ABANYA KOLOSAĨ 2

1Nyanzĩre imwaminya ngoko nabiriyitsinga kutsibu busana nenyũ, na busana n'abandu b'eLaodĩkĩa, kandi busana n'abandu bosĩ abatebanyilolako n'erinyiminya. 2Nyiti kumbe bahande emitima yabo, ibabohana omo lwanzo, ibatoka erĩowa ndeke-ndeke n'eriminya kutsibu ngoko Kristo nĩ kũmbo lya Nyamuhanga. 3Kusangwa obuteke bosĩ bw'amenge, n'eriminya bĩbĩseme omo byala bya Kristo. 4Busana n'ekĩ ngababwira sihabye omundu oyũkabatebaya omo bĩnywa by'ekĩsehya. 5Nomo nangabya isindi eyo omo mubiri, nĩkwa indi haguma nenyũ omo kĩrĩmu, kandi ngatsema erilangira ngoko mũsĩkĩre n'erihangana ndeke omw'ĩkĩrĩrya lyenyũ uku Kristo. 6Neryo, kusangwa mwabiriangirira Kristo Yesu mo Mukama, mumukwame n'erimatikana naye. 7Muhande emĩrĩhĩ yenyũ omwisi wuwe. Mũsĩkaye erĩkĩrĩrya lyenyũ ngoko mwakangĩrĩrĩbawa. Mubye n'omutima oswĩre n'ewasĩngya. 8Mũtegaye, sihabye mundu oyukabanyega omo menge w'abandu n'eriteba buyira erĩkalũa oko mitsye y'abandu, n'oko myatsi y'ebĩrĩmũ ebikatabala oko bihugo, eyĩtalũa uku Kristo. 9Kusangwa erimatikana na Kristo liwite erĩhĩkana lyosĩ lya Nyamuhanga omo mubiri. 10Kandi mũhĩkene busana n'erimatikana na Kristo. Kristo ni mukulu oko buli mũtabalĩ kutse oko mwenye hamũlĩ. 11Erimatikana na Kristo mwabanĩbawa, butsira eribana eryo bandu bakayira, nĩkwa omw'ibana eryo Kristo akakola eribohola omundu oko maka w'omubiri. 12Kusangwa omw'ĩbatĩsĩbwa lyenyũ momwatabwa haguma na Kristo. Kandi omw'ĩbatĩsĩbwa lyenyũ, mwalũbũkĩbawa haguma na Kristo busana n'erĩkĩrĩrya lyenyũ omo bũtokĩ bwa Nyamuhanga, obwalũbũkaya Kristo oko luholo. 13Nenyũ mwabya baholĩ busana n'amalolo wenyũ, kandi busana n'eribya bandu b'Ebihanda bitawite Migambo. Nĩkwa Nyamuhanga abiribaha engebe haguma na Kristo. Naye abiritubuyira amalolo wetu gosĩ. 14Kandi abirisangula emyatsi eyabya ĩsakĩre, eyikatuhandikirira. Nyamuhanga mwalũsya yoho, n'erikongomererayo oko musalaba. 15Neryo oko musalaba oyo Kristo mwasingula abatabalĩ n'ab'ehamũlĩ, kandi mwahemulabo, n'erĩnũbyabo embere sy'abandu. 16Neryo simuleke omundu eribatswera omo myatsi y'akalyo, kutse erĩpũlya, kutse busana n'ekiro kikulu, kutse ekiro ky'omukera muhya-muhya, kutse ekiro ky'eSabato. 17Emyatsi eyĩ nĩ kyũtsũtsũ ky'ebyo ebikandisyasa. Nĩkwa eby'ekwenene ni Kristo. 18Simuleke omundu eribatswera n'eribateba ati abirilota esyonzolĩ, kutse oyo wanzĩre erĩyĩkehya, n'erĩramya abamalaĩka. Omundu oyũ akayĩhamaya buyira busana n'obũlengekanĩa buwe. 19Siakihambana na Kristo, oyuli mutwe. Ye Kristo akaleka omubiri gosĩ erĩtũwa n'erilukwa haguma busana n'esyonungo n'emĩsĩsa; omubiri oyũ iniakula ngoko Nyamuhanga anzĩre akakula. 20Mwamabya mwabirihola haguma na Kristo oko mitsye y'abandu n'ey'abalĩmũ, abakatabala oko bihugo, busana nakĩ mukinakwama ebihano n'amalengekanĩa w'ekihugo kwehĩ? 21Bati, Suwate ũkw'ekĩ, kutse sũgeraye kirya, kutse sũtũle ũkw'ekĩ. 22ebyosĩ Ebĩ, bikahera omw'ikola lyabyo kusangwa ni bihano n'erĩkangĩrĩrya by'abandu. 23Ebĩ biri nga biwite amenge omo myatsi y'erĩramya abamalaĩka, n'erĩyĩkehya, n'erĩkaramya omubiri. Nĩkwa sibyetoka esyongumbu sy'omubiri.

will be added

X\