erisuyirwa erĩkalĩre kutsibu kw'aho kwehĩ? 30Kusangwa tũnasĩ oyo wabũga ati, Erĩkĩsya ni ryage, nasyaliha. Kandi oyo wabũga ati, Omwami Mukulu asyatswera abandu buwe. 31Ni kindu ky'erĩũbahya eriwa omo byala bya Nyamuhanga oyuliho. 32Nĩkwa mwibuke ebiro by'erĩmbere, omugulu mwabana ekyakakala kya Nyamuhanga, ngoko mwayĩyĩnaya butsira erĩkindwa omo malwa awakalĩre, n'omo malĩge. 33Oko gundi mugulu mwabya imukatsumawa n'erĩendererĩbwa embere sy'abandu bosĩ. Kandi momwaganzwa ng'abandu abendererĩbawa batya. 34Kandi momwasangira amalĩge w'abandu b'omũlĩkĩ, kandi ĩmũkalĩga n'obutseme erisagulwa ebindu byenyũ. Kusangwa mwabya ĩmũnasĩ ko munawite ebindu bibuya kw'aho ebikandisyabyaho kera na kera. 35Neryo simuleke eriyiketera Nyamuhanga, kusangwa likaleta oluhembo lunene. 36Neryo litolere ĩmwayĩyinĩa, neryo imwakola erisonda lya Nyamuhanga, imwatoka eribana ebyo Nyamuhanga alaga. 37Kusangwa Amasako ati, Kusangwa hakĩsĩya katambĩ kake N'oyukasa asyahĩka; Isiendisyamala. 38Nĩkwa omutunganene wage asyabyaho busana n'erĩkĩrĩrya liwe. Nĩkwa amasuba enyũma, omutima wage siangamutsemera. 39Nĩkwa ĩtwe situli ukw'abo abakasuba enyũma n'erihera, nĩkwa tuli ukw'abo abakĩkĩrĩraya n'erĩlamya emitima yabo.

will be added

X\