ABANYA GALATĨA 3

1Ĩnywe Banya Galatĩa bakĩrũ, obusaki obukabateba ni bwahi kwehĩ? Nenyũ mwakangĩrĩrĩbawa ndeke-ndeke ngoko Kristo abambawa oko musalaba embere sy'abandu bosĩ. 2Muleke ngatababũlaya kiguma, momwangirira Omũlĩmũ busana n'erikola Emigambo, kutse busana n'erĩowa n'erĩkĩrĩrya Engulu Yowene kwehĩ? 3Busana nakĩ mukabya bakĩrũ kwehĩ? Mwamabĩtsũka omo Mũlĩmũ wa Nyamuhanga, mũkahĩkana lino busana n'omubiri kwehĩ? 4Mwabiriagalwa omo myatsi yosĩ eyĩ mo buyira kwehĩ? Muti, siyabya mo buyira! 5Omugulu Nyamuhanga akabaha Omũlĩmũ, n'erikola ebitiko-tiko omo katĩkatĩ kenyũ, akakola ebĩ kusangwa mukakola Emigambo, kutse kusangwa mũkowa n'erĩkĩrĩrya Engulu Yowene kwehĩ? 6Ngoko kĩsakĩre busana na Abrahamũ kiti, Mwĩkĩrĩrya Nyamuhanga, neryo busana n'erĩkĩrĩrya liwe, Nyamuhanga mwamuganza mo mutunganene. 7Neryo, muminye ngoko abandu ababĩrĩkĩrĩrya Engulu Yowene, nabo ni bana ba Abrahamũ. 8Neryo Amasako mwaminya erĩmbere ngoko Nyamuhanga asyatũngananĩa Ebihanda busana n'erĩkĩrĩrya, neryo mwatũla Engulu Yowene uku Abrahamũ ati, Omwisi syawe, ĩngye Nyamuhanga nasyatsumula Ebihanda byosĩ. 9Neryo abosĩ abakĩkĩrĩraya bakabana omũyĩsa ogo Abrahamũ abana busana n'erĩkĩrĩrya liwe. 10Kusangwa abosĩ abakayiketera erikola Emigambo babiritakirwa; kusangwa kĩsakĩre kiti, Obuli mundu oyuteyitsinga omo myatsi yosĩ eyĩsakĩre omo kitabu ky'Emigambo, n'erikolayo, omundu oyo abiritakirwa. 11Nĩkwa kiminyikere ko hate mundu oyukayirawa mo mutunganene embere sya Nyamuhanga busana n'Emigambo, Kusangwa kĩsakĩre kiti, Omutunganene asyabyaho busana n'erĩkĩrĩrya. 12Nĩkwa Emigambo siyirihangana okw'ĩkĩrĩrya, nĩkwa kĩsakĩre kiti, Oyukakola Emigambo asyabyaho busana nayo. 13Kristo abĩrĩtũtongolya okw'itakirwa ly'Emigambo, iniabiritakirwa omo mwanya wetu, kusangwa kĩsakĩre kiti, Obuli mundu oyũhanĩkĩrwe oko muti abye mutakirwa. 14Kusangwa Kristo mwakola atya neryo ab'Ebihanda ibatoka eribana omũyĩsa omwisi wa Kristo Yesu, ogo Abrahamũ abana. Netu itwatoka eribana Omũlĩmũ ogo Nyamuhanga alaga busana n'erĩkĩrĩrya lyetu. 15Balĩkyetu, ngabakangaya ekikakolawa n'abandu. Endagane y'abandu babiri yamabĩgomerĩbwa, sihali bandu bangabindulayo kutse eritomekera kuyo. 16Neryo Nyamuhanga mwaha esyondagane siwe uku Abrahamũ n'oko lubuto luwe. Sĩalĩbũga ati, oko bana buwe, eriahula bangi, nĩkwa akabũga ati, oko lubuto lwawe mundu muguma, iniakahula Kristo. 17Ekyo ngabũga kyekĩ, endagane eyagomerĩbawa na Nyamuhanga siyangabindulwa n'Emigambo eyahĩka emyaka amagana ani n'amakũmĩ asatu enyũma. Neryo Emigambo sĩyangalĩmya erilaga liwe. 18Nyamuhanga amabya akatuha ebyo atulaga busana n'erikola Emĩgambo, sialituhabyo busana n'erilaga liwe; kusangwa Nyamuhanga mwahabyo uku Abrahamũ kusangwa mwamulagabyo. 19Neryo Emigambo ni busana nakĩ kwehĩ? Emigambo yahĩrawa busana n'erĩkangya amalolo erĩhĩka aho mwana wuwe asyahĩkĩra. Endagane eyo yahabawa oko mwana oyo. Emigambo yaletawa n'abamalaĩka omo byala by'omũsanganĩa. 20Nĩkwa ahali omundu muguma musa sihali mũsangania, na Nyamuhanga ni muguma. 21Neryo Emigambo ikagana erilaga lya Nyamuhanga kwehĩ? Iyehe n'ahake! Kusangwa kumbe Nyamuhanga aha omugambo owangatoka eriha engebe, kumbe ebitunganene byangabanika omo Migambo. 22Nĩkwa Amasako mwahĩra abandu bosĩ ng'abakola-nabi, neryo erilaga lihabawe oko bosĩ abakĩkĩrĩraya Yesu Kristo. 23Nĩkwa embere w'erĩhĩka ly'erĩkĩrĩrya, Emigambo moyatuyira ng'abandu b'omũlĩkĩ erĩhĩka oko kiro ky'erĩbĩsũla erĩkĩrĩrya. 24Neryo Emigambo yabya ng'omũlemberĩ wetu erĩhĩka aho Kristo asyasira, itwatoka erĩtũngananĩbwa embere sya Nyamuhanga omw'ĩkĩrĩrya. 25Nĩkwa lino erĩkĩrĩrya lyabĩrĩhĩka, situkiri oko mũlemberĩ. 26Kusangwa busana n'erĩkĩrĩrya, ĩnywe bosĩ muli bagala ba Nyamuhanga n'erimatikana na Kristo Yesu. 27Kusangwa ĩnywe bosĩ mwabatĩsĩbawa erimatikana na Kristo mwabiriambala emibere ya Kristo. 28Sihali Omũyũda n'Omũgĩrĩkĩ, sihali omukobe n'og'obwĩranda, sihali w'obulume kutse w'obũkalĩ; kusangwa ĩnywe bosĩ muli muguma erimatikana na Kristo Yesu. 29Neryo mwamabya muli Bakristo, muli bana ba Abrahamũ, mwasyabana ebyosĩ Nyamuhanga alaga.

will be added

X\