ABANYA EFESO 5

1Neryo kusangwa muli bana banze ba Nyamuhanga, mũmũgerereraye. 2Mukole ebyosĩ omo lwanzo, ngoko Kristo atwanza, kandi mwaha engebe yiwe busana netu ng'obuhere obukakumba ndeke, ehongo eyĩkatsemesaya Nyamuhanga. 3Kusangwa muli bandu ba Nyamuhanga, simuleke obũsĩngĩrĩ, kutse ebĩtĩsĩrĩre byosĩ, kutse obururu, bikahulwa omo katĩkatĩ kenyũ. 4Kandi siritolere mukahula emyatsi eyĩkĩta esĩsonĩ, kutse ebĩnywa eby'obũkĩrũ kutse eby'erĩsekererya, nĩkwa kumbe mũkabũga ebikakenga Nyamuhanga. 5Muminye ndeke ngoko obuli mũsĩngĩrĩ, kutse omundu oyukakola ebĩtĩsĩrĩre, kutse omururu, (obururu nĩ mũsĩndo w'erĩramya esanamu), siendisyasangira omo bwami bwa Kristo na Nyamuhanga. 6Simuleke omundu n'omuguma erĩbatebya omo bĩnywa by'obusa. Kusangwa busana n'emyatsi eyĩ erihitana lya Nyamuhanga lyasyahĩka oko bandu abakayisamambula. 7Neryo simusangane nabo. 8Kera mwabya omo mwĩrĩmya, nĩkwa lino muli omo kyakakala ky'Omukama. Neryo musibe ng'abana b'ekyakakala. 9(Kusangwa ekyakakala kikaleta emĩsĩndo yosĩ y'ebibuya, n'ebitunganene, n'eby'ekwenene). 10Mwige eriminya ebĩkatsemesaya Omukama. 11Simusangane omo mĩbĩrĩ y'omwĩrĩmya eyite n'endũndĩ, nĩkwa mũhũlũkayeyo oko kyakakala. 12Kwenene nĩ 'sonĩ erĩkanĩa emyatsi eyo bakakola omo bũbĩso-bĩso. 13Nĩkwa emyatsi yosĩ ikaminyikala omugulu ikahuluka omo kyakakala; kusangwa ekyakakala kĩkamĩnyĩsaya ndeke emyatsi yosĩ. 14Ekĩ kikaleka ĩnĩabũga ati, Ubuke, uwe mũgotserĩ, Ũlũbũke oko baholĩ! Kristo asyakũkolerya. 15Neryo, mũyĩtegaye ndeke, simusibe ng'abandu bakĩrũ, nĩkwa ng'abandu b'amenge. 16Sĩmũlabaye ebiro ebĩ byo buyira kusangwa omugulu ono ni mubi. 17Neryo simubye bakĩrũ, nĩkwa mũsondaye eriiga ekyo Mukama anzĩre imwakola. 18Sĩmũkũnde omo bĩnyũ, kusangwa hali eritamira, nĩkwa mũsũle m'Omũlĩmũ Abũyĩrĩre. 19Mũkanaye omo bĩnywa by'ewasĩngya n'eby'esyonyimbo n'emirenge y'eripipa Nyamuhanga, kandi mwimbe n'eriyira omulenge owene busana n'Omukama omo mitima yenyũ. 20Oko migulu yosĩ n'omo myatsi yosĩ muhe ewasĩngya uku Nyamuhanga Tata, omo lĩna ly'Omukama wetu Yesu Kristo. 21Kusangwa mukakenga Kristo, obuli mundu owe mũlĩkyabo. 22Abakalĩ, mowe abĩba nywe, ngoko mũkowa Omukama. 23Kusangwa omulume awite ehamũlĩ oko mũkalĩ wuwe, ngoko Kristo awite ehamũlĩ oko kanĩsa. Kandi Kristo nĩ mũlamya w'ekanĩsa omubiri wuwe. 24Neryo ngoko ekanĩsa ĩkowa Kristo, litolere abakalĩ ĩbowa abĩba wabo omo myatsi yosĩ. 25Nenyũ abĩba, mwanze abakalĩ benyũ, ngoko Kristo mwanza ekanĩsa. Kusangwa Kristo mwayiha busana n'ekanĩsa, 26iniatoka erihigulayo n'erĩeryayo ĩnĩamabĩlabyayo omo magetsi, kye kĩnywa kiwe. 27Ati, iniatoka eriyiretera ekanĩsa omo bubuya bwayo, isiyiwite ekĩtĩngũ kutse omũkũnyo kutse ekindi kiri ng'ekyo; nĩkwa ati, ibye ĩbũyĩrĩre butsira bulema. 28Litya abĩba ko banze abakalĩ babo bo batya ngoko bakanza emibiri yabo. Oyukanza omũkalĩ wuwe akayanza. 29Kusangwa sihali mundu na kera oyũkakwa omubiri wuwe g'obusu, nĩkwa akahago akalyo n'erĩsũgago, ngoko Kristo akakola busana n'ekanĩsa. 30Netu ekanĩsa, tuli bĩtsũko by'omubiri wuwe. 31Ngoko kĩsakĩre kiti, Busana n'omwatsi oyu omundu asyasĩganĩa ĩse na nyĩnya, asyalanda oko mũkalĩ wuwe, n'ababiri abo basyabya muguma. 32Hano hali erĩkũmbo lĩnene; nĩkwa ngahula Kristo n'ekanĩsa. 33Nenyũ nibya, obuli mundu omo katĩkatĩ kenyũ anze mũkalĩwe ngoko akayanza ĩyowene; n'omũkalĩ naye akenge ĩba wuwe.

will be added

X\