ABANYA EFESO 4

1Neryo ĩngye mundu w'omũlĩkĩ busana n'Omukama, ngabahatikana nyiti, mukwame emibere y'olulengo olo Nyamuhanga ababirikirira erikwamalo. 2Mũyĩkehaye, mubye n'omutima molo, muyibombeke. Muganyirane omo lwanzo. 3Mulenge eribya n'obuguma obũkalũa oko Mũlĩmũ Abũyĩrĩre, kandi mubye n'obuholo obũkabamatanaya haguma. 4Kusangwa hali omubiri muguma, n'Omũlĩmũ Abũyĩrĩre muguma, ngoko Nyamuhanga ababirikira oko maha maguma. 5Hali Omukama muguma, n'erĩkĩrĩrya liguma, n'erĩbatĩsya liguma. 6Hali Nyamuhanga muguma, Ise w'abandu bosĩ, oyuli endata oko bosĩ. Kandi akakola omo bosĩ, kandi ali omo byosĩ. 7Nĩkwa Nyamuhanga omo lukogo luwe mwaha obuli mundu ũkw'ĩtwe olũsũnzo ng'olulengo lw'erĩhĩtya lya Kristo. 8Neryo kĩkabũga kiti, Omugulu ahetukira endata, Wabirisondola abanyegwa bangi haguma nawe, Kandi mwaha abandu b'olũsũnzo. 9Neryo atĩkĩ kwehĩ ati, ahetuka endata? Liti, atsũka erĩkĩma omo myanya y'eyĩkwa y'ekihugo. 10Neryo oyo wandagala, yo n'oyo wahetukira endata kwilaba amatũkũ gosĩ, iniatoka erĩũsũlya ehosĩ n'eribya ehosĩ. 11Neryo mwaha abandu b'olũsũnzo mũsĩndo-mũsĩndo. Mwaha abandi eribya bakwenda, mwaha abandi eribya bamĩnyererĩ, mwaha abandi eribya batũlĩ b'Engulu Yowene, abandi mwahabo eribya bateya b'ekanĩsa n'abakangĩrĩrya. 12Neryo mwakola atya erĩtegekanĩa abandu ba Nyamuhanga busana n'omũbĩrĩ wuwe, n'erĩhĩkanĩa omubiri wa Kristo. 13Litya twasyahĩka oko buguma bw'erĩkĩrĩrya n'obw'eriminya Omugala wa Nyamuhanga, itwatoka erĩhĩkana omo lulengo lw'erĩhĩkana lya Kristo. 14Itutaswabya bana, abakagusawa eyĩ n'eyĩ omo bisunda by'engetsi, kutse erihekwa ehandi n'ehandi n'amahunga gosĩ w'erĩkangĩrĩrya ly'abandu abakateba, kandi abakatalaya abandu omo bũgobya bwabo. 15Nĩkwa tũbũge ekwenene omo mutima w'olwanzo, kandi tukule busana na Kristo omo myatsi yosĩ, kusangwa iye ni mutwe netu tuli mubiri wuwe. 16Busana naye omubiri gosĩ akatsũkĩkanĩbawa n'erilukwa haguma omo buli nungo. Obuli kĩtsũko kyamakola haguma kikaleka omubiri gosĩ iniakula ndeke n'erĩkanyĩa omo lwanzo. 17Ngabũga ekĩ, kandi ngatũlago haguma n'Omukama nyiti, simusyeswalendera kandi ngoko Bihanda bikalendera, kusangwa amalengekanĩa wabo ni buyira. 18Kandi amenge wabo nĩ mwĩrĩmya. Babirigabana n'engebe ya Nyamuhanga, sĩbasĩkĩ kandi babĩrĩkalya emitima yabo. 19Sĩbekwa esĩsonĩ; kandi bakayitwala okw'ĩsĩngĩra lyosĩ, bakakola obuli mũsĩndo w'ebĩtĩsĩrĩre n'obururu. 20Nĩkwa ĩnywe, momutiga Kristo yo mutya. 21Mwamabya mwabĩrĩmowa, ĩmwabĩrĩkangĩrĩrĩbwa na Kristo, omo kwenene eyiri na Yesu. 22Neryo muleke emibere ya kera eyabya ĩkabatsandya omo syongumbu esikabateba. 23Mubye bahya-bahya omo mitima yenyũ n'omo malengekanĩa wenyũ. 24Mubye bandu bahya-bahya abahangikawa omo kĩsosekanĩo kya Nyamuhanga, omo bitunganene n'omo bĩbũyĩrĩre by'ekwenene. 25Neryo mugane eribiha lyosĩ. Obuli mundu abũge eby'ekwenene oko mũlĩkyabo, kusangwa ĩtwe bosĩ tuli balĩkyabo omo mubiri wa Kristo. 26Mwamahitana isimwakola ebibi, simuleke eryuba likalenga imunahitene. 27Simuhe Satanĩ y'omwanya. 28Omwĩbĩ syĩbe kandi, nĩkwa akole omũbĩrĩ owene omo byala biwe, iniatoka eribana ak'erirya kandi iniatoka erĩwatĩkya abera. 29Sĩmũbũge ebĩnywa ebĩtĩsĩrĩre, nĩkwa mũbũge ebĩnywa bibuya ebĩkawatĩkaya n'erĩhĩmba bandu, ebikaha olukogo oko bandu abakowa. 30Sĩmwĩte Omũlĩmũ Abũyĩrĩre wa Nyamuhanga w'obũlĩge, kusangwa Omũlĩmũ Abũyĩrĩre nĩ kĩmĩnyĩsyo kyenyũ busana n'ekiro ekyo Nyamuhanga asyababohola. 31Mugusehali erikaliha lyosĩ, n'eryagalirwa lyosĩ, muleke olukanda, n'ebĩtsũmĩ byosĩ, haguma n'erĩkĩsya lyosĩ. 32Mwanzane, mubye n'emitima eyihehere, mubuyirane, ngoko Nyamuhanga abiribabuyira busana na Kristo.

will be added

X\