ABANYA GALATĨA 6

1Balĩkyetu, omundu amabanika omw'ĩlolo, ĩnywe mukakola omo Mũlĩmũ, mũmũhanganaye; kandi, mukole mutya omo mutima molo, kandi ũyĩtegaye, ukasyalengwako. 2Muhekerane obũlĩto, neryo mutya mwasyaberererya Emigambo ya Kristo. 3Omundu amayitendera ng'omundu, kwesĩ si mundu, ĩnĩakayĩtebaya. 4Obuli mundu alenge omũbĩrĩ wuwe ĩyowene, neryo iniabana eky'eriyihalambira mugo, butsira erĩrĩngĩrĩranĩago n'omũbĩrĩ w'ogundi mundu. 5Kusangwa obuli mundu asyaheka ĩyowene omuheke wuwe-wuwe. 6Litolere oyukakangĩrĩrĩbawa ebĩnywa bya Nyamuhanga iniasangira ebindu byowene byosĩ n'omũkangĩrĩrya wuwe. 7Sĩmũyĩtebaye, Nyamuhanga sialĩsekererĩbawa, kusangwa ekyo mundu akahera kyo anemwendisyahulula. 8Kusangwa oyukabiba oko syongumbu siwe sy'omubiri wuwe, asyahulula erihonda, nĩkwa omundu oyukabiba omw'isonda ly'Omũlĩmũ, Omũlĩmũ asyamuha erihulula engebe y'erikota. 9Neryo situluhe erikola ebibuya kusangwa oko mugulu atolere twasyahulula twamatendiregula. 10Neryo oko migulu yosĩ tukabana akatambĩ, tukole ebibuya oko bandu bosĩ, kandi kwilaba aho tukole ebibuya ukw'abo abali omo kĩtũnga ky'abĩkĩrĩrye. 11Mulangire ngoko ĩngyowene ngabasakira omo masako manene-manene. 12Abakasonda erĩyĩtendererya omo mwatsi w'omubiri, bo bakabahatikana erĩbanĩbwa, kusangwa sĩbanzĩre erĩendererĩbwa busana n'omusalaba wa Kristo. 13Nomo bangakwama omwatsi w'erĩbanĩbwa, sibekwama Emigambo. Nĩkwa banzĩre ĩmwabanĩbwa ibatoka eriyipipa kusangwa mwamalĩga emitsye y'omubiri. 14Nĩkwa ĩngye nasyayihalambira omo mwatsi muguma musa, go n'omusalaba w'Omukama wetu Yesu Kristo. Kusangwa busana n'omusalaba oyo ekihugo kyabiribambwa oko musalaba ũkw'ĩngye, kandi nabiribambwa oko musalaba oko kihugo. 15Kusangwa eribana si kindu, kandi eritendibana si kindu. Omwatsi munene nĩ 'hangika lihya-lihya. 16Neryo abosĩ abakasondolĩbawa n'enzumwa eyĩ, obuholo n'eriganyira bibye kubo, n'ukw'abo bali kwenene abandu ba Nyamuhanga. 17Erĩtsũka lino sihabye omundu oyũkanyĩlũhaya, kusangwa ngwite omo mubiri wage esyongolũ sya Yesu. 18Neryo balĩkyetu olukogo lw'Omukama wetu Yesu Kristo lubye n'ebĩrĩmũ byenyũ. Amina.

will be added

X\