ABANYA KOLOSAĨ 3

1Neryo kusangwa mwabĩrĩlũbũkĩbwa haguma na Kristo, mũhĩre emitima yenyũ oko myatsi y'endata aho Kristo ĩkere oko luhande lw'amali lwa Nyamuhanga. 2Mũhĩre obũlengekanĩa bwenyũ oko myatsi y'endata, butsira oko myatsi ya muna-kihugo. 3Kusangwa mwabirihola, na lino engebe yenyũ ĩbĩseme haguma na Kristo omwisi wa Nyamuhanga. 4Kristo ni ngebe yenyũ, neryo omugulu asyamĩnyĩkalĩbwa nenyũ mwasyamĩnyĩkalĩbwa haguma naye omo lukengerwa. 5Neryo mwĩte esyongumbu syenyũ sy'ekihugo, syesĩ: erĩsĩngĩra, ebĩtĩsĩrĩre, engumbu nyibi, erisonda ibi, n'obururu b'omũsĩndo w'erikwama esyosanamu. 6Busana n'emyatsi ng'eyĩ erihitana lya Nyamuhanga lĩkahĩka oko bandu abatĩowa. 7Nenyũ momwabya mukakola ng'abo, omugulu mwahĩra emitima yenyũ, oko myatsi eyo. 8Nĩkwa lino, nenyũ mugane eyosĩ eyĩ: erihitana, eriagalirwa, ekĩnĩga, eritsuma; kandi sĩmũbũge ebĩtĩsĩrĩre. 9Muleke eribihirana, kusangwa mwabirigabana n'omundu wa kera n'emĩbĩrĩ yiwe. 10Kandi mwabiriambala omundu muhya-muhya, oyo Nyamuhanga, mũhangĩkĩ wuwe akabindula, itwatoka erimusosa n'erimuminya ndeke. 11Neryo sihakiri kandi omundu w'Ebihanda n'Omũyũda, kutse oyubwene n'oyutabwene kutse omũyĩra, kutse mundu w'omolĩ, kutse omukobe, kutse ow'obwĩranda, nĩkwa Kristo ni mukulu w'abosĩ, kandi Kristo ali omwisi w'ebyosĩ. 12Neryo muli bandu ba Nyamuhanga. Abiribanza, abiriyisoga nywe. Busana n'ekyo muyire emitima y'eriganyira, omutima w'obubuya, ow'erĩyĩkehya, ow'obolo. ow'eriyibombeka. 13Neryo muganyirane, mubuyirane omugulu omundu awite omwatsi oko gundi. Ngoko Mukama ababuyira, nenyũ ko mwangabuyira abandi bo mutya. 14Kandi kwilaba ebyosĩ, muyire omutima w'olwanzo olũkahĩkanaya ebyosĩ haguma omo buguma. 15Neryo muleke obuholo bwa Kristo butabale emitima yenyũ. Kusangwa mwabiribirikirwa na Nyamuhanga eribya n'obuholo obo haguma, omo mubiri muguma. Kandi mubye bandu b'ewasĩngya. 16Ebĩnywa bya Kristo, omo bubuya bwabyo bosĩ, bĩkale omo mitima yenyũ. Mũkangĩrĩranaye, n'erihana obuli mundu mũlĩkyabo omo menge gosĩ. Mwimbe esyonyimbo, esyonyimbo sy'eripipa, n'esyonyimbo sy'erĩramya, mwimbire Nyamuhanga n'emitima y'ewasĩngya. 17N'ebyosĩ mukakola, omo kĩnywa, kutse omo mũbĩrĩ, mukole ebyosĩ omo lĩna ly'Omukama Yesu, imunemuha ewasĩngya uku Tata Nyamuhanga busana na Yesu. 18Abakalĩ, mowe abĩba nywe, ngoko litolere imwakola ng'Abakristo. 19Abĩba, mwanze abakalĩ benyũ, simukale kubo. 20Abana, mowe ababũtĩ benyũ omo myatsi yosĩ, kusangwa ekĩ kĩkatsemesaya Omukama. 21Ĩnywe abotata, sĩmũhĩtanaye abana benyũ, bakasyaluha. 22Abakobe, mowe abakama benyũ ba muna-kihugo omo myatsi yosĩ. Simukole kusangwa bakabasamalira, imuli ng'abakatsemesaya abandu basa, nĩkwa mukole n'omutima owene, imukakenga Omukama Yesu. 23Ebyosĩ mukakola, mukole n'omutima g'omuhwa, nga mukakolera Omukama, butsira bandu. 24Ĩmũnasĩ ngoko Mukama asyabahemba. Mwasyangirira ebyo abĩkĩre busana n'abandu buwe. Kusangwa Omukama Kristo, yo mukakolera. 25N'oyukakola nabi asyalihwa busana n'ebibi biwe, butsira butaga.

will be added

X\