EMĨBĨRĨ Y'ABAKWENDA 9

1Nĩkwa Saũlo iniakinahaya ati akĩta abiga b'Omukama, mwaya oko Mũhererĩ mukulu oko bahererĩ bosĩ! 2Neryo mwamusaba esyobarua oko manyũmba w'erĩhĩndanamo eDamasĩkĩ, ati ameyayo abandu abakakwama Enzira y'Omukama, abalume kutse abakalĩ, iniatoka eribohabo n'eritwalabo eYerũsalema. 3Neryo abere anemugenda akahĩka hakũhĩ n'eDamasĩkĩ, neryo-neryo ekyakakala mokyalũa elubula mokyamũkolerya. 4Neryo mwawa oko kitaka, mowa omulenge akabũga naye ati, Saũlo, Saũlo! busana nakĩ ũkanyendereraya kwehĩ? 5Neryo Saũlo mwabũga ati, Ulindi kwehĩ Mukama? Naye mwabũga ati, Indi Yesu, oyo ũkendereraya. 6Nĩkwa uhangane, wingire omo mũyĩ, n'eyo wasyabwirwa ebyo utolere iwakola. 7Nĩkwa abalume ababya naye oko lugendo mobahangana bũkũtũ, ĩbakowa omulenge oyo, nĩkwa isibetalangira mundu. 8Neryo Saũlo mwahangana oko kitaka, nĩkwa nomo meso wuwe abya alĩbũkere, mwatatoka erilangira kindu, mobamuwatako oko byala, mobamutwala eDamasĩkĩ. 9Neryo oko biro bisatu mwatatoka erilangira, kutse mwatalya kutse erĩpũlya kindu. 10Neryo eDamasĩkĩ habya mwiga muguma oyukahulawa mo Anania. Neryo Omukama mwabũga naye omo bũlĩme ati, Anania! Naye mwasũbĩrya ati, Lebaya, ĩngye yono, Mukama. 11Neryo Omukama mwabũga naye ati, Hangana, ugende omo nzira eyikahulawa mo Litunganene, ũbũlaye omo nyũmba ya Yũda busana n'omundu w'eTarso, oyukahulawa mo Saũlo, kusangwa, lebaya, akasaba. 12Naye abirilangira omo bũlĩme omundu oyukahulawa mo Anania akingira omo nyũmba n'erĩmũhĩra kw'ebyala, atoke eriswabana erilangira liwe. 13Neryo Anania mwasũbĩrya ati, Mukama, abandu bangi babirimbwira omwatsi w'omundu oyo, ngoko abirikola abandu bawe eYerũsalema bo nabi kutsibu. 14Na hano eDamasĩkĩ awite ehamũlĩ y'abahererĩ bakulu eriboha abosĩ abakalakira erĩna lyawe. 15Nĩkwa Omukama mwabwira Anania ati, Ugende, kusangwa nabiriyisogaye, erĩmĩnyĩsya erĩna lyage oko b'Ebihanda, n'abami, n'abana ba Israelĩ. 16Nage nasyamũkangya ebyosĩ ebyo asyagalwamo busana n'erĩna lyage. 17Neryo Anania mwahongoka, mwingira omo nyũmba eyo, kandi mwahĩra ebyala biwe uku Saũlo ati, Saũlo, mũlĩkyetu, Omukama Yesu amanyituma, oyo wakubutukirako omo nzira wasiramo. Abirinyituma iwatoka eriswabana erilangira lyawe, n'erĩũsũlĩbwa m'Omũlĩmũ Abũyĩrĩre. 18Neryo-neryo ebindu ebiri ng'esyongũkũ mobyatoga bĩkalũa oko meso wuwe, neryo mwaswabana erilangira liwe, neryo mwahangana mwabatĩsĩbwa. 19Neryo Saũlo abere abirya akalyo, mwabana maka. Neryo Saũlo mwasiba n'abiga ebiro bike eDamasĩkĩ. 20Kandi mwaya neryo-neryo omo manyũmba w'erĩhĩndanamo akatũla engulu ya Yesu, ati ni Mugala wa Nyamuhanga. 21Neryo abosĩ abamowa mobasweka bati, Omundu oyũ si yo n'oyo wĩta abandu ababya bakabirikira oko lĩna erĩ kwehĩ? Kandi, mwatahĩka enoka busana n'omwatsi w'eribohabo n'eritwalabo oko bahererĩ bakulu kwehĩ? 22Nĩkwa Saũlo mwabana amaka omw'ikangĩrĩrya ĩnĩakasĩnga Abayũda ababya bĩkere eDamasĩkĩ, n'erĩkangya ndeke Yesu kw'ali Kristo. 