ABANYA EFESO 3

1Busana n'omwatsi oyũ, ĩngye Paũlo ngasaba Nyamuhanga, ĩngye mundu w'omũlĩkĩ wa Kristo Yesu busana nenyũ, abandu b'Ebihanda. 2Kusangwa mwabĩrĩowa ngoko Nyamuhanga omo lukogo luwe abirimba omũbĩrĩ w'erĩbawatĩkya. 3Nyamuhanga mwabĩsũla erĩkũmbo liwe n'erĩnyĩmĩnyĩsyalyo, ngoko nabasakira erĩmbere omo bĩnywa bike. 4Neryo mwamasoma ebyo mwasyaminya ebyo nyasĩ omw'ĩkũmbo lya Kristo. 5Omo migulu yalaba Nyamuhanga mwatamĩnyĩsya abandu b'erĩkũmbo erĩ; nĩkwa lino omo Mũlĩmũ Abũyĩrĩre abĩrĩbĩsũlĩralyo abakwenda buwe babũyĩrĩre n'abamĩnyererĩ. 6Erĩkũmbo eryo liti, busana n'Engulu Yowene, Ebihanda bakabya n'omũyĩsa haguma n'Abayũda, kandi omo kĩtũnga kiguma bakasangira ebyo Nyamuhanga alagabo omwisi wa Kristo Yesu. 7Nyamuhanga omo lũsũnzo lw'olukogo luwe mwanyĩhĩra mo mugombe w'erĩtũla Engulu Yowene. Kandi mwambalo omo bũtokĩ buwe bunene. 8Ĩngye indi muke kutsibu omo katĩkatĩ k'abandu ba Nyamuhanga, nĩkwa omo lukogo luwe Nyamuhanga mwamba omũbĩrĩ gowene oyũ w'erĩtũlĩra Ebihanda engulu y'obuteke obũlengĩre, obwa Kristo, nabo bũlabĩre obũlengekanĩa. 9Kandi mwamba omũbĩrĩ w'erĩmĩnyĩsya abandu bosĩ ngoko Nyamuhanga akatondekanaya omwatsi w'erĩkũmbo erĩ. Nyamuhanga oyo wahangika ebindu byosĩ, mwabĩsa omwatsi oyo g'oko migulu yosĩ yalaba, 10iniatoka, oko mugulu ono, omo kanĩsa yiwe, erĩkangya oko batabalĩ n'ab'ehamũlĩ omo kyanya, amenge wuwe mũsĩndo-mũsĩndo. 11Nyamuhanga mwakola ebĩ ngoko ayĩsũnza kera na kera, neryo lino abĩrĩberereryabyo omwisi wa Kristo Yesu Omukama wetu. 12Kusangwa tumatikene naye, kandi kusangwa twabĩrĩmwĩkĩrĩrya, tuli n'obwĩranda bw'erĩhĩka embere wa Nyamuhanga butsira buba. 13Kikaleka inabahatikana nyiti, simuluhe busana n'amalĩge wage busana nenyũ; kusangwa amalĩge ayo nĩ ndũndĩ busana nenyũ. 14Busana n'ekĩ ngakũkamira Tata. 15Iye akahula obuli kĩtũnga omo lĩna lyakyo, ekiri omo lubula n'ekiri munakihugo. 16Ngamusaba nyiti, omo lukengerwa luwe lunene, abahe obũtokĩ bw'Omũlĩmũ wuwe Abũyĩrĩre imwatoka eribana amaka omo mitima yenyũ. 17Kandi ngasaba nyiti, Kristo ĩkale omo mitima yenyũ busana n'erĩkĩrĩrya lyenyũ; kandi nyiti, muhande emĩrĩhĩ y'olwanzo lwenyũ, ĩmũnasĩkĩre omo lwanzo olo. 18Imwatoka haguma n'abandu bosĩ ba Nyamuhanga eriminya ndeke obunene b'olwanzo luwe, n'obugali bwalo, n'obuli bwalo, n'obuli bw'endata bwalo, n'obuli bw'eyĩkwa bwalo. 19Kandi mutoke eriminya kutsibu olwanzo lwa Kristo olũlabĩre eriminya ly'abandu. Kandi nyiti, imwatoka erĩũsũlĩbwa omw'ĩhĩkana lyosĩ lya Nyamuhanga. 20Olukengerwa lubye ukw'iye oyuwite obũtokĩ bw'erikola ebyosĩ ebyo tũkabũlaya kutse ebyo tũkalengekanaya, ng'obũtokĩ obukakola omwisi wetu. 21Olukengerwa lubye ukw'iye omo kanĩsa n'omwisi wa Kristo Yesu oko migulu yosĩ, kera na kera. Amina.

will be added

X\