ABANYA EFESO 1

1Ĩngye Paũlo, omukwenda wa Kristo Yesu okw'isonda lya Nyamuhanga. Ngabasakira ĩnywe bandu ba Nyamuhanga abĩkere eEfeso, abateregula erikwama Kristo Yesu. 2Nyamuhanga Tata wetu, n'Omukama Yesu Kristo, abahe olukogo n'obuholo. 3Tupipe Nyamuhanga Tata w'Omukama wetu Yesu Kristo! Busana n'erimatikana na Kristo Nyamuhanga abirituha omũyĩsa munene. Abirituha obuli mũyĩsa w'ekĩrĩmũ owakalũa omo myanya y'elubula. 4Nyamuhanga mwayisoga twe eribya buwe, erimatikana na Kristo embere w'erihangikwa ly'ekihugo, ati tubye ababũyĩrĩre butsira bulema embere wuwe. Nyamuhanga, busana n'olwanzo luwe, 5mwayisoga erituyira mo bagala buwe busana na Kristo Yesu. Erĩ ryabya erisonda liwe erĩkamũtsemesaya. 6Tupipe Nyamuhanga busana n'olukogo lubuya luwe olo atuha busana na Mugala wuwe mwanze! 7Kusangwa twabĩrĩtongolĩbwa omo musasi wa Kristo, kandi abiritubuyira amalolo wetu. Kwenene olukogo lwa Nyamuhanga ni lunene, 8olo atuha ndeke-ndeke. Kusangwa Nyamuhanga omo menge n'eriminya liwe mwakola ebyo abya abĩrĩyĩsũnza. 9Kandi abĩrĩtũmĩnyĩsya erĩkũmbo ly'erĩyĩsũnza liwe, eryo ayisoha erĩberererya omwisi wa Kristo oko mugulu atolere. 10Nyamuhanga abĩrĩyĩsũnza erĩhĩndanĩa umu Kristo ebyosĩ ahangika, ebiri omo lubula n'ebiri omo kihugo. 11Kusangwa Nyamuhanga akakola emyatsi yosĩ ng'erisonda liwe, ngoko ategekanaya. Kandi Nyamuhanga ayisoga twe eribya bandu buwe omwisi wa Kristo ngoko ayĩsũnza kera-kera. 12Ati, ĩtwe twatsũka erĩhĩra amaha uku Kristo, tupipe olukengerwa lwa Nyamuhanga. 13Omwatsi kw'abya atya busana nenyũ. Omugulu mowa omwatsi w'ekwenene, w'Engulu Yowene y'erĩbalamya omw'ĩkĩrĩrya Kristo. Iye Nyamuhanga mwabahĩrako ekiminyikalo kiwe, iniakabaha Omũlĩmũ Abũyĩrĩre ogo alaga. 14Omũlĩmũ Abũyĩrĩre ni mutsimbo w'ebyo Nyamuhanga abirilaga abandu buwe, erĩhĩka aho Nyamuhanga asyatongolerya ebyosĩ biwe. Tupipe olukengerwa luwe! 15Busana n'omwatsi oyũ, erĩtsũka ekiro nowa ngoko mwĩkĩrĩraya Omukama Yesu, kandi ngoko mwanzĩre abandu bosĩ ba Nyamuhanga. 16sĩndyũmbaya eriha ewasĩngya uku Nyamuhanga busana nenyũ. Ngabibuka omw'isaba lyage. 17Kandi ngasaba Nyamuhanga w'Omukama wetu Yesu Kristo, iye Tata oyuwite olukengerwa, abahe omo Mũlĩmũ Abũyĩrĩre, amenge, n'erĩbĩsũlĩra, imwatoka erimuminya ndeke-ndeke. 18Ngasaba nyiti, obũlengekanĩa bwenyũ bubane erilangira ekyakakala kiwe, imwatoka eriminya amaha ago muwite, kusangwa abiribabirikira, kandi muminye omũyĩsa mubuya Nyamuhanga akalaga abandu buwe. 19Muminye obunene bw'obũtokĩ buwe obukakola omwisi wetu ĩtwe tũkĩkĩrĩraya. Obũtokĩ obũ omwisi wetu ni maka ayo manene wa Nyamuhanga, 20ago akangaya omugulu alũbũkaya Kristo oko baholĩ, n'erĩmũhĩra oko kĩtũmbĩ oko luhande luwe lw'amali omo lubula. 21Kristo akatabala eyo, endata oko batabalĩ bosĩ n'abakama bosĩ, n'ab'ehamũlĩ bosĩ, n'abenye obũtokĩ bosĩ. N'erina liwe lĩlabĩre oko buli rĩna erikahulawa oko mugulu ono, kutse oko mugulu owakandisyasa. 22Nyamuhanga abĩrĩhĩra emyatsi yosĩ omo hamũlĩ yiwe, kandi abĩrĩmũhĩra mo mukulu w'emyatsi yosĩ busana n'ekanĩsa. 23Ekanĩsa eyĩ ni mubiri wa Kristo, kandi nĩ 'hĩkana ly'oyũkahĩkanaya ebyosĩ ehosĩ.

will be added

X\