ABANYA GALATĨA 2

1N'enyũma w'emyaka erĩkũmĩ n'eyĩnĩ monahetukira kandi eYerũsalema haguma na Baranaba. Monatwala Tĩto haguma nage nibya. 2Monayayo kusangwa Nyamuhanga mwanyĩbĩsũlĩra, ati nyiyeyo. Monakanĩrya abakulu omwatsi oyo w'Engulu Yowene eyo nabya ngatũlĩra Ebihanda, nĩkwa monabwirabo ĩbobene, nyiti sinyibye nga nabirikola kutse nyikinakola buyira. 3Na Tĩto, oyo wabya nage, nomo anabya Mũgĩrĩkĩ, mobatamuhatikana erĩbanĩbwa. 4Nĩkwa abandi abayahula mo balĩkyetu, mobasonda erĩmũbanĩa. Abandi aba mobĩngĩre omo katĩkatĩ ketu mo bũbĩso-bĩso, eriyalinga obwĩranda bwetu obo tuwite, itumatikene na Kristo Yesu, ibakasonda erituyira mo bakobe. 5Motũtalĩga omwatsi wabo n'ahake, itwatoka erĩteya ekwenene y'Engulu Yowene busana nenyũ. 6Nĩkwa abo babya ng'abakulu, ngabũga nyitya kusangwa sinyitsomenebo, kusangwa Nyamuhanga sialiyira ebitaga; abakulu abo mobatamba mwatsi. 7Kusangwa balangira ngoko Nyamuhanga abirimba erĩtũla Engulu Yowene oko bandu b'Ebihanda bitabwene, ngoko Nyamuhanga aha Petero erĩtũlayo oko Bayũda ababwene. 8Kusangwa oyo wakola na Petero omo bukwenda oko Bayũda, yo n'oyo wakola nage omo bukwenda bw'Ebihanda. 9Neryo ababya ng'abasondolĩ, ye Yakobo, na Petero, na Yoane, mobaminya ngoko Nyamuhanga abirimba omũbĩrĩ oyũ, mobanyĩkokya haguma na Baranaba ng'abasangĩrĩ omo mũbĩrĩ, bati ĩtwe tukole omo katĩkatĩ k'Ebihanda, nabo bakole haguma n'Abayũda. 10Nĩkwa bati twibuke abera babo, nage nabya n'omũhwa w'erikola nyitya. 11Nĩkwa omugulu Petero ahĩka eAntĩokĩa, monamukungira embere sy'abandu, kusangwa isialitakola ndeke. 12Kusangwa Petero abya akalya n'abalĩkyetu b'Ebihanda, omugulu abandu abalũa ewa Yakobo bate bahĩkaho. Nĩkwa abandu abo babere babĩhĩka, Petero mwayigabula oko b'Ebihanda mwagana erirya haguma nabo, kusangwa abya akubaha abakakwama omwatsi w'erĩbanĩa. 13N'abandi Bayũda bosĩ mobayihindula nga Petero, erĩyĩtendererya, kyaleka Baranaba naye iniakwama omw'ĩyĩtendererya lyabo. 14Nĩkwa omugulu nalangira ngoko baterendera omo kwenene ngoko litolere Engulu Yowene, monabwira Petero emuliro w'abosĩ nyiti, Uwe Mũyũda, wabya ukalendera ng'omundu w'Ebihanda, butsira ng'Omũyũda. Busana nakĩ lino ukahatikana Ebihanda erirendera ng'Abayũda kwehĩ? 15Ĩtwe twabutawa mo Bayũda, situli bakola-nabi b'Ebihanda. 16Nĩkwa tũnasĩ omundu sialitunganana embere wa Nyamuhanga busana n'erikola Emigambo, nĩkwa busana n'erĩkĩrĩrya Yesu Kristo. Netu twabĩrĩkĩrĩrya Kristo, itwatoka eribya batunganene, busana n'erĩkĩrĩrya uku Kristo, butsira erikwama Emigambo. Kusangwa sihali mundu oyo wasyatũngananĩbwa embere wa Nyamuhanga busana n'erikwama Emigambo. 17Nĩkwa omugulu tukasonda erĩtũngananĩbwa busana n'erimatikana na Kristo, itukabanika mo bakola-nabi ng'Ebihanda, neryo Kristo akatuyira mo bakola-nabi kwehĩ? Iyehe, n'ahake! 18Kusangwa namaswahĩmba kandi ebyo nasambula, ĩnamayĩkangya ko nyiri mundu w'amalolo. 19Nĩkwa omo mwatsi w'Emigambo nabirihola, nyitoke eribyaho busana na Nyamuhanga. 20Nabiribambwa oko musalaba haguma na Kristo. Nĩkwa lino nyineho; nĩkwa butsira ngye, Kristo aneho omwisi wage. N'engebe eyo nyiri nayo lino omo mubiri, nyiri nayo busana n'erĩkĩrĩrya Omugala wa Nyamuhanga, oyo wanyanza, n'eriyiha busana nage. 21Sindigana olukogo lwa Nyamuhanga; kusangwa omundu amatũngananĩbwa busana n'Emigambo, neryo Kristo imwahola busa!

will be added

X\