ABANYA GALATĨA 4

1Kandi nyiti, omugulu omũlĩ w'omwandu akine mwana, sialengĩre omukobe nomo angabya mukama w'ebindu byosĩ. 2Nĩkwa omugulu akine mulere, abalemberĩ n'abateya bakamulembera n'erĩteya ebindu biwe erĩhĩka oko mugulu owahĩrawa n'ĩse. 3Netu nibya omugulu twabya bana, twabya bakobe b'emyatsi y'ekihugo kino. 4Nĩkwa omugulu amabiberera, Nyamuhanga mwatuma Omugala wuwe. Omugala oyo mwabutwa n'omũkalĩ kandi mwabutwa omo mitsye y'Emigambo y'Abayũda, 5iniatoka eribohola ababya omo Migambo, netu itwatoka eriyirwa mo bagala ba Nyamuhanga. 6Kandi kusangwa muli bagala, Nyamuhanga abirituma Omũlĩmũ w'omugala wuwe omwisi w'emitima yetu, owakabirikira ati, Tata, Tata! 7Neryo suli kandi mukobe, nĩkwa uli mugala. Kandi wamabya uli mugala, Nyamuhanga asyakuha ebyosĩ abirilaga. 8Erĩmbere, omugulu mwabya mũtasĩ Nyamuhanga, mwabya bakobe b'esyonyamuhanga esite kũndũ. 9Nĩkwa lino mwabiriminya Nyamuhanga. Kwilaba aho, Nyamuhanga abiribaminya. Neryo busana nakĩ mukasuba oko myatsi y'ekihugo kino eyite n'amaka. Mwanzĩre eriswabya bakobe bayo kwehĩ? 10Mukakwama ebiro, n'emikera, n'ebirimo, n'emyaka. 11Ngubaha busana nenyũ, nyiti mbino nabiribaluhira busa. 12Abagala betu, ngabalemba-lemba nyiti ĩnywe mubye nga ngye. Kusangwa nage nabiribya nga nywe, momutangira nabi. 13Nĩkwa mũnasĩ ngoko nabya nyilwere omo mubiri omugulu natsũka erĩbatũlĩra Engulu Yowene. 14Nomo mwanalengawako erinyipona kutse erinyigana busana n'obũkonĩ bwage, momutakola mutya, nĩkwa momwanyĩkokya ng'omũlaĩka wa Nyamuhanga, ngoko mwanganakokya Kristo. 15Neryo lino omũyĩsa wenyũ oyo ali hayi kwehĩ? Ngababwira nyiti, kumbe kyangatokekana, nga mwabirikula ameso wenyũ n'erimbago. 16Lino nabiribya nzĩgũ yenyũ busana n'eribabwira ekwenene kwehĩ? 17Abandu abo bakabasonda-sondaya kutsibu, nĩkwa butsira omo mwatsi owene, nĩkwa banzĩre eritugaba, bati mukwamebo kutsibu. 18Nĩkwa lyowene erikwama n'omũhwa omwatsi owene, nomo nyitane haguma nenyũ. 19Ĩnywe bana bage, ng'omũkalĩ oyukabuta, ko ngakunda nyitya busana nenyũ, nyiti Kristo aminyikale omwisi wenyũ. 20Nĩkwa nyiti kumbe nangabya haguma nenyũ lino n'erĩbũga nenyũ omo gundi mũsĩndo. Kusangwa ngalemawa busana nenyũ. 21Munyibwire, ĩnywe mwanzĩre eribya oko Migambo, mũkowa ebyo Migambo ĩkabũga kwehĩ? 22Kusangwa kĩsakĩre kiti, Abrahamũ abya n'abagala babiri. Omũkalĩ w'obukobe mwabuta mugala muguma, n'omũkalĩ w'obwĩranda mwabuta mugala muguma. 23Omugala w'omũkalĩ w'obukobe abutawa ng'abandu bosĩ, nĩkwa omugala w'omũkalĩ w'obwĩranda abutawa busana n'endagane ya Nyamuhanga. 24N'eyĩ nĩ mĩsyo. Abakalĩ aba bakakangaya ndagano ĩbĩrĩ. Omuguma akalũa oko kitwa ky'eSĩnaĩ, naye akabuta abana b'obukobe. 25Hagarĩ oyũ ni kitwa ky'eSĩnaĩ omo kihugo ky'eArabĩa, kiri ng'eYerũsalema ya lino, kusangwa eYerũsalema ya lino iri omo bukobe haguma n'abana bayo. 26Nĩkwa eYerũsalema y'endata iri n'obwĩranda, nayo ni koyo wetu. 27Kusangwa kĩsakĩre kiti, Utseme, uwe mũkalĩ mugumba oyutabuta; Uyitsangure, wamaye, iwe utekunda; Kusangwa omũkalĩ oyũ alekeranĩbawa, awite abana kwilaba Omũkalĩ oyuwite ĩba. 28Nĩkwa ĩnywe, balĩkyetu, nga Ĩsaka, tuli bana b'endagane. 29Ngoko mugulu oyo, oyo wabutawa ng'abandu bosĩ, mwendererya oyo wabutawa busana n'Omũlĩmũ, ko liri ritya lino. 30Nĩkwa Amasako atĩkĩ? Ati, Uhige omũkalĩ mukobe na mugala wuwe. Kusangwa omugala w'omũkalĩ mukobe, siendisyasangira obũsokĩ bw'ĩse haguma n'omugala w'omũkalĩ w'obwĩranda. 31Neryo, balĩkyetu, situli bagala b'omũkalĩ mukobe, nĩkwa tuli bagala b'omũkalĩ g'obwĩranda.

will be added

X\