ABANYA EFESO 6

1Abana, mowe abotata n'abokoyo wenyũ busana n'Omukama, kusangwa ko litolere litya. 2Ekihano ky'erĩmbere ekiwite erilagana lya Nyamuhanga kiti, Ũsĩkaye tata wawe na koyo wawe, 3emyatsi yawe itoke erĩowana, n'akandi iwatoka eribuga biro binene muna-kihugo. 4Nenyũ abotata, sĩmũhĩtanaye abana benyũ, nĩkwa mũkũlayebo omo nzira y'Omukama, n'erikungabo, n'erĩkangĩrĩryabo, omw'ĩkangĩrĩrya ly'Omukama. 5Abakobe, nenyũ mowe abakama benyũ, mukengebo haguma n'erititimana n'omutima owene, ngoko mwangakolera Kristo. 6Simukole kusangwa bakabasamalira kutse kusangwa mwanzĩre erĩtsemesya abandu, nĩkwa ng'abakobe ba Kristo, mukole n'omutima gosĩ erisonda lya Nyamuhanga. 7Neryo mukolerebo n'omutima ogowene nga mukakolera Kristo, butsira bandu. 8Kusangwa mũnasĩ Omukama asyahemba obuli mundu, omukobe kutse oyuli bwĩranda busana n'omũbĩrĩ ogowene owakola. 9Nenyũ abakama, mukolere abakobe benyũ bo mutya, muleke erĩũbahyabo. Nĩkwa muminye ndeke ngoko hali Mukama muguma elubula. Nĩ wenyũ, kandi ni wabo, naye syali ko butaga. 10Neryo lino, mubane amaka erimatikana n'Omukama. Mubane akagala omo bũtokĩ bunene buwe. 11Mwambale ebindu byosĩ by'amalwa bya Nyamuhanga imwatoka erihangana n'erilwa n'amenge w'eSatanĩ. 12Kusangwa situlilwa n'abandu, nĩkwa tukalwa n'abatabalĩ, n'ab'amaka, n'ab'ehamũlĩ b'omwĩrĩmya muna-kihugo, n'emilondo y'ebĩrĩmũ by'ebibi ebiri omo kyanya. 13Neryo muhambe ebindu byosĩ by'amalwa bya Nyamuhanga, imwatoka erilwa omo kiro kibi, neryo mwamabilwa, imwatoka erihangana ndeke. 14Neryo muhangane, mũsĩke, mũhĩre omwatsi w'ekwenene ng'omukoba omo mbindi syenyũ. Mwambale eritunganene ng'ekindu ky'amalwa ekĩkategaya ekĩkũba. 15Kandi mwambale ebiryato by'Engulu Yowene y'obuholo. 16Kandi oko migulu yosĩ muhambe engabo y'erĩkĩrĩrya erikatoka erĩrĩmya emisoha yosĩ y'omuliro y'Omubi. 17Kandi muhambe akakĩra k'omulamo. Kandi muhambe ekĩnywa kya Nyamuhanga ng'omũyalĩ w'Omũlĩmũ Abũyĩrĩre. 18Musabe kutsibu n'erĩbũlya Nyamuhanga erĩbawatĩkya. Kandi musabe omo migulu yosĩ ngoko Mũlĩmũ Abũyĩrĩre akabasondola. Busana n'omwatsi oyũ, mũyĩtegaye, n'eriyitsingirira, imunemusabira abandu bosĩ ba Nyamuhanga. 19Nage, munyisabire, Nyamuhanga ambe ebĩnywa by'erĩbũga omugulu ngakũmbũla obuno bwage omo bulume-lume erĩmĩnyĩsya abandu b'erĩkũmbo ly'Engulu Yowene. 20Busana n'eribya mukwenda w'Engulu Yowene eyo, indi omo mũlĩkĩ. Munyisabire nyibye n'obulume-lume erĩtũlago ngoko litolere ĩnabũga. 21Tĩkĩko akandibabwira ebyosĩ, imwatoka eriminya ngoko nyiri, n'ebyo ngakola. Tĩkĩko nĩ mũlĩkyetu mwanze, mukwenda oyuteregula omo mũbĩrĩ w'Omukama. 22Ngamutuma erĩbamĩnyĩsya engulu yetu n'akandi erĩkĩranĩa emitima yenyũ. 23Obuholo bubye oko balĩkyetu, kandi olwanzo haguma n'erĩkĩrĩrya ebĩkalũa uku Nyamuhanga n'Omukama wetu Yesu Kristo. 24Olukogo lwa Nyamuhanga lubye oko bosĩ abakanza Omukama wetu Yesu Kristo omo lwanzo olutetsanda.

will be added

X\