ABAEBRANIA 1

1Nyamuhanga kera mwabũga n'abotata-kulu betu omo bĩnywa by'abamĩnyererĩ, esyongendo nyingi n'omo syonzira mĩsĩndo-mĩsĩndo. 2Nĩkwa omo biro ebĩ by'enyũma-nyũma abĩrĩbũga netu busana n'Omugala wuwe. Nĩkwa Nyamuhanga mwahangika omo byala by'Omugala wuwe ekihugo n'ebyosĩ ebiri omo kyanya. Kandi Nyamuhanga abĩrĩhĩra Omugala wuwe eribya omwenye myatsi yosĩ. 3Omugala akakangabasanaya n'olukengerwa lwa Nyamuhanga. Kandi iye ni kiminyikalo kwenene ky'eribyaho lya Nyamuhanga. Kandi akahanganaya emyatsi yosĩ y'ekihugo n'ey'ekyanya omo kĩnywa ky'obũtokĩ buwe. Neryo abere abĩerya ebibi busana n'abandu, mwĩkala oko luhande lw'amali lwa Nyamuhanga Omwenye Obukulu Owendata kutsibu. 4Neryo Mugala mwabya mukulu kwilaba abamalaĩka, ngoko erĩna liwe eryo ni rikulu kwilaba ery'abamalaĩka. 5Kusangwa Nyamuhanga mwabwira omũlaĩka wahi na kera ati, Uli Mugala wage, Namakubuta mũnabwĩre. N'akandi ati, Nasyabya Ĩse wuwe, Naye asyabya Mugala wage. 6Kandi omugulu Nyamuhanga abya akaleta akambere kuwe omo kihugo, mwabũga ati, Abamalaĩka bosĩ ba Nyamuhanga bamũramaye. 7Neryo Nyamuhanga mwabũga busana n'abamalaĩka ati, Nyamuhanga akayira abamalaĩka buwe mo mahunga, Kandi akayira abagombe buwe mo birimi by'omuliro. 8Nĩkwa Nyamuhanga akabũga busana n'Omugala ati, Ekĩtũmbĩ kyawe ky'obwami, uwe Nyamuhanga, ni kya kera na kera, Ukatabala oko bwami bw'erĩbanza. 9Wabirianza eritunganene, ũkakwa ebibi by'obusu; Kikaleka Nyamuhanga, ye Nyamuhanga wawe akayisoga we. Kandi abĩrĩkũtũlĩra kw'obutseme bw'erĩsĩkya kwilaba eryo aha abalĩkyenyũ. 10Kandi ati, Uwe Mwami Mukulu, erĩmbere mowahĩra ekibanza ky'ekihugo. N'olubula nĩ mũbĩrĩ w'ebyala byawe. 11Ebyosĩ ebyo byasyabulirayo, nĩkwa uwe wasyabyaho N'ebyosĩ ebyo byasyakula ng'olukimba, 12Kandi wasyalĩngabyo ng'erĩkotĩ, Byasyahĩndũkĩbwa ng'olukimba. Nĩkwa uwe une ngoko wabya. N'emyaka yawe siyendisyahwa. 13Nĩkwa Nyamuhanga mwabwira omũlaĩka wahi na kera ati, Wĩkale oko luhande lwage lw'amali, Erĩhĩka aho nasyahĩrĩra esyonzĩgũ syawe Omo kĩtũmbĩ ky'ebisando byawe. 14Kandi abamalaĩka bosĩ sĩ bĩrĩmũ ebikakolera Nyamuhanga kwehĩ? Sibetumawa na Nyamuhanga erĩwatĩkya abo abasyabana erilama kwehĩ?

will be added

X\