ABANYA KOLOSAĨ 1

1Ĩngye Paũlo, indi mukwenda wa Kristo Yesu okw'isonda lya Nyamuhanga haguma na Tĩmoteo mũlĩkyetu tukabasakira. 2Ĩnywe bandu ba Nyamuhanga abĩkere eKolosaĩ, nenyũ balĩkyetu abateregula erikwama Kristo, Nyamuhanga Tata wetu abahe olukogo n'obuholo. 3Obuli mugulu tukabasabira, tukaha ewasĩngya uku Nyamuhanga, iye Tata n'Omukama wetu Yesu Kristo. 4Kusangwa twabĩrĩowa ngoko mwabĩrĩkĩrĩrya Kristo Yesu, kandi twabĩrĩowa ngoko mwanzĩre abandu bosĩ ba Nyamuhanga. 5Omugulu ebĩnywa by'ekwenene by'Engulu Yowene byabahĩkako erĩmbere, mobyabaletera amaha. Neryo erĩkĩrĩrya lyenyũ n'olwanzo lwenyũ bikahangana oko maha w'erilama awabĩkĩre busana nenyũ elubula. 6Engulu Yowene inemuleta omũyĩsa, kandi inemukanyirira omo kihugo kyosĩ. Litya yabirikola omo katĩkatĩ kenyũ erĩtsũka ekiro mowa engulu y'olukogo lwa Nyamuhanga n'eriminyalo ndeke-ndeke ngoko luli kwenene. 7Ye Epafra, omugombe mwanze haguma netu mwabakangĩrĩrya Engulu Yowene. Naye ni mukwenda oyuteregula, wa Kristo omo mwanya wetu. 8Epafra mwatubwira omwatsi w'olwanzo olo Mũlĩmũ Abũyĩrĩre abiribaha. 9Busana n'omwatsi oyũ, tukabasabira ebiro byosĩ erĩtsũka ekiro towa engulu yenyũ. Tukasaba Nyamuhanga tuti abamĩnyĩsaye ndeke-ndeke erisonda liwe haguma n'amenge gosĩ n'erĩowa lyosĩ, ebyo Mũlĩmũ Abũyĩrĩre akatuha. 10Neryo imwasyatoka erirendera ngoko Mukama anzĩre, n'erikola ebiro byosĩ ebĩkamũtsemesaya. Kandi imwasyakanyirira erikola emĩbĩrĩ yosĩ mibuya ya Nyamuhanga, kandi imwamuminya ndeke kwilaba erĩmbere. 11Kumbe mukabana maka n'akagala kosĩ ebĩkalũa omo bũtokĩ bubuya buwe, imwatoka erĩyĩyĩnĩa omo myatsi yosĩ haguma n'eriyibombeka. 12Mutseme n'eriha ewasĩngya uku Tata, oyo waleka imwatoka erisangira ebyo Nyamuhanga abirilaga abandu buwe omo bwami bw'ekyakakala. 13Kusangwa mwatusabula oko hamũlĩ y'obwami bw'omwĩrĩmya n'erĩtũhũmĩrya omo bwami bw'Omugala wuwe mwanze. 14Kristo abĩrĩtũtongolya n'eritubuyira ebibi byetu. 15Kristo nĩ kĩsosekanĩo kya Nyamuhanga oyutelolawako. Kristo ni Mugala akambere, oyũlabĩre ebyosĩ byahangikawa. 16Kusangwa Nyamuhanga mwahangika ebindu byosĩ omo byala bya Kristo, ebiri omo lubula, n'ebiri oko kihugo, ebindu ebikalolawako, n'ebindu ebitelolawako nomo angabya mami, kutse abakama, kutse abatabalĩ, kutse ab'ehamũlĩ. Nyamuhanga mwahangika obuli kindu omo byala bya Kristo, na busana naye. 17Kristo mwabyaho embere w'emyatsi yosĩ, kandi omwisi wuwe emyatsi yosĩ ikawatana. 18Iye ni mutwe w'omubiri wuwe, ye kanĩsa; kandi iye nĩ 'tsũka ly'ekanĩsa; kandi, iye ni kambere k'erĩlũa omo baholĩ, iniatoka eribya ow'erĩmbere, omukulu w'emyatsi yosĩ. 19Kusangwa molyatsemesya Tata, ati Mugala alingirirane naye ndeke, ahĩkane naye. 20Neryo Nyamuhanga mwayisoha ati Kristo asanganaye emyatsi yosĩ ukw'iye, emyatsi yosĩ omo lubula, n'eyiri oko kihugo. Kristo mũta omusasi wuwe oko musalaba erituletera obuholo. 21Erĩmbere ĩnywe mwabya hali uku Nyamuhanga imwabiriyiyira mo nzĩgũ siwe omo bũlengekanĩa bwenyũ busana n'emyatsi mibi mwabya mukakola. 22Nĩkwa lino Nyamuhanga abĩrĩbasanganĩa ukw'iye omo luholo lw'omubiri wa Yesu, iniatoka eribaleta embere sya Nyamuhanga imune babũyĩrĩre n'ababuya, butsira ekĩnywa ekyangabahandikirira. 23Nĩkwa litolere imwakwama butsira eriregula omw'ĩkĩrĩrya, ĩmũnasĩkĩre ndeke. Sĩmũtũndawe mukaleka amaha w'Engulu Yowene eyo mowa. Ĩngye Paũlo nabiribya mugombe w'Engulu Yowene eyĩ, eyĩkakangĩrĩrĩbawa oko bandu bosĩ muna-kihugo. 24Neryo lino ngatsema omo malĩge wage busana nenyũ. Kusangwa omo mubiri wage ngasangira amalĩge wa Kristo busana n'omubiri wuwe ye kanĩsa. Ngawatĩkaya erĩberererya amalĩge wuwe. 25Kandi Nyamuhanga abĩrĩnyĩhĩra mo mukwenda w'ekanĩsa ya Nyamuhanga. Abirimba omũbĩrĩ w'erĩbakangĩrĩrya ndeke ekĩnywa kya Nyamuhanga, 26na kyo nĩ kũmbo eryabĩsawa oko bandu oko migulu yosĩ eyalaba. Nĩkwa lino abĩrĩbĩsũlalyo oko bandu buwe. 27Nyamuhanga mwanza erĩkũmbũla oko bandu buwe erĩkũmbo libuya erĩ eryo awite busana n'ebihanda byosĩ. Erĩkũmbo eryo ni Kristo omwisi wenyũ; erĩ ni maha w'olukengerwa lwa Nyamuhanga. 28Litya tũkakanaya Kristo oko buli mundu. Tukahana obuli mundu, n'erĩkangĩrĩrya obuli mundu omo menge gosĩ, itwatoka erireta obuli mundu embere sya Nyamuhanga, omundu oyo ĩnĩabĩrĩhĩkana busana n'erimatikana na Kristo. 29Busana n'ekyo, ngakola kutsibu n'eriyitsinga n'omũhwa gosĩ ng'obũtokĩ bwa Kristo obukakola omwisi wage kutsibu.

will be added

X\