ABANYA GALATĨA 1

1Ĩngye mukwenda Paũlo, oyutabirikirawa n'abandu kutse eritumwa n'abandu, nĩkwa oyo watumawa na Yesu Kristo na Nyamuhanga Tata, oyo wamũlũbũkaya oko baholĩ. 2Abalĩkyetu bosĩ abali haguma nage tũkabakeraya ĩnywe makanĩsa w'eGalatĩa. 3Nyamuhanga Tata wetu, n'Omukama Yesu Kristo, babahe olukogo n'obuholo. 4Kristo mwayiha busana n'ebibi byetu eritubohola oko mugulu mubi ono, ngoko Nyamuhanga Tata wetu abya anzĩre. 5Olukengerwa lubye uku Nyamuhanga kera na kera! Amina. 6Ngabaswekera! Kusangwa mukatoga lũba ukw'oyo wababirikira omo lukogo lwa Kristo, imukakwama eyindi ngulu. 7Nĩkwa sihali eyindi Ngulu, nĩkwa hali abandi abakabatsenga-tsengaya, ibakasonda eribindula yo nabi Engulu Yowene ya Kristo. 8Nĩkwa ĩtwe, kutse omũlaĩka oyũkalũa elubula, amabatũlĩra engulu eyite eyo twabatũlĩra, atakirawe! 9Ngoko twamabĩbũga, na lino ngabũga kandi nyiti, Omundu amabatũlĩra engulu eyite eyo mwangirira, atakirawe. 10Lino ngasonda erĩsĩmwa n'abandu, kutse erĩsĩmwa na Nyamuhanga kwehĩ? Kutse ngalenga erĩtsemesya abandu kwehĩ? Kumbe ngyinasonda erĩtsemesya abandu, sinangabya omugombe wa Kristo. 11Balĩkyetu, nyanzĩre imwaminya ndeke ngoko Engulu Yowene nabatũlĩra sĩyalũa oko bandu. 12Mondangirirayo oko mundu, kandi mondakangĩrĩrĩbwayo na mundu. Nĩkwa nina Yesu Kristo yo wanyĩbĩsũlĩrayo. 13Mwabĩrĩowa emigendere yage omo myatsi y'Abayũda, ngoko nabya ngendererya kutsibu ekanĩsa ya Nyamuhanga, kandi nabya ngalenga erĩheryayo. 14Nabya inabirilaba abangi b'omo lulengo lwage omo myatsi y'Abayũda. Iningabya n'omũhwa munene busana n'emitsye y'abotata wetu. 15Nĩkwa Nyamuhanga, omo lukogo luwe, mwayisoga ngye inyikine omo nda ya koyo, mwanyibirikira erimukolera. 16Kusangwa omugulu byatsemesaya Nyamuhanga erĩnyĩbĩsũlĩra Omugala wuwe, inatoka erĩtũla Engulu ya Kristo omo katĩkatĩ k'Ebihanda, mondakanĩa n'abandu. 17Kandi mondahetukira eYerũsalema ukw'abo babya bakwenda embere syage. Nĩkwa monaya eArabĩa, kandi monasuba eDamaseke. 18Neryo enyũma w'emyaka ĩsatu monahetukira eYerũsalema eriyabana Petero, monasiba naye ebiro erĩkũmĩ n'ebitanu. 19Nĩkwa mondalangira ogundi g'oko bakwenda, nina Yakobo, ye mugala wabo Mukama. 20Ebyo ngasaka ni kwenene. Ngayisema kwenene omwisi wa Nyamuhanga nyiti sindibiha. 21Neryo monaya omo bihugo by'eSũrĩa n'eKĩlĩkĩa. 22Oko mugulu oyo mondalolwako n'amakanĩsa wa Kristo eYũdea. 23Nĩkwa babya bakowa lisa ambu, Oyo wabya akatwendererya, lino akatũla Engulu Yowene y'erĩkĩrĩrya Kristo, eyo abya akalenga erĩherya. 24Neryo babya bakapipa Nyamuhanga busana nage.

will be added

X\