ABANYA EFESO 2

1Erĩmbere ĩnywe mwabya baholĩ omo bĩrĩmũ byenyũ busana n'amalolo n'ebibi byenyũ. 2Oko mugulu oyo mwabya mukalendera omo nzira nyibi y'ekihugo kino; mwabya mũkowa omũtabalĩ w'obũtokĩ b'obwami bw'ekyanya. Naye nĩ kĩrĩmũ ekikasondola abandu abatĩowa Nyamuhanga. 3Netu twabya ng'abo, itukakwama esyongumbu sy'emibiri yetu, itukakola erisonda ly'emibiri yetu n'obũlengekanĩa bwetu. Netu nibya ng'abandu bosĩ, twabya tutolere erihitana n'eritswera lya Nyamuhanga. 4Nĩkwa Nyamuhanga awite eriganyira ĩnene, n'olwanzo luwe busana netu ni lunene. 5Omugulu twabya tũholĩre omo malolo wetu, Nyamuhanga mwatuha engebe haguma na Kristo; mwabĩrĩlamĩbwa busana n'olukogo lwa Nyamuhanga. 6Kandi, itumatikene na Kristo Yesu, abiritusumba n'erĩtwĩkalya haguma na Kristo Yesu omo myanya y'elubula. 7Nyamuhanga mwakola atya erĩkangya omo migulu yosĩ eyikandisyasa obubuya bunene bw'olukogo luwe; olo atũkangaya omo lwanzo luwe busana na Kristo Yesu. 8Kusangwa mwabĩrĩlamĩbwa omo lukogo lwa Nyamuhanga omo nzira y'erĩkĩrĩrya, n'erilama eryo si'kola lyenyũ, nĩ lũsũnzo lwa Nyamuhanga. 9Omundu siayipipe, kusangwa sĩ mũbĩrĩ w'omundu. 10Kusangwa Nyamuhanga atubumba, n'erĩtũmatĩkanĩa na Kristo Yesu, abirituhangika ati tukole emĩbĩrĩ yowene eyo akokotaya kera, ati tubye tukakolayo. 11Neryo mwibuke ngoko mwabya erĩmbere ab'Ebihanda oko mubiri. Abayũda ababwene, bakabahula mo batabwene omo mwatsi owakakolawa omo mubiri. 12Oko mugulu oyo mwabya hali uku Kristo, mwabya balũahali; isimuli oko ndagane eyo Nyamuhanga alaga abandu buwe. Kandi mwabya butsira amaha, imukasiba omo kihugo kino isimuwite Nyamuhanga. 13Nĩkwa lino, kusangwa tumatikene na Kristo, ĩnywe mwabya hali, mwabiriretwa hakũhĩ na Kristo busana n'omusasi wa Kristo. 14Kusangwa Kristo ni buholo bwetu, iniabiriyira Abayũda, n'Ebihanda, mo kihanda kiguma. Omo mubiri wuwe, Kristo mwaterya olũhĩmbo olwagababo, olwayirabo mo nzĩgũ. 15Kristo mwalũsya Emigambo y'Abayũda haguma n'ebihano byabo, iniatoka eriyira omwisi wuwe ekihanda kiguma kihya-kihya omw'abo ababya kera ebihanda bibiri, busana n'erimatikana nabo. Neryo mwaleta obuholo bw'atya. 16Kristo mwalũsya obũyĩgũ obwabya omo katĩkatĩ kabo, omo luholo luwe oko musalaba. Mwasanganĩabo uku Nyamuhanga, n'eriyirabo mo muguma. 17Litya Kristo mwasa n'erĩtũla Engulu Yowene y'obuholo ũkw'ĩnywe Ebihanda ebyabya hali, n'oko Bayũda ababya hakũhĩ naye. 18Kusangwa busana na Kristo ĩtwe bosĩ, Abayũda n'Ebihanda, tukabana enzira y'erĩhĩka uku Tata Nyamuhanga busana n'Omũlĩmũ Abũyĩrĩre muguma. 19Neryo ĩnywe ab'Ebihanda, simu-kiri ba hali kutse ab'ekindi kihanda; lino muli esyondũlanĩ haguma n'abandu ba Nyamuhanga, muli ab'ekĩtũnga kya Nyamuhanga! 20Kandi mwabĩrĩhĩmbwa oko kibanza ekyo abakwenda n'abamĩnyererĩ batsũka, kandi Kristo nĩ'bwe ĩnene erĩkawataya engonde y'enyũmba. 21Iye Kristo akahĩndanaya enyũmba yosĩ eyo haguma, n'erĩũsũlyayo, ibye hekalũ yĩbũyĩrĩre busana n'Omukama. 22Busana n'erimatikana na Kristo, nenyũ nibya mũkahĩmbawa eribya obwĩkalo bwa Nyamuhanga busana n'Omũlĩmũ Abũyĩrĩre.

will be added

X\