23Enyũma w'ebiro bingi, Abayũda mobahĩndana, mobaya embĩta y'erĩĩta Saũlo. 24Nĩkwa Saũlo mwabwirwa omwatsi w'embĩta yabo. Kandi mobalĩmbya esyongyo sy'omũyĩ, omo kiro n'omo musibo bati bĩte Saũlo. 25Nĩkwa abiga buwe mobamũtswesya omo kiro, mobamwandagalya omo kitiri bakamũlabya omo mwanya w'olũhĩmbo lw'omũyĩ. 26Neryo Saũlo mwaya eYerũsalema, n'eyo mwalenga erĩĩkala n'abiga. Nĩkwa abosĩ mobamubaha ĩsĩbetalĩga kw'ali mwiga. 27Neryo Barnaba mwaminya omwatsi oyo, mwamuleta oko bakwenda, mwakanĩryabo ngoko Saũlo alangira Omukama y'omo nzira, kandi ngoko Mukama abũga naye. Kandi mwabwirabo ngoko Saũlo akangĩrĩraya omwatsi omo lĩna lya Yesu eDamasĩkĩ butsira eriubaha. 28Neryo Saũio mwasiba nabo iniakalendera omo mũyĩ w'eYerũsalema erĩkangĩrĩrya butsira eriubaha, omo lĩna ly'Omukama. 29Kandi mwabya akabũga n'erikuba obuhaka n'Abayũda abakabũga omo Kĩgĩrĩkĩ. Nĩkwa mobasonda erĩmwĩta. 30Neryo abalĩkyetu babere babĩowa omwatsi oyo mobatwala Saũlo eKaĩsarĩa, mobamutuma eTarso. 31Neryo ekanĩsa y'eYũdea hosĩ n'eGalĩlaya, n'eSamarĩa moyabya n'obuholo. Kandi ekanĩsa moyayĩhĩmba, n'erĩyĩgenderya om'ubaha ly'Omukama, n'omw'ĩsĩbĩkya ly'Omũlĩmũ Abũyĩrĩre, moyakanyirira. 32Nĩkwa Petero mwalendera ehosĩhosĩ eyo, neryo mwandagalira oko bandu ba Nyamuhanga ababya bĩkere eLũda. 33Eyo Petero mweya y'omundu oyukahulawa mo Aĩnea, oyo wabya alwere ĩsĩalĩlũa omo ngyingo yiwe emyaka munani, kusangwa abya abasĩre. 34Petero mwamubwira ati, Aĩnea, Yesu Kristo akakũlamaya. Hangana, usese engyingo yawe. Neryo-neryo Aĩnea mwahangana. 35Neryo abandu bosĩ ababya bĩkere eLũda n'eSaronĩ mobamulolako, mobabindukira Omukama. 36Neryo eYopa habya omwiga muguma erĩna liwe iyo Tabĩta, eribindula erĩna liwe omo Kĩgĩrĩkĩ liti, Dorĩka kutse Isaswi. Omũkalĩ oyo abya akasiba erikola emĩbĩrĩ mibuya n'erĩwatĩkya abera. 37Oko mugulu oyo Tabĩta mwalwala, neryo mwahola. Neryo mobakosa omubiri wuwe mobahĩrago omo kyumba ky'endata. 38Neryo kusangwa eLũda abya mũyĩ hakũhĩ n'eYopa, abiga babere babĩowa ko Petero abya eLũda, mobamutuma kw'abandu babiri, erimulembalemba bati, Sulindirire, wase aho tuli. 39Neryo Petero mwahangana, mwagenda nabo. Neryo abere abĩhĩka, mobamutwala omo kyumba eky'endata. N'abakwakalĩ bosĩ mobimana hakũhĩ naye, ibanemulira, n'erĩmũkangya esyokanzu n'esyongimba esyo Dorĩka abya akasona akine nabo. 40Nĩkwa Petero mwahigira bosĩ b'eyĩhya w'ekyumba ekyo, neryo mwakũkama, mwasaba, neryo mwakebera ekĩnda ekyo ati, Tabĩta, hangana! Naye mwalĩbũla ameso wuwe, neryo abere alangira Petero, mwayĩkũkũma mwĩkala. 41Neryo Petero mwamuha ebyala biwe, mwamũhanganĩa. Nĩkwa Petero mwabirikira abandu ba Nyamuhanga n'abakwakalĩ, mwahĩra Tabĩta yo kubo ĩnĩanakalĩre. 42Neryo engulu y'omwatsi oyo moyaminyikala eYopa hosĩ, n'abandu bangi mobĩkĩrĩrya Omukama. 43Neryo Petero mwĩkala eYopa biro bingi omw'omũbambĩ w'ebihu, ye Sĩmonĩ.

will be added

X\